Maariko 6

Abhanasareeti ˆbhakaanga komokumi Yesu

(Mataayo 13:53–58; Ruuka 4:16–30)

Niho Yesu aghatanura koru iyo, aghagharuka mo‑moghya o waabho o Nasareeti haghirohamu na abhaanabheegha bhaache. 2 Hano orosiko ro rohikiri, aghasëëma kweghi mo‑. Abhaato bhaaru bhano ꞉bhaamooghwire bhakahagha chwee. Mbaare bharabhoorani bharabhugha, “Aa! Omooto uno hayi abhwine ghano ghoose? Wiiki, n‑amangʼiini ke ghano ahaabhuru uno? Hayi abhwine changuru che ghuköra ebheroghooro bhekoro kinya bhiyo? 3 Omooto uno taanyi wuure seremara, omoona o Mariyamu, ömööbhö waabho na Yakobho, na Yoose, na Yuuta na Simiyooni? Kana, na bhasubhaati bhaabho bhataanyi na niitu hano?” Bhaghakarara ighoro yaache, bhakaanga komokumi.

4 Yesu akabhabhoorera akabhugha, “Omurööti nahaabha na asooko ahaghiro ahande hoose, amare taanyi mo‑se yaache, na kwo bhahiiri bhaache na mo‑ka yaache.” 5 Mbe, Yesu taatoriri ghuköra ebheroghooro bhyaru iyo, amare aghatoorera amabhökö abhabhabharu bharëngʼaaneru na kobhahöri. 6 Akaroghoora chwee gho kubha bhataare no obhokumi koru hasuuhu.

Yesu ˆakabhatoma abhatomu bhaache ikomi na bhabhere

(Mataayo 10:5–15; Ruuka 9:1–6)

Akamara Yesu akabha ariinaara mo‑bhyaro bhe haghuhe kobheeghi abhaato. 7 Akabhabherekera abhaanabheegha bhaache ikomi na bhabhere. Akabhaha obhotoro bho koruusi abhaato emisambu, akabhatoma bhabhere bhabhere. 8 Akabharëki kubha, “Motiimoki egheghiro ghyokyose gho ghiri e rughëndö roonyu nanyinga ahimbo ayeene. Motiimoki asako, koru omughaate, koru chambiiri, 9 koru amaghööti aghande gha ghugharura. Mobheeke ebhekwera ebhyene.” 10 Wiiki, akabhabhoorera akabhugha, “Mo‑ka yoyoose ino bhakobhasongʼaana, mwikare‑mu, mbagha hano moghutanura mo‑moghya uyo. 11 Wiiki, hohoose hano bhataakobhasongʼaana hamu kobhatëghëërëra, hano moghutanura, mwikongʼoote orotu runo roonyi mo‑maghoro ghaanyu, ibhe obhwibhateri ghokoobho, kubha Eryobha ˆrekabhaanga.”

12 Abhaanabheegha bhaare bhaghatanura, bhaghasëëma kobharaghaneri abhaato kubha bhatuukuune na ghotigha amasari ghaabho. 13 Bhakaruusi emisambu myaru na bhaakabha bharabhahaka amaghuta abhabhabharu bhaaru, bhakabhahöri.

Yohana Omubhatisaachi ˆakanungu omutu

(Mataayo 14:1–12; Ruuka 9:7–9)

14 Omutëmi o se iyo, ꞉nooghwire amangʼana gha Yesu, gho kubha amangʼana ghaache ngaare ghasanchiri ahaghiro hoose. Abhande mbaare bharabhugha ighoro e Yesu kubha, “N‑Yohana Omubhatisaachi aryokiri koru mo‑bhaku, nikyo anyi no obhotoro bho ghuköra ebheroghooro.” 15 Abhande mbaare bharabhugha kubha, “Yesu n‑.” Abhande mbaare bharabhugha kubha, “Iwe n‑omurööti o Ryobha kinya abharööti abhande bha kare.” 16 Eriibhagha Herote Antibha oghwire amangʼana ghano, akabhugha kubha, “Uyo n‑Yohana, uno ꞉neenungiri omutu. Aryokiri koru mo‑bhaku!”

17 Hayo ekimbërë Herote Antibha omwene naare ahatëkiri Yohana aghöötu, akamubhöha mwighërëcha. Herote naköriri hangʼu, gho ghiri e Herotiya muka Bhiiribho, uno Herote akwiriri nangabha are omukari o mööbhö. 18 Yohana naare aramobhoorera Herote kubha, “Kurëngʼaana ne emeghiro ghe Ryobha, taanyi bhoheene komokwira omukari o möönyu, eriibhagha ömöönyu akeere anyi muhöru.” 19 Mbe, Herotiya akamurëgha chwee Yohana, naare arëënda komwita, amare taatoriri. 20 Herote ꞉naamotiiniri chwee Yohana gho kubha ꞉naamënyiri kubha iwe n‑omooto muhöriicho no omutööbhiyu, gho ghayo akamochonga. Herote nasiighiri komutëghëërëra chwee Yohana, nangabha hano amariri komutëghëërëra ꞉niitumatiri chwee.

21 Eriibhagha rekaheta, no orosiko rumu Herotiya ꞉naabhwine anchëra e komwita Yohana. Orosiko ro kwibhoru Herote Antibha, akabhaghënëhi abhagharuka bha riibharacha reeche, na abhakoro bha bhaashirikare, na abhakangati bha mukööwa o . 22 Hano abhaghëni bhiikeere, omuukë o Herotiya aghasöha, akabhina, akamotegheri Herote na abhaghëni bhaache. Omutëmi akamobhoorera omuukë uyo akabhugha, “Nuusabhe ghyokyose kino okwënda, eni neghokuha.” 23 Akaraheri kubha, “Neghokuha ghyokyose kino okwënda, koru eribhaara re bhutëmi bhoone.”

24 Niho omuukë uyo akahoroka anche aghaye, akamobhoori nyina akabhugha, “Yiima, nisabhe ke?” Nyina akamugharokeri akabhugha, “Sabha kubha akuhë omutu o Yohana Omubhatisaachi.” 25 Mbe, omuukë uyo aghagharuka bhwango kwo mutëmi, akamobhoorera akabhugha, “Nekwënda uhe ibheerebheere omutu o Yohana Omubhatisaachi mo‑rohongo.”

26 Omutëmi akabha na amacheeche chwee, amare gho ghiri e riiraheri rino arahiiri ambërë e bhaghëni bhaache, akamwisherereri. 27 Hayo hayo aghatoma omoshirikare aghi komonunga Yohana omutu. Omoshirikare aghaye mo‑riighërëcha, akamonunga Yohana omutu. 28 Akarëëta omutu o Yohana mo‑rohongo, akamuha omuukë uyo, woose akamohirera nyina. 29 Hano abhaanabheegha bha Yohana bhooghwire ghayo, bhaaghaye, bhakiimoki erihundughu reeche, bhakareryeka mo‑mbeehera.

Yesu ˆakabharaagheri abhaato bhaaru ghokera ebheku bhitaano

(Mataayo 14:13–21; Ruuka 9:10–17; Yohana 6:1–14)

30 Hano bhayo bhagharokiri o‑Yesu, bhaghiikomana ambërë yaache, bhakamobhoorera ghoose ghano ꞉bhaaköriri na ghano bheeghiri abhaato. 31 Kurëngʼaana na abhaato bhaaru bhano bhaare hayo, abhande mbaare bharaacha, na abhande bharatanura, Yesu na abhaanabheegha bhaache bhaghataamibhu kuraaghëra. Niho akabhabhoorera akabhugha, “Muuche, tughëndë hano hataanyi na abhaato, tubhönë omweya o koweera hasuuhu.” 32 Bhaghasöha mo‑bhwato, bhaghatanura abheene, bhaaghaye ahaghiro hano abhaato bhataanyi.

33 Amare hano bhatanwire, abhaato bhaaru bhakabharighi, bhakabhamënya. Abhaato bhaare haghirohamu na abhande koru emeghya myaru bhaaghaye bharayaara, bhakabhakangata kohika iyo hano bhaare bharaghe. 34 Hano Yesu ahikiri ase ayoomu, akarighi erikinda ikoro re bhaato. Akabhaghwera ebheghongi, gho kubha mbaare kinya changʼöndu chino chetaanyi no omoriishi. Aghasëëma kobheeghi amangʼana maaru.

35 Hano chaasa chaaru che omwishe chehetiri, abhaanabheegha bhaache bhakamutambana, bhakamobhoorera kubha, “Hano toonyi m‑mwiteregho, na ˆbhookiira. 36 Mbe, nobharaghe abhaato, bhaghëndë mo‑bhyaro na ahaghiro ahande hano haanyi haghuhe, kubha bhiighorere ebhiinyakurë.” 37 Amare, Yesu akabhagharokeri akabhugha, “Mobhahë inyu ebhiinyakurë.” Bhakamobhoori bhakabhugha, “Nokwënda itu tughëndë tobhaghorere emighaate ghe amaghana abhere kubha tobhahë bhari?”

38 Yesu akabhabhoori akabhugha, “Kana, moonyi ne emighaate erenge? Mughëndë morighi.” Bhaaghaye korighi, bhaghagharuka, bhakamobhoorera bhakabhugha, “Ntoonyi ne emighaate etaano na chaasu ibhere.”

39 Yesu akabhabhoorera akabhugha, “Mobhabhoorere abhaato bhiikare haase mo‑manyaaki amakinda amakinda.” 40 Bhaghiikara amakinda, abhande amaghana amaghana, abhande miröngö etaano etaano. 41 Yesu akiimoki emighaate etaano na chaasu ibhere, aghagharaamereri Mwishaaro, aghiitabheri Eryobha. Aghaghesuura emighaate ghiire, akabhaha abhaanabheegha bhaache kubha bhabhahööhi abhaato. Akabhaha na chaasu chiire ibhere bhabhahööhi. 42 Bhoose bhakaraaghëra, bhaghiighota. 43 Abhaanabheegha bhaache bhaghakoma amatigho gha mighaate na chaasu, bhaghiichori ebhetonga ikomi na bhibhere. 44 Bhano ꞉bhaariire ebhiinyakurë bhiire mbaare bhaaru, abhasubhe abheene mbaare ebheku bhitaano (5,000).

Yesu ˆaghaghënda ighoro e manche

(Mataayo 14:22–33; Yohana 6:16–21)

45 Niho Yesu akahatëka abhaanabheegha bhaache bhasöhë mo‑bhwato, bhamukangate ghutëënya anyancha ghuye mo‑moghya o Bhetisaayita, eriibhagha riyo iwe naare araraghana ne erikinda riire re bhaato. 46 Hano amariri kuraghana nabho, aghatiira mo‑gheghoro ghusabha.

47 Hano bhwiriri ghekangʼuuri, abhaanabheegha mbaare mo‑bhwato ghateghate e nyancha, na Yesu naare omwene chiri mo‑gheghoro. 48 Akabharighi kebhuno bhakunyaaka chwee ghutëma amiterebhi, gho kubha obhukama mboore bhorabhahööchërëra. Mbe, mo‑changökö, Yesu akahika hano abhaanabheegha bhaache ꞉bhaare, ino araghënda ighoro e manche. 49 Amare, hano bhamorooche araghënda ighoro e manche, bhaghiituuri n‑ekehu, bhaghatiina chwee, bhaghaköra eriireghe. 50 Bhoose mbaare bhamorooche na ghotiina chwee, gho ghayo, hayo hayo Yesu aghasiikëra nabho akabhugha, “Mwitoore omukörö, n‑eni, motatiina!” 51 Yesu aghatiira mo‑bhwato bhoobho, obhukama bhuure bhoghateneka. Bhakahagha chwee, 52 gho kubha bhataamënyiri koru ekeroghooro ke mighaate. Emetema gheebho ngeere miköngʼu.

Yesu ˆakahöri abhabhabharu bhaaru bha Ghenesareeti

(Mataayo 14:34–36)

53 Hano Yesu na abhaanabheegha bhaache bhatëënyiri anyancha e Ghariraaya, bhakahika mo‑se e Ghenesareeti. Bhakiimeereri obhwato hayo. 54 Hano bhiikiri hangʼu mo‑bhwato, abhaato bha hayo bhakamumënya Yesu bhwango, 55 bhaghasancha bhwango mo‑se yiire yoose. Abhaato bhaghasëëma kobharëëta abhabhabharu bhabhaghëghiri mo‑machëëra ghuye hohoose hano bhooghwire kubha Yesu naanyi‑ho. 56 Hohoose hano aghiire, ibhe mo‑bhyaro, na mo‑meghya hamu ahaghiro hohoose mo‑se yiire, mbaare bharamurëëtëra abhabhabharu mo‑mitëëra. Bhakamusabha Yesu kubha abhiisherereri abhabhabharu bhamoturi mo‑muköbha o righööti reeche. Bhoose bhano ꞉bhaamoturiri, bhakahöra amabhabharu ghaabho.