<<    <     Markus     6     >    >> 
Yesu bara rapoinalai i Nasare
6
1 Roo indo, meangkami Yesu hihimbela hai topeguruNa hangko i boea Kapernaum, lao i boea karapakahileaNa. 2 I Alo Penombaa, laomi i sou penombaa mepaguru. Bosa tauna tingkara mohadi paturona Yesu, hai rauli, “Hangko iumbari mai kapandeNa? Kapande apa au ara Iria? Hangko iumbari mai kuasaNa mobabehi tanda kuasa? 3 Ia ide basi pea, anana Maria. HalaluNa iamohe: Yakobu, Yoses, Yuda hai Simo. HalaluNa towawine, ara worihe hihimbela hai ikita inde.” Ido hai barahe mepoinalai i Yesu.
4 Hangko inditi, Yesu mololita i tauna bosa iti, Nauli, “Hadua nabi rabila iumba pea kalaoana. Agaiana ane i boeana haduduana hai i souna, hai i olonda halaluna, bara rabila.” 5 Inditi Yesu bara peisa mobabehi ngkaia tanda kuasa. Bahangkia pea tomahai au Natobo bona maohahe. 6 Tingkara mpuu Yesu moita kadanda mepoinalai Iria.
Yesu motudu topeguruNa mopahawe Ngkorana Pue
Roo indo, laomi Yesu molumaohi boea-boea au hungku inditi hai mopaguru tauna. 7 Ia mokakio topeguruNa au hampulo hai rodua, Natuduhe rorodua lao mobambari Ngkorana Pue hai Naweihe kuasa mampopeloho tokadake. 8 Hangko damanihe meangka, Napaturohe node, “Ineekau moanti apa-apa i polumaomi, batena pea lai. Ineekau moanti roti ba baku ba doi. 9 Peisakau mekandupa, agaiana ineekau moanti rontau badu.” 10 Nauli wori, “Ane hawekau i hambua boea hai arahe tauna au modokokau i sounda, maidamokau inditi duumi meangka lao i boea ntanina. 11 Ane ara ampu boea au barakau radoko ba au barahe madota mampehadingi lolitami, nipalehi boea iti, hai nitaronta awu au mentaka i palanta bitimi, iti tandana barapi ikamu au mohuru ane Nahukuhe Pue Ala.”
12 Karoona Yesu mopaguruhe topeguruNa au hampulo hai rodua, meangkamohe lao mopaguru tauna bosa bona menosohe hangko i dosanda. 13 Topeguruna Yesu iti mampopelohohe ngkaia seta au mampesuangi tauna, hai morirohihe tomahai hai lana mawongi pane maohahe.
Kapatena Yohane Toperiu
14 I tempo iti, Datu Herode Antipas mohadi apa au nababehi Yesu, lawi tebambarimi hangaNa iumba-umba pea. Ara au manguli, “Yesu iami Yohane Toperiu au tuwo hule hangko i kapate! Ido hai ara kuasaNa mobabehi tanda kuasa au metingkarai.”
15 Agaiana ara wori au manguli, “Yesu iami nabi Elia.”
Hai ara wori au manguli, “Ia hadua nabi, nodo nabi au hangkoia.”
16 Kanahadina Datu Herode bambari iti, nauli, “Manotomi iriko Ia iti Yohane Toperiu! Hangkoia kutudumi tauna mobohoki tambolona, agaiana ide-ide tuwo hule.”
17-18 Nodemi tuntukana kapatena Yohane Toperiu. Datu Herode moala Herodias napotambia. Herodias iti iami towawinena halaluna au rahanga Pilipu. Bosa belana Yohane mokambaroa Herode hangko i babehiana iti, nauliangaa, “Barako peisa mampotambia towawinena halalumu! Babehiamu iti moliungi Aturana Musa.” Ido hai Herode motudu surodadona lao mohaka Yohane, rataka hai rapopesua i lalu tarunggu. 19 I tempo iti, koi inaona Herodias i Yohane, ido hai napeinao napapate. Agaiana tunggaiana iti bara tepabukei, 20 lawi Herode motuduhe surodadona mokampai Yohane i lalu tarunggu. Herode bara bai mopapate Yohane lawi naisa kaiana tauna au manoto laluna hai malelaha tuwona. Ane mohadi lolitana Yohane, wuli mpuu laluna, agaiana matana wori laluna mohadi.
21 Hambela tempo ara katepakana Herodias. I tempo iti, Herode mobabehi posusa mokatuinao alo karapoanakana. Ia mokakio bosa tuana, tadulako hai topebuku i tampo Galilea. 22 I posusa iti, anana Herodias au towawine mesua hai motaro i lindo torare. Matana mpuu Datu Herode moita potarona anantowawine iti, hai nodo worihe torarena. Nauli Herode i anantowawine iti, “Apa au nuunde? Apa pea au nuperapi, ina kuweiko!” 23 Mewali mosumpami Herode, nauli, “Apa pea au nuperapi, mogalori hantanga hangko i poparentaku, ina kuweiko!”
24 Meangkami anantowawine iti lao mekune irinana, nauli, “Ina, apa au hangangaa kuperapi?”
Nauli inana, “Perapimide waana Yohane Toperiu!”
25 Roo indo, mesulemi lao i Datu, hai liliu nauli, “Ide-ide merapina waana Yohane Toperiu rawoli i wongko dula.”
26 Kanahadina Herode pamperapina, masusami laluna. Agaiana sumpana i anantowawine iti barapi peisa nadii hule, lawi mosumpami i lindonda torarena. 27 Ido hai liliu motudu hadua surodadona lao mangala waana Yohane Toperiu. Lao mpuumi surodado iti i tarunggu mobohoki tambolona Yohane. 28 Hai waana naanti i wongko dula nahuhua anantowawine iti, hai anantowawine iti moanti irinana. 29 Karahadina topeguruna Yohane apa au mewali iti, laomohe mangala watana Yohane hai ratawu.
Yesu mopaande lima sabuna tauna
30 I pesulenda suro au natudu Yesu lao mobambari Ngkorana Pue Ala, rapahawemi i Yesu ope-ope au rababehi hai au rapaturoa tauna bosa. 31 I tempo iti, bosa mpuu tauna mombehuru-huru mai i Yesu, alana barapohe tepaka maande. Ido hai nauli Yesu i topeguruNa, “Agina laoke i paidaa au boa mopalehike tauna bosa bona mengkarooke sangka.” 32 Mewali, mesawimohe i duanga lao i paidaa au boa.
33 Agaiana raitari bosa tauna kapadunda, hai raisa wori iumba kalaoanda. Mewali, melangkamohe tauna hangko i ope-ope boea au hungku laohe i wiwi rano, alana ihirari au ioru hawe pane Yesu hai topeguruNa. 34 Pendauluna Yesu hangko i duanga, moita mbulimi bosa tauna mepegia. Maahi laluNa moitahe, lawi nodohe dimba au bara raporewu. Mewali napepongkami Yesu mopaguruahe mampopengaa paturo.
35 Ina tampumi alo, laomohe topeguruNa mohungkuki Yesu, rauliangaa, “Guru, ide paidaa au boa, hai ina tampumi alo. 36 Agina Nutuduhe tauna bosa ide lao i boea au hungku bona moholohe paandenda inditi.”
37 Nahanai Yesu, Nauli, “Ikamu womia au mopaandehe.”
Rahanai topeguruNa, rauli, “Apamohe pae au kiwei? Mogalori rongatu doi pera, bara handa tapopeholo roti tapopopaandehe tauna au node kabosanda.”
38 Nauli Yesu, “Nipeita, hangkia oguna roti au ara irikamu?”
Karoona rapeita, rauli, “Lima pea oguna roti hai ara rombaa ikane.”
39 Hangko inditi, Yesu motuduhe tauna bosa mohuda motobu-tobu i wongko hehi. 40 Mewali mohudamohe motobu-tobu, ara au hangatu, ara wori au lima pulona.
41 Roo indo, naalami Yesu roti au lima oguna hai ikane au rombaa iti, mengoa i langi mekakae i Pue Ala. Roo nodo, mobise-bisemi roti iti, pane Naweihe topeguruNa bona rakira-kira i tauna bosa. Hai ikane au rombaa, Nakira-kiraa worihe ope-ope.42 Maande hahamohe duunda mabuhu.43 Karoonda maande, topeguruna Yesu moguluhe pentarana, hampulo mani hai rombingka.44 Kabosanda au maande i tempo iti, ba aratohe pae lima sabuna tobalilo, barahe teimba towawine hai anangkoi.
Yesu molumao i wongko owai
45 Roo indo, Yesu motuduhe topeguruNa moduanga moioru lao i boea Betsaida ntanda i orupena rano. Yesu motuduhe tauna bosa mesule, 46 hai mepalakana worimi irihira. KarooNa mepalakana irihira, mempanaimi Yesu i bulu lao mekakae. 47 Laembengimi, topeguruNa i tanga ranomohe. Agaiana, Ia ara mani i lore haduduaNa. 48 I tempo iti, Yesu moita topeguruNa au tanganda moduanga i rano, mapari rahadi mobohe, lawi himburu mewui mai hangko i lindo duanganda. Hungku mabaa, Yesu molumao i wongko owai monontohihe, nodohe ina Napehindorungi. 49 Karaitana topeguruNa ara tauna au molumao i wongko owai, monganga-ngangahe anti kalanganda, rauli, “Tanoana, tanoana!”
50 Langamohe moita Ia.
Liliu nauliangaahe Yesu, “Pakaroho lalumi! Ikoto dide! Ineekau langa.”
51 Roo indo, mesawimi Yesu i duanganda, liliu himburu kebuu iti mengkaroo. Rumihi mpuu katingkaranda hai wulihe.52 Lawi kehapi bara manihe mahae moita tanda kuasa au Nababehi hai roti inona, bara mani liliu manoto i lalunda kahemana mpuu Yesu. Batena mani bata-bata lalunda mepoinalai Iria.
Yesu mopakaoha bosa tomahai i Genesaret
53 Kahawenda ntanda i orupena rano Galilea, mengkaroomohe i tampo au rahanga Genesaret. 54 Pendaulunda hangko i duanga, ampu boea moita kaYesuna au hawe i tamponda. 55 Melangkamohe lao i boea-boea au hungku, hai ope-ope tomahai raanti lao i Yesu. Iumba pea kaarana Yesu rahadi, inditimohe tauna moanti ranganda au mahai. 56 Iumba pea kalaoana Yesu, i boea mahile ba i boea au kokoi, moantihe ranganda au mahai rawoli i pobalu-balua, pane merapihe i Yesu bona Ia peisa ratobo, nauri wuntu baduNa pea. Hai ope-ope au motobo baduNa, liliu maoha mpuumohe.