<<    <     Markus     1     >    >> 
Ngkora Marasa au nauki
Markus
Pobagona Yohane Toperiu
1
1 Idemi Ngkora Marasa, tuntukana katuwona Yesu Kerisitu, Anana Pue Ala. 2 Tuntukana mepongka hangko i kahawena Yohane Toperiu. Kaina hawena Yohane iti, napahawemi nabi Yesaya hangkoia. aI lalu surana Yesaya, Pue Ala mongkora node,
“Idemi suroNgku
au Kutudu moioru hangko Irio,
bona mopasilolonga raraMu.”*
3 “Iami au monganga-nganga i pada wungi, nauli,
‘Ina hawemi Pue!
Nipasilolonga raraNa.
Nipakanoto rara au ina Napoliungi.’ ”*
4 Moula apa au teuki iti, hawe mpuumi Yohane Toperiu i pada wungi. Ia mopahawe Ngkorana Pue Ala i tauna bosa, nauli, “Menosomokau hangko i dosami bona naampungikau Pue Ala hai maimokau kuriu.” 5 Bosa tauna au hawe mampeinao mampehadingi lolitana. Arahe au hangko i wanua Yerusale hai hangko i humalele tampo Yudea, maihe mopangaku dosanda hai nariuhe i owai Yarade.
6 Hampina Yohane hangko i wulu onta. Pampouna hangko i koli. Paandena kakomba hai tinaha. 7 Yohane mopahawe bambari ide, “Ina hawe hadua tauna au meliu kuasaNa hangko iriko. Mokakahi pea pekapu kandupaNa, barana hintoto. 8 Kuriukau hai owai, agaiana Ia ina moriukau hai Inao Malelaha.”
Yesu nariu Yohane hai nakelo Datu Tokadake
9 I tempo iti, Yesu hangko i boea Nasare lao i tampo Galilea, hai nariu Yohane i owai Yarade.10 Pesorena Yesu hangko i owai, Naitami langi tebungkahi hai Inao Malelaha nodo tadasi manggebodo mendaulu Iria.
11 Roo nodo, rahadimi wotuna Pue Ala hangko i langi au manguli, “Oiomi AnaNgku au Kupokakaia hai Kupokatana.”
12 Roo indo, Inao Malelaha moanti Yesu lao i pada wungi.
13 Ia maida inditi iba pulona alona, kamahaena, i olonda binata maila, hai nakelo Datu Tokadake. Hai Ia rarora malaeka.
Yesu mokakio iba topodala meula Iria
14 Bahangkia kamahaena hangko inditi, rahakami Yohane Toperiu hai ratarunggu. I tempo iti, laomi Yesu i tampo Galilea, hai mopahawe Ngkora Marasa hangko i Pue Ala, 15 Nauli, “hawemi tempo au napakanoto Pue Ala; poparentaNa ina hawemi! Menosomokau hangko i dosami hai nipoinalaimide Ngkora Marasa.”
16 Hambela tempo, tangaNa Yesu molumao i wiwi rano Galilea, Naitamohe rodua tauna, iamohe, Simo hai Andaria adina. I tempo iti, tanganda modala i rano, lawi itimi bagonda. 17 Nauliangaahe Yesu, “Maimokau hai meulakau Iriko! Barapi ikane au nidala, agaiana manusiami.” 18 Mewali rapalehi mpuumi dalanda, hai mepongka alo iti, meulamohe i Yesu.
19 Roo indo, napaliliu Yesu polumaoNa, hai Naita mbuli rodua topohalalu, iamohe, Yakobu hai Yohane, ananahe Sebedeus, au tanganda mopakaroa dala i lalu duanga. 20 Yesu mokakiohe bona meulahe Iria. Mewali, rapalehimi umanda i lalu duanga hihimbela hai topobagona, liliu meula worihe i Yesu.
Yesu mopakaoha tauna au napesuangi tokadake
21 Hangko inditi, Yesu hai topeguruNa laohe i boea Kapernaum. I Alo Pengkarooangaanda to Yahudi, mesuami Yesu i lalu sou penombaa hai mepongka mepaguru. 22 Tingkaramohe tauna au mohadi paturoNa, lawi pepaguruNa bara nodo guru-guru agama. PepaguruNa, nodo tauna au makuasa ntepuu.
23 I tempo iti, ara wori inditi hadua tauna au napesuangi hai monganga-nganga, nauli, 24 “Ee Yesu to Nasare! Ina Nupoapangkai? Ba ina Nupakarugingkai? Kuisa kaOiona mpuu Suro au malelaha hangko i Pue Ala.”
25 Agaiana nakambaroa Yesu, Nauli, “Mandiiko! Pelohomide hangko i tauna iti!” 26 Tokadake iti mampoporada-rada tauna iti, monganga-nganga hai meloho.
27 Tingkaramohe ope-ope tauna au moita iti, hai molololitahe, mombekune hadua hai hadua, rauli, “Apa wei dide? Ide paturo wou, hai tauna ide makuasa ntepuu! Mogalori tokadake, mampeulaihe hawaNa!”28 Hangko inditi, bambari kana i Yesu rapahawemi i humalele tampo Galilea.
Yesu mepakaoha
29 I pesulenda hangko i sou penombaa iti, laomi Yesu i sounda Simo hai Andaria. Yakobu hai Yohane meula worihe. 30 Inditi, pengantina Simo au towawine maturu lawi napawembe. Kamahaina iti rapopaisaa Yesu. 31 Roo indo, laomi Yesu mampeita pengantina Simo i paturuana. Nakingkimi taiena hai Napopearo. Liliu maoha, pane towawine iti mororahe Yesu hai topeguruNa.
32 Kalumbami, i katampuna alo, ope-ope tomahai hai au napesuangi tokadake raantimohe i Yesu. 33 Bosa ampu boea moteruhu i tabangaa souna Simo. 34 Bosa tauna au Napakaoha hangko i hakinda au mampopengaa. Ngkaia wori tokadake au mesua i tauna napopeloho Yesu; barahe Napaliu mololita, lawi raisa mpuu kahemana Yesu.
Yesu mepaguru i boea ntanina
35 Kahalona, hungku mabaa, mearomi Yesu hai padu hangko i boea iti lao mekakae haduduana i paidaa au boa.36 Simo hai rangana laohe mohaoki Yesu. KaralambiNa peami liliu rauliangaa,37 “Guru, bosa tauna mohaokiKo.”
38 Agaiana nauliangaarihe Yesu, “Laomoke i boea ntanina au hungku bona mopahawe woriNa Ngkorana Pue Ala inditi. Lawi itimi tunggaiaKu mai i dunia.” 39 Ido hai laomi Yesu mobambari Ngkorana Pue Ala i ope-ope boea i tampo Galilea hihimbela hai topeguruNa. Ia mepaguru i sou penombaa au ara inditi, hai mampopeloho tokadake au mesua i tauna.
Yesu mopakaoha hadua tauna au ketangga
40 Ara hadua tauna au ketangga au mai molingkudu i lindona Yesu merapi tulungi, nauli, “Kuisa kaNubukuna mopakaohana. Ane Nupokana Nupakaoha wongkoia!”
41 Ido hai maahimi laluna Yesu moita tauna iti. Mewali Napetobomi hai Nauliangaa, “MauNa. Maohamoko!” 42 Unga pea matanta hakina, hai maohami. 43 Roo indo, natudumi Yesu bona padu, hai Nauliangaa, 44 “Inee nupopololita i hema pea apa au mewali inona. Laomoko hampai nupetudungia watamu i tadulako mpenomba, bona naita kamaohamumi, hai moantiko popenombamu moula parenta au teuki i lalu Aturana Musa, bona tongawa i ope-ope tauna kamaohamumi.” 45 Agaiana, iumba pea kalaoana tauna iti, napololita liliuri kanapakaohana Yesu, alana Yesu barapi peisa mesua i lalu boea iti tontolea dati ratoleliki tauna. Ido hai Yesu maida pearai i raoa boea i pada wungi. Agaiana nauri nodo, bosa liliuhe tauna au hangko i boea-boeana mampeinao mampohidupaa Yesu.