मरकुस 4

तो फाशु खाड़ीई मेरे हीकाडूहु लाग्यु आना एहली वोडी गोर्दी त्याआ आहने टोलवात गोई का तो खाड़ी मेहे एक नावीपोओ चोढीत बोहीत गोयू आना आखी गोर्दी पुईपोओ खाड़ीई मेरे उबी रोई 2 फासाड़ी तो त्याहा दाखले आपित खूप गोठी हिकवीही लागीलाएने हिकालीआ त्याहा कोल्यो , 3 उनाआ , पाला , एक पेअनारू पेईलो कोईलाकाजे निघाल्यू 4 आना तो आरित ओतलू किबी बी वाटेपो पोडये आना सिडे आविलो ती बी खात गोयी, 5 थोड़े बी वातडो धरतीपो पोड्यी एहलो जाग्तली का काडूव जाखो नाहाओती ती बी वेगु उगविह्यी 6 आना जाहा दिह उगीअलो तेहालाम पाअया न तोअल्यावांही ती कोंब वेगु उगाईत गोयी 7 थोड़े बी काट्यामेहे पोडये ती उगविह्यी परंतु काट्यांमुळे त्याआ वोद खुटयी कोईत त्याहा ओन आव्ये नाहा 8 थोड़े बी हाजा धरतीपो पोडये त्याआ हाजी वोद उवी त्याआ ओन आव्ये त्याआ तीस गुणा, साठ गुणा आना होव गुणा फोल आव्ये 9 फाशो येशूने कोल्यो , “ज्यापो कान होय तो उनाआ ”, 10 ताहा जेव्हा येशु एखल्यू ओतु ताहाती जागापो त्याजागे बारा शिष्यानी जे माहे ओते तिये याआ दाखल्याविषयी फ़ुस्ल्याआ 11 येशु त्याहा कोल्यो , "तुम्हामे ताहा परमेश्वराआ राज्याआ निकाडीत सांगण्यात तुम्हामे आपिलू होयततांहु बारथेए माहुंहु उदाहरण आपित सांगण्यात येत 12 याकोअता का तिये पालीत लेदलेए पण देखायअलो कायना आना उनाईत लेदलेए पण कोड्वो कायना त्याआ मोनाआ पालट ओवुहू कायना आना तिये क्षमा मिलू कायना 13 तो त्याहा कोल्यो , “जर तुमु आव दाखलाहा होमाजाडीत नाहा ताहा फासाड़ी कोडोबीही दाखल्याविषयी केहलो होमजुत्लू”? 14 खेतीकोअनारू जो बी पेअत्लू ते म्हणजे वचन पेअत्लू 15 वाटेपो वचन पेहे जाहो तीही माहे ओ होय का जे वचन उनाईत लत्ले पण लागेज सैतान आविलो त्यामेहे वचन बुअसित लेहो 16 आना किबी माहे एहलो होय का ते खोड्कावलो धरतीपो पेअल्ये वचनाहोस , जेव्हा ते वचन उनाईत रोतेहे आना लागेज आनंद लत्ले 17 पोन त्यांम पाअया नाहाहोल्कोइत्ते ते किबी वेल वचनोम स्थिर रोत्ले आना त्याआ फासाड़ी जाहा वचनावांही त्यांपो संकट येत आना त्रास उवनारा रोतो तेहालाम लागेज ते आपाआ विश्वास सोडीत आपत्ले 18 आना बिहरे माहे एहलो होय का जे काट्यामेहे पोड्ल्ये बी सारखो ते ओ माहे होय का ते वचन उनाईत लत्ले 19 पोन जीवनोमे चिंता धन, पोशा याआ लालुसापणावाही आना बिहरि वस्तु जोडयो कोअला इच्छा यामे ओते आना ते वचनाआ दाबीन टाकत्ले त्यापोत वाचनामे फोल आवीत नाहा 20 आना किबी माहे तियाअ बी प्रमाणोओ होय जे बी हाजा धरतीपो पोडत्ल्ये , ते ओ माहे होय का वचन उनाईत आना मनन कोअता त्यांमे फोल येत ते तीस पट्ट साठ पट्ट आना होव पट्ट पेक्षा ए जाखा येत 21 आना तो त्याह कोयो दिवाही याकोअता लेत आवत्ले का त्याहा मापोनिसे का खाटलाआ नीसे नाहा ते उसे मेकीलाकोता लाविलो नाहा? 22 काहाके किबी एहलो किबी निकाडीत नाहा का ते उघडकीस आविलो नाहा आना किबी प्रसिद्ध ओवुहू कायना एहलो निकाडीत नाहा 23 कोडाआ कान होय ताहा उनाआ 24 फासी तो त्याहा कोल्यो , जे किबी तुमु उनाईत त्यापो तुमु ध्यानपूर्वक फूस कोआज्या मापोवांही तुमु दिहीराहा आपहा त्याआ मापोवांही तुम्हामे आपिलू जाइअलो परंतु तुम्हामे जास्तीभी आपिला आवे 25 ज्यापो होय त्याहा आपिलू जाइअलो ज्यापो नाहा त्यांही जे किबी होय ते त्याहाभी मागित लेधलो जाइअलो 26 फासी तो कोल्यो परमेश्वराआ राज्य एहलो होय का जेहलो कोडु माहुहू आपाआ खेतुम बी पेअत्लू 27 राती हुव्यू आना दिहे उठ्यू आना तिये बी उपो कोंब आवल्या पालील्यो ते केहलो उवे ते त्याहा मोलुम नाहा 28 जमीन आपोआपो ओन आपोहो पल्ले कोंब फासाड़ी कोहो फासाड़ी कोहमेऱ्या पोअल्ये दाने 29 ओन तीयार उवेताहा तो लागीगोयो दात्लू काल्त्लू, काहाके वाडीलाआ वेल आवयी होय 30 फासी तो त्याहा कोल्यो , “आपु केहलो कोहू शकतो का देवोओ राज्य केहलो होय ? अथवा ते कोडला दाखलाम मांडाजी”? 31 ते मोहरी दाणाहोस होय तो जमिनोम बापसआविलावेले पृथ्वीपो आखे दान्यापोरोत हानू एह्लू, 32 तेबी पेरल्यापो उगडीत आखे झाडापालामेहे वोडू ओतू आना त्याहा एहलो वोडवोडा लोगी फुटत्ले का त्याआ सावलाम वस्ती कोअता येत 33 एहलो खूप दाखले आपित तो त्याहा वचन कोल्यो एहलो तो त्याहा त्याआ ग्रहण शक्तीवही कोल्यो एहलो 34 आना दाखल्यावाचून तो त्याहा किबी कोल्यो नाहा परंतु जेव्हा तो आपाआ शिष्याआरित रोतत्त्लो तेहालाम त्याहा आखे किबी होमजाडीत कोल्यो एहलो 35 त्याआ तेदीही जेव्हा हांजेपो उवी येशु त्याहा कोल्यो चाला आपु तिवोल जाऊ 36 आना ते ती गोर्दी सोडीत ते नावीपो जेहलू तीही ओतु तेहलूज त्याहा लेत गोये आना बीहरयु नाव बी ओत्यु 37 ताहा वोडो वादोल उठो आना लाटावाही नावीमेहे पाई पोअहू लाग्यो 38 फासाड़ी येशु नावेए फासाडीई भागुम उशास लेत निंदेम गोल्यो ओतु तेहालाम त्याहा ते जागतू कोईत कोल्यो , गुरुजी आपु बुडूहु बाजीत रोल्या होय आना आपाआ नाश उवनारू होय ? 39 तिये त्याह कोल्यो उबु रोला तिये वाराहा धोमकाव्ये आना लाटांना कोल्यो ठावकू रो , ठावकू रो तेहालाम वारू पोडीत आना अगदी निवांत उवे 40 फासी येशु त्याहा कोल्यो , "तुमु काहा बिकर्या? तुम्हामे ओमेजा विश्वास नाहा नाहाकोत? 41 आना ते जास्तीज बितगोये ओते आना आपसामेहे एकाबिहराहा कोल्यो , "ओ होय तेबी कोडू का वारू आना पाई बी याआ उनाईत लेतेहे?".