मॅथि 25

ताहा होरर्गाआ राज ती दोह कुवारी ई होस होय ज्या आपाआ दिवु लेत वोवड़ा हा भेटा हु कोअता निहु 2 त्यामे पाच फोगु आना पाच हुशार ओत्यु 3 काहाके फोगु कुवारिनी दिव लेदो तेहालाम तिये आपाआरी तेल लेधलो नाहा 4 पण ज्या हुशार कोल्यू तिये आपाआ दिव्याआरी बाटलीम तेल पण लेधलो 5 जेव्हा डोहाहा आविलो वाअ पोयो ओतु तेहालाम ते आखे हुवीत गोये 6 पण आर्दी राती आवाज माइहि का पाला माटी आवीत होय त्याहा मिलनेकोता साला 7 तेहालाम तियाअ आखे कुवारी आविलो बोहोल्या आना आपाआपा दिवे व्यवस्थित कोहू लाग्या 8 आना फोगु कोल्यू तियाअ हुशार कोल्यू त्याहा कोतल्या आहामाहाबी तुमाआ तेलोमेऱ्या थोडूज दया काहाके आमुहू दिवे ओमे उलवीत जानारू होय 9 पण हुशार कोल्यू तिये उत्तर आपिलू नाहा ओ तुम्हाकोअता आना आमच्यासाठी उरीलो नाहाहोज उवे का तुमु दुकानदाराआपो जात तेल वेसातो लाविलो 10 जेव्हा ते वेसातो लेई निहित गोये तेहालाम माटी आविलो गोल्यो आना ज्या तीयारिमे कोल्यू तियाअ त्याआरी वेहवालोम निहित गोयी तेहालाम दरवाजू बंद कोईत आप्यू 11 माटी ते फोगु कुवारी आविलो कोहू लाग्या मालिक, आमाआ कोअता बी दरवाजू उगाडीत आप 12 पण तिये उत्तर आपिलू आय तुमुह खोरोज कोतलू आय तुमुह ओलखीतू नाहा 13 त्यापोत जागतू रो काहाके तुम्हामे तो दीही आना तो समय पण मोलुम नाहा 14 फासाड़ी ओ तिया मांहाहोस होय जो प्रवासाम जानारू ओतु आना जीआ आपाआ नोकराहा हादीत आपाआ धनदौलत होफहोपिन आप्यी 15 तिये एकाहा पाच हजार, दिहीराहा बेन हजार आना तिसराहा एक हजार म्हणजे प्रत्येकाआ लायकीहोस आपिलू आना प्रवासाम निहित गोल्यो 16 ज्याहा पाच हजार रुपये आपिलू तिये लागेज जात व्यापार कोल्योओ आना तीयावाही पाच हजार फासी जुळाविते 17 ह्याप्रमाणे ज्याहा बेन हजार आपिलू ओते तिये पण ऐहलेच बेन हजार फासी कोमाविले 18 पण ज्याहा एक हजार रुपये जोडयेहे ओते तिये जात जमीन खोदिली आना आपाआ मालक्योहो आपले पोशाआ तीयाम निकाडीत मेकअलू 19 “जाखो दिहीआ फासाड़ी तिया पावरोओ मालक आवयू आना त्याआ हिशोब लेई लाग्यू ” 20 तेहालाम ज्याहा पाच हजार जोडयेहे ओते तिये फासी पाच हजार लेतआवीत आपिलू आना कोल्यो, “मालिक, तू माहु पाच हजार आपिलू ओते , देखू तीयावाही आय फासी पाच हजार कामावोह्यो” 21 त्याआ मालक्योहो कोल्यो , शाब्बास, माआ हाजा , विश्वासु पावोरआ, तू जराक गोठीपो विश्वास योग्य रोला, आय ताहु खूप वस्तुपो अधिकारी बोनवीही आपाआ मालकाहा आनंदाम सहभागी होय 22 फासाड़ी ज्याहा बेन हजार रुपये जोडयेहे ओते तो पावर आविलो कोल्यो , मालिक, तू माहु बेन हजार रुपये आपिलू ओते , देखू आय त्याआपो फासी बेन हजार रुपये कोमाविले" 23 मालिक त्याहा कोल्यो , “शाब्बास, हाजा आना विश्वासाजोगो पावोरआ, तू जराक गोठीपो विश्वास योग्य रोला, आय ताहु खूप वस्तूंऊ अधिकारी बोनिडीओ आपाआ मालक्योओ आनंदाम सहभागी होय ” 24 फासाड़ी ज्याहा एक पोशाआ मिल्यू ओतु तो आपाआ मालकोहू आविलो कोल्यो , “ओ मालिक, माहु मोलुम ओते का , तू कडक माहुहू होय , जीही पेईलो कोईत नाहा तिंही वाडीलो कोअता” आना जीही फैलीत नाहा तीइही एखटो कोअता 25 आखरी आय घाबरील्यो गोल्यू आना ताआ रुपयाला आय जमिनोम निकाडीत आपिलू, पाला , जे तांआ होय ते घेऊन ले 26 पण त्याआ मालक्योहो उत्तर आपिलू, 'ऐ दुष्ट आना आळशी पावोरआ, ताहु ओ मालूमे ओते का जीही आय पेईलो कोईत नाहा तीइही आय वाड्तुलू आना जीही फैलावीत मेक्ल्ये नाहा तिहीरोत एखटो कोअत्लू 27 ताहा फासाड़ी माआ धन माहु सावकारापो मेकुहू जोवे ओते , म्हणजे आय आवेताहा माहु व्याजासकट फासी जोडयेहे ओते 28 ताहा यापोरोत ते हजार रुपये ल्या आना ज्याआपो दहा हजार होय त्याहा आपित दया 29 काहाके ज्याआपो होय त्याहा फाशी आपिला आवे आना त्याआ त्याही जास्तीज ओतगोल्यु जाइअलो पण ज्याआ जागे नाहा त्याआ त्यापोरोत ते पण लेधलो जाइअलो जे त्यांही होय 30 आवा बिनकामो नोकराहा बारथेए आदाराम टाकीत दयाजिहि रोला आना दात साविलो होय 31 पण माअहा पोऱ्या आपाआ गौरवात आविलो आना आखे देवदूत पण त्याआ आरी आविलो तेहालाम तो आपाआ महिमामय राजासनापो बोहोनारो 32 आना आखे जाती त्याआ आगाडी एकठे कोअलाआ आवे आना तो त्याहा एक बिहीरा त्यापोरोत जुदो कोआ जेहलो मेंढवालो बोकडाहा मेंढरापोरोत जुदो कोअत्लू 33 तो मेंढराना आपाआ हाजावोगे आना बकऱ्यांआ डावासाईटोहो कोअही 34 तेहालाम राजा आपाआ हाजला आथावोगऱ्याहा कोय, ओ माआ आबुहुहू धन्य माहुमे, आव, तियाअ राज्याआ अधिकारी बन्यो जो जुगाआ पेलेरोत तुम्हाकोअता बनविल्यो होय 35 काहाके आय बुख्यो ओतू आना तुमु माहु खाहुं आपिलू आय तीह ओतू आना तुमु माहु पाई पिवाल्यो आय बिहरादेशोआ ओतू आना तुमु माहु कोअमे राख्यो 36 आय उघडा ओतू तुमु माहु आगडे पेआडे आपिलू आय मांदवाड्यू ओतू तेहालाम माआ सेवा कोअयी आय बंदिकोओमे ओतू तेहालाम तुमु माहु मिलीला आव्ये 37 तेहालाम धोर्मी त्याहा उत्तर आपी, प्रभू आमुहू ताहु कोंयो बुख्यो पालल्ये आना रोटू आपिलू? किंवा तोर्ह्यु पाल्यू आना पाई पिवाल्यो आना 38 आमु ताहु कोंयो बिहरादेशोआ पाल्लये आना कोअमे मेकल्ये? किंवा उघडा पाल्यू आना आगडे काटाआ 39 आमु कोंयो ताहु मांदवाड्यू किंवा बंदिकोओमे पाल्लये आना मिलीला आव्ये 40 यापो राजा त्याहा उत्तर आपी, आय तुम्हामे खोरोज कोतलू का जे किबी तुमु माआ आव हाणाम हानू पाहीमोरोत एकाआरी कोल्यु ते माआरी कोल्यु होय 41 तेहालाम तो बांगाडू बाजूवाला कोअही ओ शापित माहुमे मापोरोत सेटे ओतगोल्यु तियाअ अनंत आगीम जात गुगदा जे शैतान आना त्याआ दूतांसाठी तीयार कोल्यु होय 42 आय बुख्यो ओतू तेहालाम तुमु माहु किबी खाहुं आपिलू नाहा आय तीह ओतू तेहालाम माहु पाई पिहीलेपोत आपिलू नाहा 43 बिहरादेशोआ ओतू तेहालाम तुमु माहु आपाआ कोअमे मेकल्ये नाहा उघडा ओतू तुमु माहु आगडे कालीला आपिलू नाहा मांदवाड्यू ओतू आना बंदिकोओमे ओतू तेहालाम तुमु माहु मिलीला आव्ये नाहा 44 आव उपो ते त्याहा फुसनारू प्रभू आमुहू कोंयो ताहु बुखो, तोर्ह्यु, उघडा किंवा मांदवाड्यू किंवा बंदिलखानो पाल्यू ओतु आना ताआ सेवासाकरी कोअयी नाहा 45 तेहालाम तो त्याहा उत्तर आपी आय तुम्हामे खोरोज कोतलू का जो तुमु याआ हाणाम हानू मायारोत एकाआरी कोल्यु नाहा ते माआरी कोल्यु नाहा, 46 ओ मांहे अनंत कालिक दंड भोगणार पण धोर्मी अनंत जीवनामे प्रवेश कोअनारू.