मॅथि 15

ताहा यारुशालेमेहे काही परुशी आना शास्त्री यीशु उ आहाने आवित कोहू लागे 2 तांआ शिष्य पूर्वजांआ परंपरेआ काहा उलघना काहा कोअता? ते भाकर खाआलावेले आथे तुवीत नाहा 3 तिये उत्तर आपिलू, आपाआ परंपराकोता तुमु स्वतः परमेश्वराआ आज्ञेए उलघन काहा कोअता? 4 काहाके परमेश्वराने कोल्यो होय , आपाआ आयहिआबहाआ सन्मान कोएने जो कोडु आबहाहा आना मायला वाईट कोअही त्याहा माईत टाक्ये जाइअलो 5 पण तुमु कोल्यो होय का जर आपाआ आबहू आना मायला कोअही तुम्हामे जो माआरी जे पण आण्यो भाग होय आप देवोहो अर्पण कोल्यु होय 6 ताहा त्याहा आपाआ आबहू माय चा सन्मान कोअला गोरोज नाहा आना याकोईत तुमु परंपराकोता परमेश्वराआ वचनाआ व्यर्थ कोल्यु होय 7 " ओ ढोंग्याहोस, यशयाहि तुम्हबारमे ओ भविष्य आरीआरीज कोल्यु होय 8 ओ मांहे ओठेवाही ताहा माआ सन्मान कोअता, पण त्याआं मोनाहा मारोत सेटे होय 9 ओ व्यर्थ माआ सेवा भक्ती कोअत्लेएन माअहा शिक्षणाला धर्माआ नियम बोनाडीत हिकत्ले 10 तिये गोर्दी आपाआ जागे हादीत त्याहा कोल्यो, उनाआ आना सोमजा 11 जे सोबिम जाहो ते माहाहू अशुद्ध कोईत नाहा पण जे सोबिमरोत निह्तले ते माहाहू अशुद्ध कोअते 12 तेहालाम शिष्यांनी आविलो त्याहा कोल्यो , नाहाकोत ओ तू मुदुह काहा? का ओ उनाईत परुसी रागाकोहे 13 पण तिये उत्तर आपिलू, हरएक साड ज्याहा माआ होर्गाआ आबहे लागाडले नाहा उपटीत टाक्ये जाइअलो 14 त्याहा रोहू दया ते आंधले मार्ग देखाड्यो होय , आना आदोलो आंधला मार्ग देखाडीही ताहा बेन खाडाम पोअनारू 15 पेत्राई कोल्यो , ओ उदाहरण आमुहू होमजाडीत आप 16 तिये कोल्यो , नाहाकोत तुम्हामे पण ओमेजा होमज्ये नाहा? 17 नाहाकोत तुमु होमाजाडीत नाहा काहा का , जे सोबिम जाहो ते पोटाम जाहो आना शौचकुपात टाकिला येत 18 पण जे सोबिमरोत बारथे निह्तले आना तोच माहुंहु अशुद्ध कोईत ओते 19 काहाके मोनामेहेरोतुच वाईट विचार खून व्यभिचार, जारकर्मे, चोरी , झूठी साक्ष आना निंदा ए निह्तले 20 याआ त्याआ गोठी होय ज्या माहाहू अशुद्ध कोअता, पण आथे तुवल्याशिवाय रोटू कोअला माहुंहु अशुद्ध कोईत नाहा 21 येशु तिहीरोत निहित सोर आना सिदोन प्रदेशाम निहित गोल्यो 22 आना पाला , तियाअ प्रदेशाआ एक कनांनी बाय आवयी, आना आयडीत कोडु लागीई ओ प्रभू दाविदाआ पुत्रा, मापो दया को माआ पोऱ्यी वाईट प्रकारे खराब आत्मावांहि पीडी होय 23 पण तिये तीही किबी उत्तर आपिलू नाहा शिष्य त्याजागे आविलो कोहू लागाडीत , यीही सेटे कोईत आप , काहाके ए आअडित आम्हा फासाडी लागीई होय 24 पोन तिये तीही उत्तर आपिलू, माहु फक्त इस्रायेल गोमेर्योत ताकालाआ मेंढरापोरोत मोकोल्या होय 25 पोन ती आवयी आना कोहू लागीई, प्रभू माहु मदत को 26 तिये तीही कोल्यो , पोऱ्याआ भाकर घेऊन कुत्र्यांपुढे टाकिलो योग्य नाहा 27 यापो तियाअ बाईने कोल्यो , होय , प्रभू, पण कोओहु हुनेभी मालकाहा टेबलापोरोत पोड्ल्ये चूर खातले 28 तेहालाम येशूने कोल्यो , 'ओ बाय , ताआ विश्वास वोडू होय , जेहलो ताहु लागेहे तेहलूज ताकोअता ओवो, तीआ पोऱ्यी लागेज हाजी ओतगोल्यु गोयी' 29 तिहीरोत आगाडी येशु गलालीच्या समुद्रकिनाऱ्यापो गोल्यो, तिंही डोगोपो सोडवीत बोहित गोल्यो 30 आना वोडू लोकसमुदाय त्याआ जागे आव्ये आना ते आपाआ आरी लेगडे लुले, आंधले, मुक्कु, आना खूप बिहीरामांहुंहु घेऊन आव्ये आना त्याआ गुडाजागे मेकीत आपिलू, आना तिये त्याहा हाजो कोल्यु 31 त्यापोत जेव्हा गोर्दी पालील्यो का मुक्कु गोगत्ले, लुले हाजो उवे, लेगडे सालतेहे, आंधले पालल्ते ओ पाल्हू मांहे आश्चर्यचक्कीत ओतगोल्यु गोये आना तिये इस्त्राएलआ परमेश्वराआ स्तुती कोअयी 32 येशूने आपाआ शिष्यांआ जागे हादीत कोल्यो , माहु आव माहाहूपो दया आवयी होय काहाके ओ मांहे तीन दिहीरोत माआरी होय आना यांआरी खाहुं किबी नाहा माहु त्याहा पुखे मोकलीलो नाहा एहलो उवूंहू नाहा का ते वातीमेज कोमाईलाहोस ओतगोल्यु जानारू 33 शिष्यांनी त्याहा कोल्यो आमुहू आव जंगलूम एहलो वोडो माहुगोदीही तृप्त कोइलाकोअता एवढया जाखो रोटा कोठे जोडनारू 34 शिष्यांनी त्याहा कोल्यो , तुमापोओ केतो रोटा होय ? तिये कोल्यो , सात रोटा आना थोडोज हानू मासे होय 35 ताहा तिये माहुगोदीही धरतीपो बोहीलाआ आज्ञा कोअयी 36 ताहा तिये सात रोटा आना थोडोज मासे ओते ते लेधलो आना धन्यवाद आपित ते तोड्या आना शिष्यांआ दयायआ सुरवात कोअयी आना शिष्यांनी माहाहू दयायआ सुरवात कोअयी 37 ते आखे खात तृप्त उवे आना तिये उरील्योओ तुकडाकोईत सात टोपल्या बोल्या विश्या 38 आना ते आखे खादे, त्यांमे बोईही आना पोऱ्याहा सोडीत च्यार हजार माहुहू ओते 39 ताहा गोर्दी खोबोर आप्यू आना मोकलित आपित तो नावूमे सोडवीत गोल्यो आना मगद्दनाहा भागुम आवयू.