เอเฟซัส
บทนำ
เปาโลเป๋นผู้เขียนจดหมายฉบับนี้ ต้านเขียนขึ้นประมาณปี๋ ค.ศ. 61 ในหละหว่างนั้นต้านติดคอกอยู่ตี้กรุงโรม จดหมายฉบับเอเฟซัส ฟีลิปปี โคโลสีกับฟีเลโมน ต้านก็เขียนขึ้นหละหว่างนั้นตวย ย้อนจาอั้นจดหมายหมู่นี้บางเตื้อก็ฮ้องว่า จดหมายจากคอก เปาโลติดคอกอยู่ตี้กรุงโรมก็ย้อนบอกข่าวดี
ผู้เชี่ยวชาญพระคัมภีร์ส่วนใหญ่ถือว่าเปาโลได้เขียนจดหมายฉบับนี้บ่ใจ้เขียนเถิงก้าผู้เจื้อในเมืองเอเฟซัสเต้าอั้น แต่ได้เขียนเถิงผู้เจื้อคนอื่นๆ ในเมืองอื่นๆ ในแคว้นเอเชียตวย เปาโลได้อยู่ในเมืองเอเฟซัสสองปี๋ป๋าย กับได้บอกข่าวดีต๋อนตี้อยู่ตี้หั้น (กิจก๋าน 19:10) เอเฟซัสคือเมืองตี้สำคัญ เซิ่งอยู่ตังวันตกติดกับทะเลในแคว้นเอเชีย ในสมัยนี้แคว้นเอเชียจะอยู่ในประเทศตุรกี คาดว่าผู้เจื้อในเมืองเอเฟซัสอาจจะเอาจดหมายฉบับนี้ของเปาโลไปหื้อกับผู้เจื้อในตี้ต่างๆ ในแคว้นเอเชียได้อ่านตวย
เปาโลได้เขียนเถิงความสัมพันธ์ของคริสตจักรกับพระเยซูคริสต์ว่า พระเจ้าเยียะหื้อความต้องก๋านของพระองค์ตี้ตั้งใจ๋ไว้ตั้งแต่เก๊านั้นสำเร็จโดยผ่านก๋านต๋ายกับก๋านเป๋นขึ้นจากความต๋ายของพระเยซูคริสต์ ย้อนจาอั้นพระคริสต์จึงเป๋นผู้นำกับผู้ปกครองคนของพระเจ้า ก็คือคริสตจักร ในจดหมายนี้เปาโลสอนว่า จาวยิวกับคนต่างจ้าดก็มีสันติสุขตวยกั๋นได้ผ่านก๋านต๋ายบนไม้ก๋างเขนของพระเยซูคริสต์ กับหมู่เขาก็ได้เป๋นหมู่เดียวกั๋น คือคริสตจักร ก๋านต๋ายของพระเยซูคริสต์เยียะหื้อผู้เจื้อกู้คนสามารถฮับปอนฝ่ายจิตวิญญาณกู้อย่างจากพระเจ้า ก๋านฮับความรอดป๊นบาปโต้ษเป๋นของประทานจากพระเจ้า บ่ใจ้ขึ้นอยู่กับสิ่งตี้คนเยียะ พระวิญญาณบริสุทธิ์ก็มาอยู่ในใจ๋ของผู้เจื้อกู้คน กับพระองค์ก็หื้อของประทานฝ่ายวิญญาณเปื้อผู้เจื้อกู้คนจะสามารถจ้วยหื้อคริสตจักรแข็งแฮงขึ้น กับเติบโตเป๋นคนใหญ่ในความเจื้อ แล้วใจ๊จีวิตอย่างบริสุทธิ์กับถูกต้องต๋ามธรรม