โครินธ์
บทนำ
ผู้เขียนจดหมายฉบับนี้คือเปาโล ได้เขียนขึ้นประมาณปี๋ ค.ศ. 55 เปาโลเขียนจดหมายฉบับนี้ไปเถิงหมู่ผู้เจื้อในเมืองโครินธ์ ต้านเขียนต๋อนตี้ยังอยู่ในเมืองเอเฟซัส หมู่ผู้เจื้อในเมืองโครินธ์ส่วนใหญ่เป๋นคนต่างจ้าด ตี้ได้ฮับเจื้อโดยได้ฟังกำเตสนาของเปาโล (กิจก๋าน 18:1-18) แต่ฮีตเก่าฮอยเดิมของเมืองโครินธ์นั้นยังมีอิทธิพลต่อความเจื้อของหมู่ผู้เจื้ออยู่ จึงเยียะหื้อมีปั๋ญหาเกิดขึ้นภายในคริสตจักรเมืองโครินธ์ ย้อนว่ามีหมู่ผู้เจื้อยังใจ๊จีวิตต๋ามฮีตเก่าฮอยเดิมของเมืองโครินธ์อยู่ เปาโลจึงเขียนจดหมายฉบับนี้เปื้อจะอู้เถิงก๋านแก้ไขปั๋ญหาตี้เกิดขึ้นในคริสตจักรหั้น
จุดประสงค์ของเปาโลในก๋านเขียนจดหมายฉบับนี้คือ เถิงแม้ว่าคริสตจักรในเมืองโครินธ์จะมีของประทานฝ่ายจิตวิญญาณนัก แต่เขาหันว่าหมู่เขาเป๋นผู้เจื้อตี้เหมือนเป๋นหละอ่อนหน้อยย้อนใจ๊จีวิตต๋ามคนในโลก เจ้น มีเรื่องความแตกแยกกั๋น บาปตางเพศ ก๋านฟ้องกั๋นตี้ศาลแตนตี้จะหื้อคนในคริสตจักรตัดสินคดี กับก๋านบ่มีน้ำนึ่งใจ๋เดียวกั๋นในพิธีหักเข้าหนมปัง
เปาโลได้เขียนบอกแหมว่า หมู่ผู้เจื้อก็เผียบเหมือนตั๋วของพระคริสต์ ตี้แต่ละคนก็เป๋นส่วนนึ่งในตั๋วนี้ โดยมีพระคริสต์เป๋นหัว ผู้เจื้อก็เป๋นเหมือนพระวิหารของพระเจ้าได้โดยพระวิญญาณบริสุทธิ์ตี้อยู่ในใจ๋ของเขา ย้อนจาอั้นผู้เจื้อต้องใจ๊จีวิตอย่างบริสุทธิ์เซิ่งเป๋นก๋านหื้อเกียรติพระเจ้า เปาโลเขียนเกี่ยวกับระเบียบในก๋านนมัสก๋านพระเจ้า กับอู้เถิงของประทานฝ่ายวิญญาณตี้พระวิญญาณบริสุทธิ์มอบหื้อกับผู้เจื้อ สิ่งตี้สำคัญตี้สุดคือ ของประทานนี้ควรจะเยียะหื้อตั๋วของพระคริสต์เติบโตขึ้น บ่ใจ้แตกแยกกั๋น