มัทธิว
บทนำ
หนังสือสี่เล่มแรกของพระคัมภีร์พันธสัญญาใหม่ฮ้องกั๋นว่า หนังสือข่าวดี ย้อนได้บอกข่าวดีของจีวิตกับความต๋ายของพระเยซู ผู้ตี้พระเจ้าพระบิดาส่งมาเปื้อจ้วยหื้อมนุษย์รอดป๊นบาปโต้ษ ในหนังสือข่าวดีตึงสี่เล่มนี้ ข่าวดีมัทธิวเป๋นเล่มแรก หนังสือข่าวดีกู้เล่มได้เล่าเถิงจีวิตพระเยซู กำสอน ก๋านต๋ายบนไม้ก๋างเขน กับก๋านเป๋นขึ้นจากความต๋ายของพระองค์ หนังสือข่าวดีกู้เล่มเขียนมาจากมุมมองของผู้เขียนโดยได้ฮับก๋านดลใจ๋จากพระวิญญาณบริสุทธิ์
คริสตจักรสมัยยุคแรกก็ยอมฮับว่าผู้เขียนหนังสือข่าวดีเล่มนี้คือ มัทธิว เซิ่งเป๋นคนเก็บภาษี กับได้เป๋นคนนึ่งในอัครสาวกตึงสิบสองคนของพระเยซู กับเมื่อลูนมาต้านก็ได้เป๋นอัครทูต บ่มีหลักฐานแน่ชัดว่ามัทธิวได้เขียนหนังสือข่าวดีเล่มนี้เมื่อใด ผู้เชี่ยวชาญถือว่าคงเขียนขึ้นในหละหว่างปี๋ ค.ศ. 50 - 70 ก่อนตี้กรุงเยรูซาเล็มจะถูกทำลายในปี๋ ค.ศ. 70
มัทธิวได้เขียนหนังสือข่าวดีเล่มนี้หื้อจาวยิวตี้ฮับเจื้อพระเยซู อาจจะเป๋นจาวยิวตี้อยู่ในแคว้นซีเรียกาว่าดินแดนปาเลสไตน์ จาอั้นหนังสือเล่มนี้ได้เน้นพระสัญญาในพระคัมภีร์พันธสัญญาเก่าตี้เกิดขึ้นต๋ามนั้นโดยพระเยซู เล่มนี้ตั้งเก๊ากับลำดับผะกุ๋นของพระเยซู นี่ก็แสดงหื้อผู้เจื้อจาวยิวฮู้ว่าพระเยซูเป๋นลูกหลานของอับราฮัม กับเป๋นพระคริสต์ผู้ตี้เยียะหื้อพระสัญญาของพระเจ้าเป๋นแต๊ มัทธิวได้อ้างกำตวายตั๊กหลายอย่างในพระคัมภีร์พันธสัญญาเก่าเปื้อแสดงหื้อหันว่าได้เกิดขึ้นแต๊โดยพระเยซู ต้านได้เชื่อมโยงพันธสัญญาเก่ากับพันธสัญญาใหม่ แต่เมื่อพระเยซูได้หื้อพระมหาบัญชา(28:19-20)กับหมู่อัครสาวกไว้ ก็แสดงว่าหนังสือข่าวดีเล่มนี้ก็บ่ใจ้เปื้อบอกก้าจาวยิวเต้าอั้น แต่บอกหื้อกับคนตึงโลกตวย
สิ่งสำคัญแหมอย่างในหนังสือข่าวดีเล่มนี้คือ เรื่องแผ่นดินของพระเจ้า ตี้ฮ้องแหมอย่างว่าแผ่นดินสวรรค์ มัทธิวได้รวบรวมกำเผียบของพระเยซูตี้สอนว่า แผ่นดินของพระเจ้าเป๋นจาใด กับในบทตี้ 5-7 ต้านรวมกำสอนของพระเยซูตี้บอกว่า ผู้ตี้เจื้อวางใจ๋พระเยซูควรใจ๊จีวิตจาใด