กำนำ
ภาษากำเมืองมีคนอู้และใจ๊ในภาคเหนือของประเทศไทย เป๋นภาษาต๋ามวิถีจีวิตของคนเมือง ก็เป๋นเหตุตี้คริสตจักรในภาคเหนือของประเทศไทยส่วนใหญ่ใจ๊กำเมืองเมื่อเตสนา แต่พระคัมภีร์เป๋นภาษาไทยก๋าง คนเตสนาก็จะอ่านภาษาไทยก๋างเป๋นกำเมือง โดยแป๋ภาษาไทยก๋างเป๋นภาษากำเมืองเวลาอ่าน ฮ่วมกับแหมเหตุผลนึ่ง คือคนเมืองบางคนบ่ก้อยเข้าใจ๋พระคัมภีร์ภาษาไทยก๋าง จาอั้นตางโครงก๋านแป๋พระคัมภีร์กำเมือง ตี้ขึ้นกับมูลนิธิวิคลิฟไทย ฮ่วมกับ สถาบันภาษาศาสตร์ มหาวิทยาลัยพายัพ จึงได้แป๋พระคัมภีร์เป๋นภาษากำเมืองล้านนาขึ้น ภาษาตี้ใจ๊ในก๋านเขียนพระคัมภีร์พันธสัญญาใหม่เล่มนี้ ได้เขียนต๋ามสำเนียงของคนเมือง กับแนวตางในก๋านแป๋จะเน้นแป๋ต๋ามความหมาย เปื้อหื้อเข้าใจ๋ง่าย ชัดเจน เป๋นธรรมชาติ และถูกต้องต๋ามความหมายเดิม แต่สำเนียงก๋านอู้ของแต่ละท้องถิ่นออกเสียงต่างกั๋น ย้อนจาอั้นเวลาอ่าน ก็ขอหื้ออ่านต๋ามสำเนียงของตั๋วเก่าได้ต๋ามตี้ต้องก๋าน แต่ก๋านแป๋พระคัมภีร์เล่มนี้ได้ใจ๊สำเนียงเจียงใหม่เป๋นหลัก
พระคัมภีร์พันธสัญญาใหม่เล่มนี้ได้ผ่านกระบวนก๋านหลายขั้นต๋อน เซิ่งปี้น้องคนเมือง หมู่ศิษยาภิบาลคริสตจักรต่างๆ กับผู้เชี่ยวชาญด้านพระคัมภีร์พันธสัญญาใหม่จากวิทยาลัยพระคริสต์ธรรมแมคกิลวารีมีส่วนฮ่วมในก๋านตรวจสอบ และหื้อก๋ำลังใจ๋เป๋นอย่างดี
พระคัมภีร์เล่มนี้เป๋นของคนเมืองกู้คน จึงใค่ขอขอบคุณกู้คนตี้มีส่วนฮ่วมหื้อเกิดขึ้น และเมื่อต้านได้อ่านแล้วปะข้อบกพร่อง มีกำแนะนำ กาว่าข้อเสนอแนะอย่างใด ขอส่งความกึ๊ดหันมาตี้สำนักงานมูลนิธิวิคลิฟไทย เลขตี้ 15-23. 5 ต.แม่เหียะ อ.เมือง จ.เชียงใหม่ 50100 กาว่าส่งตาง E-mail: [email protected] เปื้อเฮาจะได้แก้ไขปรับปรุงหื้อดีขึ้น
หวังว่าเมื่อต้านได้อ่านถ้อยกำของพระเจ้าตี้เป๋นภาษาของตั๋วเก่า จะเยียะหื้อต้านเข้าใจ๋ถ้อยกำนั้นได้นักเหลือภาษาอื่นๆ กับถ้อยกำของพระเจ้าก็จะเข้าไปเถิงหัวใจ๋ของต้านได้ง่ายขึ้น จึงขอหื้อพระคัมภีร์พันธสัญญาใหม่เล่มนี้เป๋นประโยชน์กับพันธกิจ คริสตจักร คนเมือง กับกู้คนตี้อู้กับใจ๊กำเมืองตึงในภาคเหนือและใคว่โลกตวยเต๊อะ
โครงก๋านแป๋พระคัมภีร์กำเมือง
มกราคม 2017
ก๋านเขียนกำเมืองโดยใจ๊ตั๋วไทยในแอปนี้
ย้อนคนตี้สามารถอ่านตั๋วเมืองล้านนาได้มีหน้อย ในแอพพระคัมภีร์เล่มนี้ก็ใจ๊ตั๋วไทยเขียนกำเมือง เซิ่ง ส่วนใหญ่ถ้าเป๋นกำตี้เป๋นกำเมืองแต๊ๆ จะเขียนต๋ามเสียง หื้อผ่อตารางเปรียบเทียบอักษรล้านนากับอักษรไทยในหน้าต่อไป ตารางตึงสองนี้จะเป๋นแนวตางในก๋านเขียนกำเมืองโดยใจ๊ตั๋วไทย แต่มีข้อยกเว้นพ่องคือ
ก. ถ้าเป๋นกำตี้มีฮูปแบบในภาษาไทยก๋างตี้คนหันโดยทั่วไป ก็จะสะกดต๋ามฮูปแบบนั้นเถิงแม้ว่าบ่ก้อยต๋ามเสียงในกำเมือง เจ้น “ก็” เซิ่งออกเสียงเป๋น “ก่อ” แต่สะกดเป๋น “ก็” ถ้าผู้อ่านปะกำตี้มีลักษณะอย่างอี้ หื้อผ่อต๋ามบริบทแล้วออกเสียงต๋ามบริบทนั้น
ข. กำตี้ยืมจากภาษาไทยก๋างกาว่าภาษาบาลีก็สะกดต๋ามภาษาไทยก๋าง เจ้น “เรื่อง” “พระเจ้า” “ทุรกั๋นดาร” แต่หื้อออกเสียงเป๋นกำเมือง คือ “เลื่อง” “พะเจ้า” กับ “ทุละกั๋นดาน”
ค. กำเมืองสำเนียงเจียงใหม่มีเสียงวรรณยุกต์นักกว่าภาษาไทยก๋าง เซิ่งบ่สามารถเขียนกู้เสียงออกได้ในภาษาไทยก๋าง ผู้อ่านจึงต้องออกเสียงต๋ามบริบท เจ้น “แจ้ง” ตี้หมายเถิง สว่าง ก็สะกดเหมือน “แจ้ง” ตี้หมายเถิง สาปแจ้ง แต่ออกเสียงต่างกั๋น
จ. กำเมืองมีเสียงขึ้นฮูดัง คือตั๋ว ยะ กับ ตั๋ว ญะ ตั๋วอย่างเจ้น “เยียะ” กับ “ใหญ่” เสียงนี้ในด้านตั๋วไทยตางโครงก๋านได้ใจ๊ ยอยักษ์ กับ ยอผู้หญิง เมื่อเขียน แต่กำเมืองมีแหมตั๋วนึ่ง คือ ตั๋ว อยะ-หยะ มักจะป๋ากฏในรูปของ “อย” “หย” กับ “ย” เซิ่งสามตั๋วนี้บ่ออกเสียงตางฮูดัง ตั๋วอย่างเจ้นกำว่า “อยาก” “หยุด” กับ “ยา”
ง. จื้อคนกับสถานตี้สะกดต๋ามพระคัมภีร์ไทยฉบับมาตรฐาน แต่อาจปรับเสียงวรรณยุกต์ เจ้นกำว่า “ลูกา” ถ้าสะกดต๋ามเสียงในภาษาไทยก๋าง จะสะกดต๋ามรูปแบบนี้ แต่ในพระคัมภีร์เล่มนี้ได้เขียนเป๋น “ลูก๋า”
ก๋านบอกเลขบท เลขข้อ เชิงอรรถ (กำอธิบาย) กับก๋านอ้างอิงข้อพระคัมภีร์
เลขบท เป๋นตั๋วเลขอารบิกใหญ่ เลขข้อ เป๋นตั๋วเลขอารบิกหน้อย ตั๋วเลขไทยหลักเดียวตี้ห้อยอยู่บนข้อความบางหน้า แสดงว่าข้อความนั้นมีเชิงอรรถอยู่ต๊ายหน้า กับตั๋วพยัญชนะไทยตี้ห้อยอยู่บนข้อความบางหน้า เป๋นก๋านอ้างอิงข้อพระคัมภีร์ตี้เกี่ยวข้องกับข้อความนั้นตี้พิมพ์ไว้ต๊ายหน้า
จื้อพระธรรมกับตั๋วย่อ พันธสัญญาเก่า
| ปฐมก๋าล | ปฐก. |
| อพยพ | อพย. |
| เลวินิติ | ลนต. |
| กันดารวิถี | กดว. |
| เฉลยธรรมบัญญัติ | ฉธบ. |
| โยชูวา | ยชว. |
| ผู้วินิจฉัย | วนฉ. |
| นางรูธ | นรธ. |
| 1 ซามูเอล | ซมอ. |
| 2 ซามูเอล | ซมอ. |
| 1 พงศ์กษัตริย์ | พกษ. |
| 2 พงศ์กษัตริย์ | พกษ. |
| 1 พงศาวดาร | พศด. |
| 2 พงศาวดาร | พศด. |
| เอสรา | อสร. |
| เนหะมีย์ | นหม. |
| เอสเธอร์ | อสธ. |
| โยบ | โยบ |
| สดุดี | สดด. |
| สุภาษิต | สภษ. |
| ปัญญาจ๋ารย์ | ปญจ. |
| เพลงซาโลมอน | พซม. |
| อิสยาห์ | อสย. |
| เยเรมีย์ | ยรม. |
| เยเรมีย์ | ยรม. |
| เพลงคร่ำครวญ | พคค. |
| เอเสเคียล | อสค. |
| ดาเนียล | ดนล. |
| โฮเชยา | ฮชย. |
| โยเอล | ยอล. |
| อาโมส | อมส. |
| โอบาดีห์ | อบด. |
| โยนาห์ | ยนา. |
| มีคาห์ | มคา. |
| นาฮูม | นฮม. |
| ฮาบากุก | ฮบก. |
| เศฟันยาห์ | ศฟย. |
| ฮักกัย | ฮกก. |
| เศคาริยาห์ | ศคย. |
| มาลาคี | มลค. |
จื้อพระธรรมกับตั๋วย่อ พันธสัญญาใหม่
| มัทธิว | มธ. |
| มาระโก | มก. |
| ลูก๋า | ลก. |
| ยอห์น | ยน. |
| กิจก๋าน | กจ. |
| โรม | รม. |
| 1 โครินธ์ | 1 คร. |
| 2 โครินธ์ | 2 คร. |
| กาลาเทีย | กท. |
| เอเฟซัส | อฟ. |
| ฟีลิปปี | ฟป. |
| โคโลสี | คส. |
| 1 เธสะโลนิก๋า | 1 ธส. |
| 2 เธสะโลนิก๋า | 2 ธส. |
| 1 ทิโมธี | 1 ทธ. |
| 2 ทิโมธี | 2 ทธ. |
| ทิตัส | ทต. |
| ฟีเลโมน | ฟม. |
| ฮีบรู | ฮบ. |
| ยากอบ | ยก. |
| 1 เปโตร | 1 ปต. |
| 2 เปโตร | 2 ปต. |
| 1 ยอห์น | 1 ยน. |
| 2 ยอห์น | 2 ยน. |
| 3 ยอห์น | 3 ยน. |
| ยูดา | ยด. |
| วิวรณ์ | วว. |