Təntən sagɩ tə,
Zwan
nə pʋ́pʋ́nɩ́
Zwezi yɩ mɩɩ sʋgʋ
1
1 Nə cʋgʋ lìù kori.
Nə nɩ wá də nə yɩ́á.
Nə balʋ wá zəni.
Nə dwen ʋ yɩra də nə jɩ̀àn.
Ʋ mʋ̀ nə yɩ lìù tə,
ʋ nə yɩn lá,
kʋ jɩjʋ mama.
Kʋ lìù təntə nə yɩ sʋgʋ tə,
kʋ pɩn mɩɩ lɩ̀à nə.
2 Lìù tə,
ʋ nə yɩ mɩɩ,
bɩrɩ ʋ tɩ̀àn nəba.
Yá nə mʋ̀ nɩ wá.
Mə ʋ yoo nə nə dàń swɩ̀n,
nə bɩrɩ aba.
Nə swɩ̀n ʋ mʋ̀ lìù təntə yoo á con.
Ʋ mʋ̀ nə yɩ mɩɩ tə,
kʋ nə ba zwɛ̀ Yɩɩ con.
Ʋ mʋ̀ yà nə yɩn də nə nyɩna Yɩɩ tə.
Ʋ mʋ̀ lìù tə ʋ nə bɩrɩ ʋ tɩ̀àn nəba,
3 nə nɩ wá,
nə ga nì ʋ kori.
Ʋ mʋ̀ yoo nə,
nə swɩ̀n á də con,
sə á də ja nimarʋ də nəba.
Nə də con nə,
nə də jə *nimarʋ də nyɩna Yɩɩ,
ʋ də ʋ bìú Zwezi-*Kərisə.
4 Tə yìə̀n tə yɩ,
nə pʋ́pʋ́nɩ́ tə á nə,
sə kʋ pa nə pupwən tə sú.
Á yana poni lɩ̀à
(Efɛzə tɩ̀án 5.8-14, Titə 2.14)
5 Á nəŋə sʋgʋ tə,
nə nə nì ʋ con,
yá nə dàń ga pɩ̀à nə swɩ̀n kʋ nə bɩrɩ aba.
Sʋgʋ təntə nə yɩ:
Yɩɩ yɩ poni Yɩɩ.
Yá yikunu tə̀lə́ ʋ con.
6 Nə nə swɩ̀n də,
nə jə *nimarʋ də Yɩɩ,
yá nə ga tʋŋa yikunu wa yìə̀n,
nə yɩ kʋnkʋna,
nə ga ba cɩ́gá tə nii nə twá.
7 Yɩɩ yɩ poni Yɩɩ.
Yá nə nə yɩ poni lɩ̀à ndə ʋ nə,
nə wá ja nimarʋ duən pwə́rə́ wa.
Yá Yɩɩ bìú Zwezi jana tə,
tə nə nan ʋ tɩan tə máŋá wa,
dàń wá sɩn nə cʋna tə mama,
tə lɩ.
8 Nə nə swɩ̀n də,
nə ba cʋna tʋŋa,
nə yɩ nə gɩgarɩ nə tɩ̀àn,
cɩ́gá ga tə̀lə́ də nəba.
9 Nə nə swɩ̀n nə bɩrɩ də,
nə fwa cʋna,
Yɩɩ wá sɛ̀ ʋ kwɛn tə cʋna tə,
nə mʋ̀ də wá pwə́rə́ wa.
Yá ʋ ga wá sɩn nə kʋnkʋn yìə̀n tə mama.
Yɩɩ wá fwa kʋ,
ʋ yoo nə yɩ pùə́ nədʋ tíú,
ʋ ga yɩ cɩ́gá tíú tə yɩrɩ.
10 Yá nə nə swɩ̀n də,
nə ba cʋna tʋn,
kʋ yɩ nə bɩrɩ də,
ʋ yɩ kʋnkʋnʋ,
ʋ sʋgʋ tə ga tə̀lə́ nə waa.