Lìù nə tʋŋa ʋ pùə́ yokʋkwɩnan fɩra, ʋ ba Yɩɩ nii zìlí
4
1 Jara də jaŋa wulə á pwə́rə́ wa.
Tə yìə̀n təntə nan yə̀n tə bà>> Kʋ yɩ á pùə́ yokʋkwɩnan fɩra nə pɩn,
kʋ yɩ nətʋ.
Tə yìə̀n təntə nə wulə á yɩra tə wa,
tə pa á zɩga duən nə.
2 Á yɩ́á zʋa lɩ̀à wiən,
á ga wàrɩ̀ tə á nɩ.
Yá kʋ dàń pɩn á jì lagʋra.
Á súə́ də wʋgwɩʋ,
á ga wàrɩ̀ wiən tə,
á nə pɩ̀à á nɩ.
Kʋ pa jara də jaŋa zàn á pwə́rə́ wa,
kʋ yoo tə yɩrɩ.
Á ba tə wiən tə jə,
á wà tə lòrì Yɩɩ con yɩrɩ.
3 Máŋá tə,
á nə lòrì də,
á ba nɩ,
á pubʋŋa tə nə ba ziən yɩrɩ.
Kʋ yɩ á lòrì,
sə á ma tʋn á pùə́ yokʋkwɩnan fɩra.
4 Á yá Yɩɩ,
ndə kacwarɩ nə yá ʋ barɩ nətʋ.
Á yə̀ə́ zəni də,
lʋʋ kʋ tə wiən tə sonu yɩ Yɩɩ dʋŋɩ.
Lìù tə,
ʋ nə pɩ̀à,
sə ʋ twá lʋʋ yìə̀n tə tə kwa,
kʋ tíú wá jì Yɩɩ dʋŋʋ.
5 Á dànà ká bʋ́n də,
kʋ tə Yɩɩ nə swɩ̀n ʋ sʋgʋ tə wa,
yɩ tʋtʋ.
Kʋ swɩ̀n də,
Yɩɩ súə́ də wʋgwɩʋ nə siŋu tə fɩra tə yɩrɩ,
ʋ nə pɩn nəba.
6 Yá kʋ tə nə dwə tə mama,
kʋ mʋ̀ nə yɩ pubwanʋ tə,
ʋ nə pɩn nəba.
Kʋ swɩ̀n Yɩɩ sagɩ tə wa kʋ wʋ́:
«Yɩɩ zɩga lɩ̀à tə nə,
ba nə jə fwiə,
ʋ ga fwa pubwanʋ ba tə,
ba nə mun ba tɩ̀àn yɩra.»
7 Kʋ mʋ̀ tə yɩrɩ,
á zìlí Yɩɩ nii.
Á vɩa *Sɩtana con,
ʋ wá dəri,
ʋ va yiŋʋnɩ,
ʋ yá aba.
8 Á twənə á yí Yɩɩ yɩra,
ʋ də wá twən ʋ yí á yɩra.
Cʋna lɩ̀à-ba,
á lɩa á jɩ̀àn durən wa.
Pwìí bələ tɩ̀án-ba,
á lɩa cʋna á bɩcanɩ wa.
9 Á pɩan á yinəgə ja á tɩ̀àn.
Á kənə á tɩ̀àn lúə́ wa,
á kwíə́!
Á mʋmʋn wá jì kwirə.
Á pupwən wá lwàń ka jì pucʋnɩ.
10 Á muŋə á tɩ̀àn *Yuu-Tiu yáá nə!
Yá ʋ wa zɩ̀n aba.
Á dànà ká cəgə duən!
11 À nubɩa-ba,
á dànà ká cəgə duən!
Lìù tə,
ʋ nə cəgə ʋ don,
ʋ nə yɩ ʋ nubiu *Kərisə yɩrɩ,
nə à yə̀ə́ ʋ nə bʋ̀rɩ̀ ʋ bʋra,
kʋ tíú yɩ yoo tə,
Yɩɩ nə pɩn ʋ *nii tə,
kʋ yuu wa ʋ cəgə.
Kʋ ga yɩ Yɩɩ nii tə bʋra nə ʋ bʋ̀rɩ̀.
Yá də lìù nə bʋ̀rɩ̀ Yɩɩ nii tə bʋra,
kʋ tíú kʋ́ʋ̀ wàrɩ̀ kʋ nii təntə nə ʋ twá.
Ʋ dàń yɩ kʋ bʋra nə ʋ bʋ̀rɩ̀.
12 Yɩɩ cɩcɩ nə pɩn ʋ nii lɩ̀à nə.
Ʋ mʋ̀ cɩcɩ nə wàá lɩ̀à bʋra bʋ̀rɩ̀.
Ʋ mʋ̀ cɩcɩ nə wàá lɩ̀à ʋ joŋə ba cʋna wa.
Ʋ mʋ̀ cɩcɩ nə wàá ba ʋ cʋ̀gà də.
Sə n mʋ̀!
N mʋ̀ nə yɩ wàà,
n ma bʋ̀rɩ̀ n don bʋra>>
Á dànà ká ya fwiə lɩ̀à!
(Likə 12.16-20)
13 He!
Á mʋ̀,
á cʋga nə sɩ́ʋ́n nə!
Á mʋ̀ lɩ̀à tə,
á yàá swɩ̀n,
á wʋ́:
«Zə̀n,
nə à yə̀ə́ jwɩan,
nə wá va tɩʋ kʋ tə,
nə à yə̀ə́ kʋ tə.
Nə wá fwa bɩnɩ lá,
nə wá yoli wiən,
nə ga wá na nywarɩ nətən lá.»
14 Á mʋ̀ lɩ̀à tə,
á nə yəri won tə nə wá yí á mɩɩ tə jwɩan nə.
Á yɩ ndə fanyʋ nə,
kʋ dánɩ́ mancɩn,
kʋ ga pìí kʋ jɛ́n.
15 Á mɛ,
sə á swɩ̀n,
á wʋ́:
«Də *Yuu-Tiu nə swə nə mɩɩ tə,
nə wá ya lʋʋ wa,
nə wá fwa kʋ tə də kʋ tə.»
16 Yá á mʋ̀ con kʋ tà nətʋ.
Á yɩ fwiə lɩ̀à,
á ga tə bwɩ á tɩ̀àn nə,
də kʋ mɛ.
Á nə zɩ̀n á tɩ̀àn nətʋ tə,
kʋ yiri ba ziən.
17 Lìù tə,
ʋ nə yə̀ə́ zəni tə,
ʋ nə mɛ,
sə ʋ fwa,
yá ʋ ga ba kʋ fwa,
ʋ ken ʋ tɩ̀àn cʋna wa.