Sagɩ tə, ba nə pʋ́pʋ́nɩ́ ba pa
Ebərə-ba
Kərisə lɩ̀à tə nə
Yɩɩ twá ʋ bìú Zwezi-Kərisə tə nə, ʋ ma swɩ̀n nə con
1
1 Dí yáá nə,
Yɩɩ twá ʋ nii *sʋ̀sʋ̀nà tə nə,
ʋ ma swɩ̀n nə nɩbara-ba con,
nɛɛ kapʋpʋ.
Ʋ twá coŋi yirə yirə də nə,
ʋ ma swɩ̀n ba con.
2 Sɩ́ʋ́n nə,
Yɩɩ dàń twá ʋ bìú tə nə,
ʋ ma swɩ̀n nə con nə,
zə̀n máŋá ka tə wa.
Yɩɩ twá də ʋ mʋ̀,
ʋ ma fwa lʋʋ,
Yɩɩ ga lɩ wá ʋ tún,
ʋ ga tún máŋá də,
sə ʋ pa ʋ tɩnɩ wiən tə mama.
3 Yɩɩ twá ʋ bìú təntə nə,
ʋ pa ʋ dun tə pɩpɩlɩ.
Ʋ mʋ̀ nə yɩ Yɩɩ nyɩnyɩga cɩ́gá cɩ́gá.
Ʋ nii sʋgʋ jə dɩ̀àn.
Kʋ twá kʋ mʋ̀ sʋgʋ təntə nə,
ʋ ma pa lʋʋ wiən tə mama zɩga tə bwálá nə.
Ʋ mʋ̀ nə sɩn ləzoni cʋna,
ʋ lɩ ba yuu wa.
Kʋ kwa nə,
ʋ dɩga Yɩɩ sàń nə,
ʋ jə̀ə́ Yɩɩ jɩzən*f1* vàn nə,
ʋ də́ pàrɩ̀ də Yɩɩ tə,
ʋ nə yɩ pɩ̀ʋ́ nəfarʋ,
ʋ wulə tə mɛ yuu wa.
Zwezi-Kərisə dwə malɩkɛ
4 Kʋ mʋ̀ bìú təntə jə dun,
ʋ doni *malɩkɛ.
Kʋ twá nətʋ,
Yɩɩ ma pa wá yɩrɩ,
kʋ nə dwə malɩkɛ yɩrɩ.
5 Kʋ yɩ cɩ́gá,
Yɩɩ tə wà malɩka con swɩ̀n,
ʋ wʋ́:
«À pɩ̀à à bɩrɩ də,
n mʋ̀ nə yɩ à bìú.
Zə̀n kʋ tə,
à mʋ̀ Yɩɩ nə yɩ n nyɩna.»
Yɩɩ ma kʋ́ʋ̀ wà malɩka con swɩ̀n,
ʋ wʋ́:
«À mʋ̀ wá yà n nyɩna.
N də ga wá yà à bìú.»
6 Yɩɩ nə kʋ́ʋ̀ pɩn ba lɩrɩ ʋ bikwɩa tə tɩa yuu wa,
ʋ swɩ̀n ʋ yoo,
ʋ wʋ́:
«Malɩka mama mɛ,
sə ka bà ka pa wá dun.»
7 Á nəŋə,
kʋ tə Yɩɩ nə swɩ̀n malɩkɛ tə yuu wa.
Ʋ swɩ̀n,
ʋ wʋ́:
«Malɩkɛ tə tʋŋa tə pɩn nə.
Tə yɩ ndə voo nə,
tə ga yɩ ndə mənvoo də nə.»
8 Yá Yɩɩ dàń swɩ̀n ʋ bìú tə mʋ̀ yoo,
ʋ wʋ́:
«N yɩ Yɩɩ,
yá n ga wá yà pɩ̀ʋ́ wuuu,
kʋ máŋá nə ba zwɛ̀.
N wá də́ pàrɩ̀ n lɩ̀à tə yuu wa,
cɩ́gá cwəŋə wa.
9 N swə won tə,
kʋ nə tì cɩ́gá cwəŋə,
n ga culi kʋ tə nə yɩ yokʋkwɩʋn.
Mə kʋ mʋ̀ nə pɩn,
n *Yuu-Tiu kúrí n mʋ̀,
ʋ pa ʋ tɩ̀àn nə.
Ʋ kúrí mʋ́,
ʋ lwá pupwən nʋga*f1* n yuu wa,
sə ʋ pa n ya pɩ̀ʋ́.
Ʋ sóní,
sə ʋ kúrí mʋ́,
ʋ ga yá n dabara.»
10 Yɩɩ tə kʋ́ʋ̀ swɩ̀n,
ʋ wʋ́:
«Kʋ jɩjʋ mama wa,
kʋ yɩ n mʋ̀ Yuu-Tiu nə fwa tɩa tə,
də lanworu tə də n jɩ̀àn.
11 Tə wiən tə mama wá jɛ́n lá.
Lanworu tə də tɩa tə wá kwɩn,
ndə gànʋ̀ nə kwɩn nətʋ.
Yá n mʋ̀ ga wá yà lá wuuu.
12 N wá pəpəni tə ndə lìù nə pəpəni ʋ gangwɩrʋ,
ʋ dʋgʋ vàn nə.
N ga wá lwàń tə yuu nə də lanworu nədʋn,
ndə lìù nə lwàń gandʋra.
Yá n mʋ̀ wá yà nətʋ wuuu,
n bá lwàń mama,
n mɩɩ bá zwɛ̀.»
13 Yɩɩ tə wà malɩka con swɩ̀n,
ʋ wʋ́:
«Bàá yəbə n jə̀ń à jɩzən vàn nə,
də à ma kəni n dʋŋa n nɛɛ də̀ń nə.»