Sagɩ tə, Polə nə pʋ́pʋ́nɩ́ ʋ pa
Filemon
nə
Polə jʋ̀nɩ̀ Filemon
1
1 À mʋ̀ Polə wulə bàń dìə̀ wa,
à nə twá Zwezi-*Kərisə nə yɩrɩ.
À mʋ̀ də Timote,
ʋ nə yɩ nə nubiu Kərisə yɩrɩ nə,
pʋ́pʋ́nɩ́ sagɩ kʋ tə.
Nə pɩn kʋ n mʋ̀ Filemon nə.
N yɩ nə nubiswənə,
n ga yɩ nə tʋtʋndon.
2 Nə pɩ̀à,
sə sagɩ tə yí Apɩa də,
ʋ nə yɩ nə nakʋa Kərisə yɩrɩ.
Nə pɩ̀à,
sə kʋ yí Arəswipə də,
ʋ nə yɩ nə tʋtʋndon.
Ʋ də saŋa nəba,
ʋ jaŋa Yɩɩ tʋtʋŋɩ tə wa.
Nə pɩ̀à,
sə kʋ yí Kərisə lɩ̀à púlí tə də,
kʋ nə wulə n mʋ̀ Filemon sàń nə.
3 Nə nyɩna Yɩɩ də nə *Yuu-Tiu Zwezi-Kərisə nə wá fwa pubwanʋ á yɩra,
ba ga pa aba bɩcan sìə́.
4-5 À nì n sonu tə yoo,
ba nə swɩ̀n də,
n swə lɩ̀à tə mama,
ba nə yɩ Kərisə nə tɩ.
À ga nì n waa tə,
n nə keni Yuu-Tiu Zwezi nə wuuu tə yoo,
nə yɩ nətʋ.
Kʋ mʋ̀ yɩrɩ,
à kəni à nyɩna Yɩɩ lɛ̀ɛ̀ máŋá mama,
yá à lìí n yoo à yɩjʋnɩ mama wa.
6 N kəni n waa Yuu-Tiu Zwezi nə.
Yá kʋ dàń pɩn nə yɩ won nədʋ.
À dàń lòrì Yɩɩ,
sə kʋ nətʋ tə wànɩ́ kʋ pa n lwarɩ wozəŋə tə,
Yɩɩ nə pɩn nəba,
sə nə ma pa dun Zwezi-Kərisə nə,
nə lʋʋ wulu wa.
7 À nubiu,
à pìí à na pupwən nəfarʋ,
à bɩcan ga zùrì n sonu tə yɩrɩ.
Kʋ twá də n mʋ̀,
lɩ̀à tə mama,
ba nə yɩ Kərisə nə tɩ,
jɩ̀àn ma dàn.
Polə lwɛ̀ Filemon nə Onezimə yɩrɩ
(Kolosə tɩ̀án 4.7-9, 1 Korɛntə tɩ̀án 13.4-7)
8 À mʋ̀ Polə jə yoo,
à nə pɩ̀à,
sə à lòrì mʋ́ kʋ yɩrɩ.
N tətə yə̀ə́ də,
à jə cwəŋə Zwezi-*Kərisə yɩrɩ,
sə à bɩrɩ mʋ́ kʋ tə nə mɛ,
sə n fwa.
9 Yá à dàń nə pɩ̀à,
sə à bɩrɩ won tə,
à nə lòrì n con də sonu.
À yɩ bazʋnʋ,
à ga wulə bàń dìə̀ wa,
à nə twá Zwezi-Kərisə nə yɩrɩ.
10 À lwɛ̀ n nə,
sə n sɛ̀ Onezimə*f1*.
Ʋ ken ʋ waa Zwezi nə,
máŋá tə wa,
ʋ nə twi à con bàń dìə̀ tə wa.
Ʋ dàń jigə à bìú Zwezi yɩrɩ.
11 Ʋ yɩ lìù tə,
máŋá don wa,
ʋ nə wà nywarɩ jɩn ʋ pa mʋ́.
Sɩ́ʋ́n nə,
ʋ dàń jə nywarɩ ʋ pa n mʋ̀ də à mʋ̀ mama nə.
12 Yá à dàń pɩn,
ʋ pìí ʋ bɩ̀àn n con nə.
Ʋ jigə ndə à mʋ̀ Polə tətə yɩra tə vàn don nə.
13 N yə̀ə́ də,
ba vwə nə də banzala,
Zwezi-Kərisə sʋywáŋʋ́ tə yɩrɩ.
Kʋ mʋ̀ nə pɩn,
à yà sóní,
sə à pa ʋ mɛ́ à con,
ʋ san nə,
ʋ fwa kʋ tə,
n yà nə mɛ,
sə n fwa.
14 À dàń yà nə wà sóní,
sə à tʋn yoo mama,
də n nə ba kʋ swə.
À pɩ̀à,
sə zəni tə mama,
n nə wá fwa à yɩra,
sə kʋ ya də n tətə fɩra.
15 Kʋ wàá kʋ yanɩ də,
n mʋ̀ də Onezimə yà pwɛ̀ duən nə máŋá mancɩn wa,
sə á pìí á ya də duən máŋá mama wuuu.
16 Máŋá tə,
ʋ nə twi n con,
n dàń ja wá ndə n nubiu nə,
n nə swə.
N kʋ́ʋ̀ dàn ká ja wá ndə yoŋu nə.
À mʋ̀ swə wá zənzən.
N mʋ̀ con nə,
ʋ yoo dàń mɛ,
sə kʋ ya càn kʋ doni.
N də dàń mɛ,
sə n sóní wá,
ʋ nə yɩ ləzwənə,
ʋ ga yɩ lìù tə,
ʋ nə yɩ n nubiu *Yuu-Tiu yɩrɩ.
17 Də n cɩ́gá nə jələ nə ndə n dabɛɛ nə,
sə n sɛ̀ Onezimə,
ndə kʋ yɩ à tətə nə twi n con.
18 Də ʋ yà nə tʋn mʋ́ lwanɩ,
nə à yə̀ə́ ʋ nə mɛ,
sə ʋ ŋwɩ́n won ʋ pa mʋ́,
kə tə yìə̀n təntə mama à mʋ̀ yuu wa.
19 À mʋ̀ Polə tətə nə pʋ́pʋ́nɩ́ yìə̀n tə tə də à tətə jɩɩn:
À wá ŋwɩ́n mʋ́ won tə mama,
Onezimə nə mɛ,
sə ʋ pa mʋ́.
Yá kʋ tà à mʋ̀ nə wá swɩ̀n n con də,
n də tətə jə à jɩŋɩ.
Kʋ mʋ̀ nə yɩ n tətə mɩɩ tə.
20 À nubiu,
cɩ́gá mama,
tʋn kʋ yoo təntə n pa nə,
Yuu-Tiu yɩrɩ.
Tʋn kʋ nətʋ n pa nə,
sə à wànɩ́ à na pupwən Kərisə yɩrɩ.
21 À yə̀ə́ də,
n wá zìlí à nii.
Kʋ mʋ̀ nə pɩn,
à pʋ́pʋ́nɩ́ n nə.
Yá à yə̀ə́ də,
kʋ tə,
n nə wá fwa,
kʋ wá doni kʋ tə tətə,
à nə swɩ̀n n con.
22 Kʋ nə súrí lá,
tanɩ dìə̀ n tún à nə.
À jə yala də,
á yɩjʋnɩ tə wá san nə,
sə à pìí à bà á con.
Sagɩ tə yígúrə́ sʋ̀ràn