Təntən sagɩ tə, Polə nə pʋ́pʋ́nɩ́ ʋ pa
Tɛsalonikə tɩ̀án
Kərisə lɩ̀à tə nə
Polə jʋ̀nɩ̀ Kərisə lɩ̀à tə Tɛsalonikə nə
1
1 À mʋ̀ Polə də Siləvɛn də Timote nə pʋ́pʋ́nɩ́ nə pɩn *Kərisə lɩ̀à púlí tə nə,
kʋ nə wulə Tɛsalonikə nə.
Kʋ púlí təntə də nyɩna Yɩɩ də *Yuu-Tiu Zwezi-Kərisə nə vwə duən nə.
Yɩɩ nə wá fwa pubwanʋ á yɩra,
ʋ ga pa aba bɩcan sìə́.
Nətʋ tə Tɛsalonikə lɩ̀à nə ken ba waa Zwezi nə
2 Nə yɩjʋnɩ mama wa,
nə yàá lòrì Yɩɩ nə pɩn aba,
na ga kəni Yɩɩ lɛ̀ɛ̀ máŋá mama,
á mama yɩrɩ.
3 Nə yàá lìí á yoo máŋá mama,
nə nyɩna Yɩɩ yáá con.
Nə lìí nə tɩ̀àn tʋtʋŋɩ tə,
á nə keni á waa Zwezi nə,
wuuu á ma tʋn.
Nə lìí nə tɩ̀àn də kʋ tə á sonu,
tə nə tʋŋa də,
á nə zɩga dɩ̀àn yala tə wa,
á nə jə nə *Yuu-Tiu Zwezi-Kərisə con.
4 Nə nubɩa-ba,
nə yə̀ə́ də,
Yɩɩ sóní aba.
Ʋ kúrí aba,
sə á ya ʋ mʋ̀ lɩ̀à.
5 Nə swɩ̀n sʋywáŋʋ́ tə nə bɩrɩ aba.
Kʋ tà də nii sʋ̀ràn cɩcɩ,
kʋ yɩn də Yɩɩ dɩ̀àn tə də Yɩɩ-*Siŋu tə tʋtʋŋɩ tə.
Yá nə yà ba bɛ̀ɛ́ də,
sʋywáŋʋ́ tə yɩ cɩ́gá.
Á yə̀ə́ nə nə jɩn nə tɩ̀àn nətʋ,
nə ja yà á tətəŋi wa,
sə nə ma san aba.
6 Kʋ mʋ̀ nə pɩn,
á yɩ ndə nə mʋ̀ də Yuu-Tiu nə yɩ nətʋ.
Á dí càn zənzən,
á ma jon Yɩɩ sʋgʋ tə.
Yɩɩ-Siŋu tə nə pɩn aba pupwən.
7-8 Yuu-Tiu sʋgʋ tə zɩgɩ á con,
kʋ ma yí Masedwanə nagwanaa də Akayi nagwanaa.
Kʋ nətʋ dàń pɩn á jì lɩ̀à tə,
Masedwanə də Akayi Kərisə lɩ̀à tə mama nə mɛ,
sə ba jì ndə á nə.
Kʋ tə nə súrí lá,
ba swɩ̀n nətʋ tə,
á nə kəni á waa Yɩɩ nə,
bwálɩ́ mama nə.
Kʋ mʋ̀ nə pɩn,
nə mʋ̀ con,
kʋ ba də̀ń jə,
sə nə kʋ́ʋ̀ swɩ̀n ka yoo.
9 Lɩ̀à tə mama yàá swɩ̀n nə yoo.
Ba maŋa nətʋ tə,
á nə sɛ̀ á ja nəba,
máŋá tə wa,
nə nə twi á con.
Ba maŋa nətʋ tə,
á nə lwàń pubʋŋɩ á bà Yɩɩ con,
kʋ pa á sɛ̀ á dʋgʋ woŋwanan,
sə á ga tʋn á pa Yɩɩ nə.
Yɩɩ təntə nə wulə mɩɩ wa,
ʋ ga yɩ cɩ́gá.
10 Yá á dàń dànɩ̀ də,
ʋ bìú Zwezi tə,
ʋ pìí ʋ bwin ʋ zɩ̀n tɩan wa,
pìí ʋ naŋa yɩɩ ʋ bɩ̀àn.
Ʋ mʋ̀ Zwezi tə nə jon nəba Yɩɩ bʋra tə wa,
kʋ nə bɩ̀àn.