4
1 Á nəŋə kʋ tə,
à nə pɩ̀à à swɩ̀n yəbə nə yɩ nətʋ.
Kʋ yɩ ndə bisɩmaa nə mɛ,
sə ʋ zàn ʋ tɩnɩ ʋ nyɩna wiən nətʋ.
Máŋá tə wa,
ʋ tə nə yɩ nəmaa,
ʋ yɩ ndə yoŋu nə.
Yá ʋ mʋ̀ ga nə mɛ,
sə ʋ tɩnɩ ʋ nyɩna tə wiən tə mama.
2 Ʋ bìsɩ́nɩ́ nə,
ʋ yɩ ʋ wulə lɩ̀à duən jɩ̀àn wa,
ba ywàŋá ʋ də ʋ wiən tə yuu,
kʋ ja vələ máŋá tə,
ʋ nyɩna tə nə lɩ ʋ tún.
3 Mə kʋ yɩ nətʋ nə də con.
Máŋá tə,
nə yà nə yəri Yɩɩ yìə̀n tə,
nə yà yɩ ndə bìsɩ́ná nə,
yá lʋʋ wiən yà jə dɩ̀àn nə yuu wa,
ndə tə ywəŋə nə.
4 Máŋá tə,
Yɩɩ nə lɩ ʋ tún,
dàń nə yí,
ʋ tʋn ʋ bìú Zwezi tə lʋʋ wa.
Yɩɩ pɩn,
kan lɩrɩ wá,
ʋ ga twá *nii tə nə,
Yɩɩ nə pɩn *Moyizə nə.
5 Ʋ twi,
sə ʋ pa lɩ̀à tə,
ba nə twá Yɩɩ nii tə nə,
ʋ nə pɩn Moyizə nə,
tɩnɩ ba tɩ̀àn,
sə nə ga jì ʋ mʋ̀ Yɩɩ bɩa.
6 Á nəŋə,
kʋ tə nə bɩrɩ də,
nə yɩ Yɩɩ bɩa.
Yɩɩ tʋn ʋ bìú tə *Siŋu ʋ pa kʋ bà,
kʋ zʋ nə pubʋŋa wa.
Mə Siŋu təntə dàń nə pɩn,
nə wàá nə swɩ̀n,
nə wʋ́:
«Baba!
Nə nyɩna Yɩɩ!»
7 Kʋ nətʋ dàń bɩrɩ də,
n kʋ́ʋ̀ tà yoŋu,
n yɩ Yɩɩ bìú.
Yá ʋ dàń wá pa mʋ́ tori tə,
ʋ yà nə tanɩ,
sə ʋ pa ʋ bɩ̀á nə,
n də nə yɩ ʋ bìú tə yɩrɩ.
Yɩɩ tətə nə tʋŋa zəni təntə.
8 Máŋá don yɩn lá,
á yà wà Yɩɩ lwarɩ.
Á yà ga jʋ̀nɩ̀ wiən duən,
tə nə tà Yɩɩ cɩ́gá cɩ́gá.
9 Yá sɩ́ʋ́n nə,
á dàń lwarɩ Yɩɩ.
Kʋ tə nə dwə,
Yɩɩ dàń yə̀ə́ á yoo.
Kʋ dàń fwa nətə,
á ma pìí á twá lʋʋ wiən tə kwa,
tə nə ba dɩ̀àn jə mɩ́ámɩ́án?
Bɛ̀ɛ̀ nə pɩn á ma pɩ̀à, sə tə mʋ̀ wiən təntə kʋ́ʋ̀ pìí tə tɩnɩ aba ndə ywəŋə nə?
10 Á kʋ́ʋ̀ pìí á zìlí dɩan duən,
nə à yə̀ə́ cànɩ̀ duən,
nə à yə̀ə́ bɩna duən.
11 Á yoo tə jə pucʋnɩ kʋ pa nə,
à tʋtʋncaran tə,
à nə tʋn à pa aba,
nə wá jì tʋtʋ yɩrɩ.
12 À nubɩa-ba,
à lòrì aba,
sə á ya ndə à nə,
à də nə yɩ ndə á nə yɩrɩ.
Á wà lwanɩ mama fwa à yɩra.
13 Á yə̀ə́ də,
à dí yáá nə twi á con,
kʋ yɩ à yayɩgʋ tə nə pɩn,
à ya á con,
à ma swɩ̀n Zwezi-Kərisə sʋywáŋʋ́ tə,
à bɩrɩ aba.
14 À yayɩgʋ tə yɩn càn kʋ pa aba.
Yá də kʋ nətʋ mama,
á wà nə zʋnɩ,
sə á dɩŋɩ nə,
á kə vàn nə.
Á tə sɛ̀,
á jon nə,
á kə á con ndə Yɩɩ *malɩka nə,
nə à yə̀ə́ ndə Zwezi-Kərisə tətə nə.
15 Kʋ máŋá təntə wa,
á pwìí yà poli zənzən.
Bɛ̀ɛ̀ dàń nə pɩn,
á kʋ́ʋ̀ tə̀lə́ pupwən təntə wa sɩ́ʋ́n?
À yəni də,
á yà nə wàá á yɩ́á á lɩ,
á kəni à yɩ́á tə nə, á yà nə lɩ tə á kə lá.
16 Yá sɩ́ʋ́n nə,
à dàń jigə á dʋŋʋ,
cɩ́gá tə yɩrɩ,
à nə swɩ̀n á con naaa?
17 Lɩ̀à wulə á nii nə də yawala.
Yá ba yawala təntə ba ziən.
Ba yɩ ba pɩ̀à,
sə ba pwɛ̀ á mʋ̀ də à mʋ̀ Polə duən nə,
sə á ja yawala də ba mʋ̀.
18 Kʋ ziən,
sə á ja yawala də yoo tə,
kʋ nə ziən,
máŋá mama wuuu.
Kʋ tà máŋá tə,
à nə wulə á con cɩcɩ.
19 À bɩa-ba,
á yoo kʋ́ʋ̀ pìí kʋ yɩ̀ nə,
ndə kapuə pùə́ nə yàá yɩ̀ nətʋ,
ʋ lɩrɩ máŋá wa.
Kʋ wá yɩ̀ nə nətʋ máŋá mama wuuu,
kʋ ja vəli máŋá tə wa,
á nə wá jì ndə Zwezi-Kərisə nə.
20 À swə də,
à yà nə wulə á tətəŋi wa,
máŋá ka tə wa,
sə à swɩ̀n sʋ̀ràn duən á con,
tə nə wulə à bɩcan wa.
Kʋ nə tà nətʋ,
à mʋ̀ kʋ́ʋ̀ yəri kʋ tə,
à nə wá swɩ̀n á con.
Sara də Hagarə yoo
21 Á mʋ̀ lɩ̀à tə,
á nə pɩ̀à,
sə á twá Yɩɩ *nii tə nə,
ʋ nə pɩn *Moyizə nə,
á swɩ̀án yoo kʋ tə,
á bɩrɩ nə.
Á wà kʋ tə,
Yɩɩ nii tə nə bɩrɩ,
nì naaa?
22 Kʋ pʋ́pʋ́nɩ́ Yɩɩ sagɩ tə wa də,
*Abərahamə lɩrɩ bɩa bələ.
Ʋ mʋ̀ də Hagarə nə lɩrɩ bìú tə don,
ʋ mʋ̀ də Sara ga lɩrɩ ʋ don tə də.
Hagarə yà yɩ yoŋu,
yá Sara mʋ̀ yà tà yoŋu.
23 Bìú tə,
Abərahamə də yoŋu tə nə lɩrɩ duən nə,
yɩ kʋ twá də ləzwənə pùə́ fɩra.
Yá bìú tə,
ʋ mʋ̀ də kan tə,
ʋ nə tà yoŋu tə,
nə lɩrɩ duən nə,
yɩ kʋ twá də Yɩɩ nikanɩ tə.
24 Yìə̀n təntə tʋn,
sə tə bɩrɩ nəba yoo kʋ tə.
Kʋ mʋ̀ kana bələ təntə yɩ ndə Yɩɩ *nimarʋ bələ tə nə,
ʋ nə kàn də ʋ lɩ̀à tə.
Yoŋu Hagarə yɩ Yɩɩ nimarʋ tə,
ʋ nə tún də Moyizə *Sinayi paan tə yuu,
ʋ ga yɩ ywəŋə ʋ lʋrɩ.
25 Hagarə dàń yɩ ndə Sinayi paan tə nə,
kʋ nə wulə Arabi nagwanaa wa.
Vàn don də nə,
ʋ mʋ̀ nə yɩ ndə *Zwerizalɛmə tə nə,
kʋ nə wulə tɩa yuu zə̀n.
Kʋ tɩʋ təntə lɩ̀à tə mama yɩ ywəŋə.
26 Yá Zwerizalɛmə tə,
kʋ nə wulə Yɩɩ sàń nə,
yɩ ndə kan tə nə,
ʋ nə tà yoŋu.
Mə ʋ mʋ̀ nə yɩ nə nuu.
27 Kʋ pʋ́pʋ́nɩ́ Yɩɩ sagɩ tə wa,
kʋ wʋ́:
«Kan tə,
ʋ barɩ nə dʋgʋ wá,
wá lɩra bɩa,
ʋ doni kan tə,
ʋ nə wulə ʋ barɩ con.
Kʋ mʋ̀ nə pɩn,
n mʋ̀ kadɩŋʋ tə,
n nə ba bìú lɩrɩ,
n tə mɛ,
sə n kə n tɩ̀àn pupwən wa,
n ga mʋn n kə yɩɩ nə,
də n nə yəri bìú lɩrʋ nə yɩ̀ nətʋ tə mɛ.»
28 À nubɩa-ba,
á yɩ Yɩɩ bɩa cɩ́gá cɩ́gá.
Yɩɩ nə kàn nii təntə.
Á yɩ ndə *Yɩzakə nə,
Yɩɩ nə kàn nii də Abərahamə də,
ʋ wá lɩrɩ wá.
29 Abərahamə máŋá tə wa,
ʋ bìú tə,
ʋ nə lɩrɩ də ləzwənə pùə́ fɩra tə,
yà kəni càn bìú tə nə,
Yɩɩ-*Siŋu tə nə pɩn,
ʋ lʋrɩ.
Də zə̀n mama,
kʋ yoo təntə tə tʋŋa nətʋ.
30 Yá kʋ dàń pʋ́pʋ́nɩ́ Yɩɩ sagɩ tə wa,
kʋ wʋ́:
«Dɩŋɩ yonkan tə də ʋ bìú tə,
n pa ba vìí,
ʋ nə wà mɛ,
sə ʋ tì bìú tori n con tə yɩrɩ.
Kʋ yɩ kan tə,
ʋ nə tà yoŋu tə,
bìú nə mɛ,
sə ʋ tì bìú tori təntə!»
31 À nubɩa-ba,
kʋ mʋ̀ nə pɩn,
nə mʋ̀ tà yonkan tə bɩa,
nə dàń yɩ kan tə,
ʋ nə tà yoŋu,
bɩa.