Bacwan wulə Korɛntə Kərisə lɩ̀à púlí tə wa
5
1 À nì də,
lɩ̀à zənzən swɩ̀n á yoo,
də á tʋŋa bacwan á pwə́rə́ wa.
Kʋ bacwan təntə,
á nə tʋŋa tə,
lɩ̀à tə də tətə,
ba nə yəri Zwezi-*Kərisə,
ba tə yìə̀n təntə tʋŋa ba pwə́rə́ wa.
Ba swɩ̀n də,
á wa lìù don tì ʋ nyɩna kan,
ʋ ma fwa ʋ kan.
2 Kʋ yoo təntə yà mɛ,
sə kʋ ya pucʋnɩ,
kʋ pa aba.
Yá də kʋ nətʋ tə mama,
kʋ tə yɩ fwiə nə jə aba.
Kʋ yà mɛ,
sə á dɩŋɩ kʋ bɛɛ təntə,
ʋ nə tʋn kʋ yolwan təntə,
á lɩ á tətəŋi wa.
3 À mʋ̀ tətə tə̀lə́ də aba,
yá à pubʋŋa wa,
à wulə də aba kʋ yoo tə wa.
Kʋ mʋ̀ nə pɩn,
à mʋ̀ dí yáá à bʋ̀rɩ̀ kʋ bɛɛ təntə yolwan tə bʋra,
ndə kʋ ya à wulə də aba.
4 *Yuu-Tiu Zwezi yuu yɩrɩ,
à swɩ̀n á con,
sə á lwarɩ,
kʋ tə,
á nə mɛ,
sə á fwa.
Kʋ mɛ,
sə á jə̀ń duən yáá nə,
sə kʋ bɛɛ təntə bʋra ma bʋ̀rɩ̀.
À pubʋŋa tə wá yà də aba.
Yuu-Tiu Zwezi dɩ̀àn tə də wá yà nə tətəŋi wa.
5 Kʋ máŋá təntə,
á nə kun duən nə nətʋ tə,
sə á dàń dɩŋɩ kʋ bɛɛ təntə,
á lɩ á púlí tə wa,
sə ʋ va ʋ ya də *Sɩtana.
Sɩtana wá cʋ̀gʋ̀ ʋ yɩra tə,
sə Yɩɩ ga jon ʋ jə̀rə́ tə,
dɩɩn tə nə,
Yuu-Tiu Zwezi nə wá pìí ʋ bà,
ʋ bʋ̀rɩ̀ ləzoni tə bʋra.
6 Kʋ ba ziən,
sə á tì kʋ,
á ma fwa fwiə.
Á yə̀ə́ də,
ba nə pɩ̀à,
ba fwa dipɛn,
kʋ yɩ sabwarɩ mancɩn nə,
ba yàá ma pa dipɛn mun tə mama zàn tə ŋʋ̀nɩ̀.
7 Zwezi-Kərisə dàń nə yɩ nə *Pakə cànà tə *pabiə,
ba nə gʋa nə cʋna yɩrɩ.
Á dàń mɛ,
sə á lɩ cʋna nədwara tə,
tə nə yɩ ndə sabwarɩ nə,
á tətəŋi wa.
Sə kʋ pa á ya ndə dipɛn mun nədʋn nə,
sabwarɩ nə wà kʋ wa ken.
8 Kʋ mʋ̀ nə pɩn,
nə mɛ,
sə nə də́ cànà təntə də dipɛn tə,
kʋ wa nə ba sabwarɩ nədwan jə.
Nə dàń dʋŋa kʋ tə,
kʋ nə yɩ cʋna də wʋlʋŋʋ yìə̀n tə,
sə nə dàń ga ya lɩ̀à tə,
nə bɩcanɩ nə yɩ nəpwənə,
ba nə yɩ cɩ́gá lɩ̀à.
(Zwidə 22-23)
9 À sagɩ tə,
à nə pʋ́pʋ́nɩ́ á nə tə,
à swɩ̀n kʋ wa də,
á mʋ̀ də lɩ̀à tə,
ba nə pə̀ní duən vɛɛ vɛɛ tə dàn ká jə̀ń duən nə.
10 Də à nə swɩ̀n kʋ nətʋ,
kʋ tà lɩ̀à tə,
ba nə tà Kərisə lɩ̀à tə nə,
à swɩ̀n.
Ba mʋ̀ yɩ lɩ̀à tə,
ba nə pə̀ní duən vɛɛ vɛɛ,
ba duən yɩ lɩ̀à tə,
lɩ̀à wiən nə jə yimən tə pa ba,
ba duən yɩ lɩ̀à tə,
ba nə vɩrɩ lɩ̀à wiən də dɩ̀àn,
ba duən yɩ lɩ̀à tə,
ba nə pɩn dun woŋwanan tə nə,
ba ga dʋgʋ Yɩɩ vàn nə.
Də lìù nə ba pɩ̀à,
sə ʋ ya də kʋ lɩ̀à təntə,
kʋ tíú yɩ ʋ mɛ,
sə ʋ nan lʋʋ wa mɩ́ámɩ́án.
11 Kʋ tə,
à nə pʋ́pʋ́nɩ́ tə,
kʋ tà nətʋ.
Kʋ yɩ à pʋ́pʋ́nɩ́ kʋ á mʋ̀ lɩ̀à tə nə,
á nə yɩ nubɩa Kərisə yɩrɩ.
Də lìù nə wʋ́,
ʋ yɩ á nubiu,
yá kʋ tíú tə ga pə̀ní lɩ̀à vɛɛ vɛɛ,
nə à yə̀ə́ lɩ̀à wiən yimən nə jə wá,
nə à yə̀ə́ ʋ nə pɩn dun woŋwanan nə,
ʋ ga dʋga Yɩɩ vàn nə,
nə à yə̀ə́ ʋ nə twɩn lɩ̀à,
nə à yə̀ə́ ʋ nə nywɩn swana ʋ tətəli,
nə à yə̀ə́ ʋ vɩrɩ lɩ̀à wiən də dɩ̀àn,
á dànà ká jə̀ń də kʋ tíú.
Á mʋ̀ də kʋ tíú dànà ká də́ wodiu tətə də duən.
12 Á mʋ̀ Kərisə lɩ̀à tə bʋra yoo nə ywàŋá nə.
Lɩ̀à tə,
ba nə tà Kərisə lɩ̀à tə bʋra yoo ba nə ywàŋá.
Yá kʋ yɩ á də nə mɛ,
sə á bʋ̀rɩ̀ á púlí tə bʋra.
13 Yɩɩ nə wá bʋ̀rɩ̀ lɩ̀à tə,
ba nə tà Kərisə lɩ̀à tə,
bʋra.
Á dɩŋa lìù tə,
ʋ nə tʋŋa lwanɩ tə,
á tətəŋi wa,
á lɩ.