Nətʋ Kərisə lɩ̀à nə mɛ, sə ba ya
12
1 À nubɩa-ba,
à pɩ̀à,
sə à kwè aba,
Yɩɩ nə dəri nə yinəgə tə yɩrɩ.
Á pɩan á tɩ̀àn Yɩɩ nə,
ndə won nə,
ba nə ma fwa *joŋi.
Də á nə fwa nətʋ,
kʋ joŋi təntə yɩ ndə á mɩɩ nə,
á pɩn Yɩɩ nə,
yá kʋ ga wá poli ʋ pùə́ zənzən.
Mə kʋ mʋ̀ nə yɩ cɩ́gá cɩ́gá bʋra,
á nə bwɩ Yɩɩ nə.
2 Á kʋ́ʋ̀ dànà ká twá lʋʋ wiən fɩra nə.
Á kənə dɩ̀àn,
sə Yɩɩ pa aba pubʋndʋra,
sə kʋ pa á mɩɩ tə lwàń.
Kʋ mʋ̀ nə wá pa á yəni kʋ tə,
Yɩɩ nə pɩ̀à.
Yɩɩ pɩ̀à,
kʋ tə nə ziən,
kʋ tə nə poli ʋ pùə́,
də kʋ tə nə yɩ cɩ́gá.
3 Yɩɩ twá ʋ pubwanʋ tə nə,
ʋ pa à jì ʋ tʋtʋnʋ.
Kʋ mʋ̀ nə pɩn,
à wàá á lìù mama con à swɩ̀n,
sə ʋ dàn ká kə ʋ tɩ̀àn bwálɩ́ tə nə,
ʋ nə wà lá yí.
Yá á lìù mama dàń mɛ,
sə ʋ bʋ́n,
ʋ lwarɩ won tə,
Yɩɩ nə tarɩ ʋ pa wá,
kʋ twá də ʋ waa tə,
ʋ nə kən Yɩɩ nə.
4 Ləzwənə yɩra tə mama yɩ won nədʋ,
kʋ ga jə nandaran tə nə dáá.
Yá nandɔɔ mama də ga jə kʋ tʋtʋŋɩ,
kʋ nə ba nyɩn də kʋ don tʋtʋŋɩ.
5 Mə kʋ yɩ nətʋ nə də con,
nə nə yɩ Zwezi-*Kərisə lɩ̀à tə.
Nə dáá,
nə ga yɩ yɩra nədʋ.
Yá nə dàń marɩ duən nə,
ndə nandaran tə nə marɩ duən nə nətʋ.
6 Yɩɩ twá ʋ pubwanʋ tə nə,
ʋ pa tarpɩnan yirə yirə nə lìù mama nə.
Də Yɩɩ nə pɩn mʋ́ tarpɩʋn,
sə n wànɩ́ ʋ nii sʋ̀ràn n jon n swɩ̀n,
n mɛ,
sə n twá n waa tə nə,
n nə ken Yɩɩ nə,
n ma swɩ̀n tə sʋ̀ràn təntə.
7 Də Yɩɩ nə pɩn mʋ́ tarpɩʋn,
sə n tʋn,
n pa ba duən nə,
sə n twá kʋ nə,
n tʋn n pa ba.
Də Yɩɩ nə pɩn mʋ́ tarpɩʋn,
sə n kàrɩ̀ lɩ̀à duən,
sə n kàrɩ̀ ba.
8 Də Yɩɩ nə pɩn mʋ́ tarpɩʋn,
sə n kwè lɩ̀à,
sə n kwè ba.
Də Yɩɩ nə pɩn mʋ́ tarpɩʋn,
sə n pa wiən lɩ̀à nə,
sə n pa tə ba də n waa mama.
Də Yɩɩ nə pɩn mʋ́ tarpɩʋn,
sə n ya yáá tíú,
sə n tʋn kʋ yoo tə də yawala.
Də Yɩɩ nə pɩn mʋ́ tarpɩʋn,
sə n dəri lɩ̀à yinəgə zənzən,
sə n tʋn kʋ yoo tə də pupwən.
9 Á swə́nə́ lɩ̀à tə cɩ́gá cɩ́gá də á waa mama.
Á pɩan lwanɩ ya á culu.
Á vwiə á tɩ̀àn won tə nə,
kʋ nə ziən.
10 Á dàń swə́nə́ duən cɩ́gá cɩ́gá də á waa mama,
ndə nubɩa nə mɛ,
sə ba sóní duən nətʋ.
Á kənə kajaŋa,
sə á lìù mama zìlí ʋ don ʋ doni!
11 Á bibara á tʋn á pa *Yuu-Tiu nə də á waa mama!
Á dànà ká pa yayɩa zʋ aba!
12 Á fwa pupwən máŋá mama,
yala tə yɩrɩ,
á nə jə Yɩɩ con.
Á jana pɩ́nʋ́ càn tə wa,
á ga jʋn Yɩɩ máŋá mama.
13 Á pɩan wiən lɩ̀à tə nə,
ba nə yɩ Kərisə nə tɩ,
ba ga ba won jə,
sə ba ma san ba tɩ̀àn nə.
Ba tə,
ba nə twi ba zʋrɩ á dìə̀ wa,
sə á sɛ̀ á ja ba zəni.
14 Á lwərə Yɩɩ,
sə ʋ fwa zəni lɩ̀à tə yɩra,
ba nə kəni aba càn wa.
Á dànà ká lòrì Yɩɩ,
sə ʋ cʋ̀gʋ̀ ba.
15 Də lɩ̀à tə nə wulə pupwən wa,
sə á də ya pupwən wa də ba.
Ba nə kʋ́ʋ̀ yɩ ba wulə kwirə wa,
sə á də kwi də ba.
16 Á pɩan á pubʋŋa ya nədʋ duən yuu wa.
Á dànà ká pɩ̀à dun bwálɩ́,
á pa á tɩ̀àn nə.
Yá á dàń muŋə á tɩ̀àn duən yáá con,
sə kʋ pa á wànɩ́ á tʋn tʋtʋnbii tətə.
Á dànà ká bʋ́n á waa con də,
á yɩ yənu tɩ̀án.
17 Lìù mama nə fwa lwanɩ á yɩra,
á dànà ká fwa lwanɩ,
á ma ŋwɩ́n kʋ tíú.
Á kənə dɩ̀àn,
sə á fwa kʋ tə nə ziən lɩ̀à tə mama yáá con.
18 Á kənə dɩ̀àn,
á fwa kʋ tə mama,
á nə wàá,
sə á mʋ̀ də lɩ̀à tə ya duən nə də bɩcan sìə́,
də kʋ nətʋ yà nə wàá kʋ tʋŋa.
19 À nubisoni-ba,
á mʋ̀ dànà ká bʋ́n,
sə á tʋn lwanɩ,
á ma ŋwɩ́n lɩ̀à tə,
ba nə tʋŋa lwanɩ á yɩra.
Á dàń yá ba,
sə Yɩɩ lɩŋa zàn ba yuu wa.
Kʋ yoo təntə pʋ́pʋ́nɩ́ Yɩɩ sagɩ tə wa:
«Yuu-Tiu swɩ̀n,
ʋ wʋ́:
À mʋ̀ nə wá kə ba càn wa,
à ma ŋwɩ́n lwanɩ tə,
ba nə tʋn á yɩra.»
20 Kʋ tə nə kʋ́ʋ̀ ziən kʋ doni,
kʋ pʋ́pʋ́nɩ́ Yɩɩ sagɩ tə wa,
kʋ wʋ́:
«Də niən dàń nə jə n dʋŋʋ,
sə n pa wá wodiu,
sə ʋ də́.
Nanyʋnɩ nə kʋ́ʋ̀ jə wá,
sə n pa wá nɩ́á,
sə ʋ nyʋ.
Də n nə fwa nətʋ,
kʋ yɩ ndə məncala*f1* nə,
n tuŋə ʋ yuu wa.»
21 Dàn ká dʋgʋ n tɩ̀àn n pa lwanɩ də́ dɩ̀àn n yuu wa.
Tʋn zəni máŋá mama,
sə n mʋ̀ nə wànɩ́,
n də́ dɩ̀àn lwanɩ yuu wa.