Zwezi pori bɛɛ don yɩ́á
9
1 Dɩɩn don nə,
Zwezi tì cwəŋə don,
ʋ lɛ.
Ʋ nə ma lɛ,
máŋá tə wa,
ʋ nɩ bɛɛ don.
Ba lɩrɩ wá liliu.
2 Zwezi karbɩa tə ma bwe wá,
ba wʋ́:
«Karnyɩna,
ba lɩrɩ bɛɛ tə liliu.
Wàà nə tʋn cʋna>> Kʋ yɩ ʋ mʋ̀,
nə à yə̀ə́ ʋ nyɩna-ba nə tʋn cʋna,
kʋ ma pa ʋ yɩ liliu>>»
3 Zwezi le ba,
ʋ wʋ́:
«Kʋ tà ʋ mʋ̀ nə tʋn cʋna,
nə à yə̀ə́ ʋ nyɩna-ba nə tʋn cʋna.
Kʋ yɩ kʋ yí nətʋ,
sə Yɩɩ tʋ̀tʋ̀nán tə twá ʋ nə,
tə bɩrɩ tə tɩ̀àn.
4 À mɛ,
sə à tʋn Yɩɩ tʋ̀tʋ̀nán tə,
də tɩa tə wà yí.
Ʋ mʋ̀ Yɩɩ nə tʋn nə.
Tɩa nə twi ka yí,
lìù mama kʋ́ʋ̀ bá wànɩ́ ʋ tʋn.
5 Máŋá tə wa,
à nə tə wulə lʋʋ wa,
à yɩ ləzwənə poni.»
6 Zwezi nə swɩ̀n tə sʋ̀ràn təntə kwa nə,
ʋ pi mɩmɩan tɩa,
ʋ ma bu tɩran mancɩn.
Ʋ ga fwa tɩran təntə,
ʋ ma tà liliu tə yɩ́á nə.
7 Yá ʋ ga swɩ̀n ʋ con,
ʋ wʋ́:
«Vəli càrʋ́ tə wa,
ba nə boŋə “Silowe”,
n kwán nɩ́á,
n ma puli n yáá tə.»
Silowe tə də̀ń nə yɩ “lìù,
ba nə tʋn.”
Liliu tə vəli,
ʋ puli ʋ yáá tə.
Ʋ pìí ʋ bɩ̀àn,
máŋá tə,
ʋ yɩ́á tə pórí tə na lá zəni.
8 Ʋ jə̀ń duən,
də ba tə,
ba nə dí yáá,
ba na wá də,
ʋ lòrì tə,
dàń ma swɩ̀n,
ba wʋ́:
«Kʋ tà bɛɛ wà tə,
yà nə jə̀ə́ tɩa,
ʋ lòrì tə,
naaa>>»
9 Ba duən swɩ̀n,
ba wʋ́:
«Mə ʋ nə.»
Ba duən də swɩ̀n,
ba wʋ́:
«Kʋ tà ʋ mʋ̀.
Kʋ yɩ ʋ nyɩnyɩga.»
Bɛɛ tə tətə dàń ma swɩ̀n,
ʋ wʋ́:
«Kʋ cɩ́gá ya à mʋ̀!»
10 Ba dàń ma bwe wá,
ba wʋ́:
«Nətə nə kʋ twá,
n yɩ́á tə ma pori>>»
11 Ʋ ma le ba,
ʋ wʋ́:
«Bɛɛ tə,
ba nə boŋə Zwezi tə,
nə fwa tɩran,
ʋ ma tà à yɩ́á tə nə,
ʋ ga swɩ̀n à con,
sə à va à puli à yáá tə càrʋ́ tə wa,
ba nə boŋə “Silowe.”
À ma va lá,
à nə puli à yɩ́á tə à zwɛ̀,
kwa nə,
à yɩ́á tə na lá.»
12 Ba tə ma bwe wá,
ba wʋ́:
«Bɛɛ təntə wulə yə̀n nə>>» Ʋ ma le ba,
ʋ wʋ́:
«À yəri ʋ bwálɩ́.»
Farɩzɩan-ba tə bwe liliu tə, ʋ yɩ́á nə pori tə
13 Ba dàń ma ja bɛɛ tə,
ʋ yɩ́á tə nə pori tə,
ba ja va *Farɩzɩan-ba con.
14 Dɩɩn təntə yɩn *Zwifə-ba *sìə́ dɩɩn,
yá Zwezi ga fwa tɩran,
ʋ ma pori bɛɛ tə yɩ́á.
15 Kʋ mʋ̀ nə pɩn,
Farɩzɩan-ba də kʋ́ʋ̀ bwe bɛɛ tə,
ba wʋ́:
«Kʋ fwa nətə,
n yɩ́á tə ma pori>>» Ʋ le ba,
ʋ wʋ́:
«Zwezi fwa tɩran mancɩn,
ʋ kə à yɩ́á tə nə.
À vəli à puli à yáá tə.
Mə kʋ nə,
à na lá.»
16 Kʋ yoo təntə yuu wa,
Farɩzɩan-ba wa lɩ̀à swɩ̀n,
ba wʋ́:
«Kʋ bɛɛ təntə wà Yɩɩ nan.
Kʋ mʋ̀ nə pɩn,
ʋ ba sìə́ dɩɩn tə nii zìlí.»
Ba duən də kʋ́ʋ̀ swɩ̀n,
ba wʋ́:
«Nətə nə cʋna lìù wá twá,
ʋ ma fwa Yɩɩ dɩ̀àn mɩmɩnʋ tətə yiri>>» Kʋ nətʋ tə pɩn ba pwɛ̀ duən wa.
17 Ba kʋ́ʋ̀ bwe bɛɛ tə,
ʋ yà nə yɩ liliu tə,
ba wʋ́:
«N mʋ̀ con,
n bʋŋa də bɛɛ təntə,
ʋ nə pori n yɩ́á tə,
yɩ wàà>>» Bɛɛ tə ma le ba,
ʋ wʋ́:
«Ʋ yɩ Yɩɩ nii *sʋ̀sʋ̀nʋ̀.»
18 Zwifə-ba yun tɩ̀án tə wà cɩ́gá pɩn də,
ʋ tətə yà yɩn liliu,
yá ʋ yɩ́á tə ga pori.
Kʋ mʋ̀ nə pɩn,
ba ma bon ʋ nuu də ʋ nyɩna.
19 Ba nə twi ba yí lá,
ba bwe ba,
ba wʋ́:
«Bɛɛ wà tə cɩ́gá ya á mʋ̀ bìú,
naaa>> Cɩ́gá mama,
á wʋ́ ʋ yɩ ba lɩrɩ wá liliu>> Kʋ dàń fwa nətə,
ʋ ma na lá>>»
20 Ʋ nuu də ʋ nyɩna tə ma le,
ba wʋ́:
«Nə yə̀ə́ də,
ʋ ya nə mʋ̀ bìú,
yá ʋ ga yɩ ba lɩrɩ wá liliu.
21 Kʋ nə fwa nətʋ,
ʋ dàń ma na lá sɩ́ʋ́n nə,
nə yəri kʋ mʋ̀.
Nə ma kʋ́ʋ̀ yəri lìù tə də,
ʋ nə pori ʋ yɩ́á tə.
Á bwiə ʋ tətə,
ʋ də yɩ nəkwɩa,
ʋ wàá ʋ tətə yoo ʋ swɩ̀n.»
22 Zwifə-ba yun tɩ̀án fən yà jə ʋ nuu də ʋ nyɩna tə.
Kʋ mʋ̀ nə pɩn,
ba swɩ̀n kʋ nətʋ tə.
Zwifə-ba yun tɩ̀án yà ken nii nədʋ,
sə ba dɩŋɩ lìù tə mama,
ʋ nə wá swɩ̀n də,
Zwezi nə yɩ *Kərisə,
ba lɩ ba *jə́rə́ dìə̀ tə wa.
23 Kʋ mʋ̀ nə pɩn,
ʋ nuu də ʋ nyɩna tə ma swɩ̀n də,
ʋ də yɩ nəkwɩa,
ba bwiə ʋ tətə.
24 Farɩzɩan-ba kʋ́ʋ̀ bon liliu tə,
ʋ yɩ́á tə nə pori tə,
nɛɛ bələ nii nə,
ba swɩ̀n ʋ con,
ba wʋ́:
«Swɩ̀n cɩ́gá Yɩɩ yáá con.
Nə mʋ̀ yə̀ə́ də,
bɛɛ wà tə yɩ cʋnʋ.»
25 Ʋ le ba,
ʋ wʋ́:
«Də ʋ nə yɩ cʋnʋ,
à mʋ̀ yəri kʋ.
Yoo nədʋ nə,
à yə̀ə́.
À yà yɩ liliu,
yá sɩ́ʋ́n nə à yɩ́á dàń na lá.»
26 Ba ma swɩ̀n ʋ con,
ba wʋ́:
«Nətə nə,
ʋ fwa mʋ́>> Kʋ yɩ ʋ fwa nətə,
ʋ ma pori n yɩ́á tə>>»
27 Bɛɛ tə kʋ́ʋ̀ le ba,
ʋ wʋ́:
«À dí yáá à swɩ̀n kʋ,
à bɩrɩ aba,
yá á wà kʋ cʋgʋ.
Bɛ̀ɛ̀ nə pɩn,
á pɩ̀à,
sə à kʋ́ʋ̀ pìí à bwɛ́ kʋ>> Kʋ yɩ á də tətə pɩ̀à,
sə á jì ʋ karbɩa,
naaa>>»
28 Ba dàń twɩn wá,
ba ga swɩ̀n,
ba wʋ́:
«Kʋ yɩ n mʋ̀ nə ya ʋ karbiu,
nə mʋ̀ yɩ *Moyizə karbɩa.
29 Nə yə̀ə́ də,
Yɩɩ swɩ̀n Moyizə con.
Ʋ tə ba tə mʋ̀,
nə yəri bwálɩ́ tə,
ʋ nə nan.»
30 Bɛɛ tə ma le ba,
ʋ wʋ́:
«Mə kʋ yoo təntə nə gwárɩ́ nə də,
á nə yəri ʋ nə nan lá,
yá ʋ ga pori à mʋ̀ yɩ́á.
31 Nə yə̀ə́ də,
Yɩɩ ba cʋnʋ yɩjʋnɩ le.
Kʋ ya lìù tə,
ʋ nə zìlí Yɩɩ nii,
ʋ ga tʋŋa Yɩɩ fɩra nə,
Yɩɩ yàá cʋgʋ.
32 Nə tə wà nì mama abada də,
lìù pori liliu yɩ́á,
ba nə lɩrɩ wá,
də ʋ yɩ nətʋ.
33 Də bɛɛ təntə yà nə wà Yɩɩ nan,
ʋ yà wàrɩ̀ won mama,
ʋ tʋŋa.»
34 Ba ma le wá,
ba wʋ́:
«N tətə mama yɩ ba lɩrɩ mʋ́ cʋna wa,
n ga pɩ̀à,
sə n kàrɩ̀ nəba!»
Ba dàń ma dɩŋɩ wá,
ba lɩ ba jə́rə́ dìə̀ tə wa.
35 Zwezi dàń nì də,
Farɩzɩan-ba dɩŋɩ bɛɛ tə,
ʋ yà nə yɩ liliu tə,
ba lɩ ba jə́rə́ dìə̀ tə wa.
Zwezi ma jəri bɛɛ tə,
ʋ bwe wá,
ʋ wʋ́:
«N ken n waa *Ləzwənə-Biu*f1* tə nə,
naaa>>»
36 Bɛɛ tə le Zwezi,
ʋ wʋ́:
«Kʋ mʋ̀ nə yɩ wàà,
*Yuu-Tiu>> À swə,
sə à kə à waa ʋ nə.»
37 Zwezi ma swɩ̀n ʋ con,
ʋ wʋ́:
«N yɩ́á cə kʋ tíú yuu wa.
Mə ʋ mʋ̀ nə wulə ʋ swɩ̀n n con,
sɩ́ʋ́n nə!»
38 Bɛɛ tə dàń ma swɩ̀n,
ʋ wʋ́:
«Yuu-Tiu,
à ken à waa n nə.»
Yá ʋ ga tʋ ʋ nadwana yuu,
ʋ bʋ Zwezi nə.
39 Zwezi dàń ma swɩ̀n,
ʋ wʋ́:
«À twi lʋʋ kʋ tə wa,
sə à bʋ̀rɩ̀ lɩ̀à bʋra.
À pa lilirən yɩ́á pori,
à ga pa lɩ̀à tə,
ba yɩ́á nə na lá,
lwàń ba jì lilirən.»
40 Farɩzɩan-ba lɩ̀à duən yà wulə kʋ bwálɩ́ tə wa.
Ba nə nì tə sʋ̀ràn təntə,
ba bwe Zwezi,
ba wʋ́:
«Nə də yɩ lilirən,
naaa>>»
41 Zwezi le ba,
ʋ wʋ́:
«Á yà nə ya lilirən,
á yà ba cʋna jə.
Á dàń nə swɩ̀n də,
á na lá.
Kʋ mʋ̀ nə pɩn,
á cʋna tə wulə wuuu.»