Yudhà
andí bhàrʉwà
Yàrɨ́ bhàrʉwà ɔ̀ ɨ̀ nòtù ádrɔ̀drɔ̌ dhu tɨ́ dhu
Yàrɨ́ ídǒ bhàrʉwà nandí nɨ́ «Yudhà, Yàkɔbhɔ̀ t’ádɔ̀nà» tɨ́ kátɨna alɛ (1). Ndɨ Yudhà mà adɔ̀nà Yàkɔbhɔ̀ mànà ɔ́yɔ̌rɔ̀ kɔ́rɔ́ nɨ’ɨ̀ Yěsù t’ádɔ́ná-nzo (Màt 13.55). Kǎndí ndɨ pbɨ̀ndà bhàrʉwà mbɛ̀mbɛ̀ azà kumì atɔ ʉ́dà Yěsù Krɨ́stɔ̀ ka kʉ́gʉ̀ dhu-dzidɔ̌ rɔ́rɔ̀.
Ndɨ andítá rɨ̌ dhu ɨ̀tɛ̀ Yudhà rambɛ́nà dhu ɔ̀vɔ̀ dɔ̌ atdí kànɨsà tɔ̀, ndɨrɔ̀ ngǎtsi nɨ̌ ibí kànɨ́sá tɔ̀. Pbɛ́tʉ̀, ka kʉ̀nɨ nzá atdí kànɨsà mà abádhí nzínzì ɔ̌ náarɨ́’ɨ̀ ɔ̀nà kɨgɔ̀. Pbɨ̀ndà bhàrʉwà ɔ̀, kǐtsu átɔ̀ Ungbòta-Ayɨ́ ɔ̀ bhǔkù mà Pbàyàhúdí tɔ́ ngʉ̌kpà andítá mànà ɔ̀ arɨ́’ɨ̀ ɨrɛ̀ta. Nɨ́ ka kɨ̀rɛ̀ dhu nɨ́ kǎndí dhu fɨ̌yɔ̀ ábhɔ̌ alɛ rɨ’ɨ̀ pbàkrɨ́stɔ̀ tɨ́ rɨ́’ɨ̀ Pbàyàhúdí.
Yudhà ɨ’ɨ̀ nà ɨrɛ̀ta nɨ́ pbàkrɨ́stɔ̀ tɔ̀ ndɨ̀ ndɨ́ dhu àndǐ Yěsù arɨ́ ìndrǔ ɨ̀gʉ̌ dhu dɔ̌ nɨ̌ ɨrɛ̀ta (3). Pbɛ́tʉ̀, kǎla dhu nɨ́ dhu ràkǎ ndìtdyu abádhí-nyɨ̀kpɔ́ tsàkàtsàkà nyʉ́ abádhí nzínzì ɔ̀ ɨ̀ nítsu pbàkrɨ́stɔ̀ tɨ́ arɨ́ ’àtɨ alɛ rɔ̌ rɔ̀ (4). Ɨ alɛ owúnà ’àtɨ̀ rɔ̌ pbàkrɨ́stɔ̀ tɨ́, pbɛ́tʉ̀ ɨ̀nzɨ̌ ’àdʉ̀ Kàgàwà nyʉ́ ná’ù. Ndɨrɔ̀ abádhí nɨ’ɨ̀ mʉ̀nyɔ̀nɨ̀tálɛ.
Bhàrʉwà-nyɨ̀tɨ̀ ka kóhù tɨ́ dhu
- Bhàrʉwà-dɔ̀kpa (-1-2).
- Yudhà rɨ̌ pbàkrɨ́stɔ̀ àvǐ rùgyè ɨ̀, ’ɔ̀dɔ̀ yà atdí-gʉ̀na tɨ́ Kàgàwà íbhò pbɨ̀ndà dhu tɨ́ arɨ́’ɨ̀ alɛ tɔ̀ a’uta mběyi (-3-4).
- Yudhà rɨ̌ Ádrʉ̀ngbǎlɛ Kàgàwà ɨtdɨ̀ya atdídɔ̌ pbàkrɨ́stɔ̀ tɨ́ arɨ́ ’àtɨ alɛ, pbɛ́tʉ̀ ɨ̀mbǎ ’àdʉ̀ ɨ̀’ɨ̀ pbàkrɨ́stɔ̀ tɨ́ alɛ-ànyǎ tɨ́ dhu tɔ́ atdídhená ɔ́fɔ̀ nɨ́tɛ̀ dhu (-5-19).
- Yudhà rɨ̌ pbàkrɨ́stɔ̀ ònzi ròwù angyi tɨ́ fɨ̀yɔ́ a’uta ɔ̌, ndɨrɔ̀ ròngò ídzìnga ɔ̀nzɨ̀ yà afíya arúguru Yěsù ɨ̀ á’ù dhu dɔ̌ alɛ tɔ̀ dhu (-20-23).
- Yudhà rɨ̌ Kàgàwà ɨ̀fʉ̌ pbɨ̀ndà ádrʉ̀ngbǎnga tɔ́ ɔbɨ-okú dɔ̀ rɔ̀ dhu. Ndɨ ɔbɨ nɨ̌, Kàgàwà arɨ́ pbɨ̀ndà alɛ-ngbɔ̀ ɔ̀dɔ ndɨ́nɨ̌ oko tɨ́ rɔ̀ná ɨ̀ ápbǎ ɨ̀ rɔ́rɔ̀ tɨ́ (-24-25).