Tìmɔ̀tɛwʉ̀
tɔ̀ Pɔlɔ̀ andí wɛmbɛrɛ̀ tɨ́ bhàrʉwà
Yàrɨ́ bhàrʉwà ɔ̀ ɨ̀ nòtù ádrɔ̀drɔ̌ dhu tɨ́ dhu
Yàrɨ́ nɨ́ wɛmbɛrɛ̀ tɨ́ Pɔlɔ̀ andí Tìmɔ̀tɛwʉ̀ tɨ́ kátɨna kpatsìbhíngba tɔ̀ bhàrʉwà. Ndɨ Tìmɔ̀tɛwʉ̀ nɨ’ɨ̀ Àziyǎ-Ngba tɔ́ pbìrì ɔ̌, Lístrà tɨ́ kátɨna kɨgɔ̀ ɔ̌ alɛ. Kòmbí ka karɨ́ ndɨ pbìrì ànzi Tùrùkiyà tɨ́. Kà t’ábanà nɨ’ɨ̀ Mʉ̀gìrikì, kà-tsánà Èwùníkè ràdʉ̀ ɨ̀’ɨ̀ Mùyàhudì-àyi (Kas 16.1). Ɨ́yàdhíyà mà ɨ́yànà mànà nɨ’ɨ̀ pbàkrɨ́stɔ̀ (2Tì 1.5).
Pɔlɔ̀ arà Kàgàwà bhà Ídzì Màkʉ̌rʉ̀ nʉ́nɔ̀ Lístrà. Nɨ́ Tìmɔtɛwʉ̀ ɨrɨ kà rǎwɛ̌na Yěsù dɔ̌ dhu, ndàdʉ̀ ndɨ Yěsù à’ù (Kas 16.10). Ndɨ dhu-dzidɔ̌, Pɔlɔ̀ adʉ̀ kòvò ’òngò kasʉ ɔ̀nzɨ̀ mànà atdíkpá.
Tìmɔ̀tɛwʉ̀ ʉnda Pɔlɔ̀ ibí-gʉ̀na nyʉ́ pbɨ̀ndà abhi ɔ̌ (Kas 16.1-5). Ndɨrɔ̀, Yěsù ná’ù alɛ tɔ́ a’uta nádù ndɨ̀ olù, ngǎtsi nɨ̌ vurò dhu ùdhě ka kɨ́ ìndrǔ tɔ̀ Yěsù bhà Ídzì Màkʉ̌rʉ̀ rɔ̌ rɔ̀ ɔ̀ná atdí kɨgɔ̀ mà ndɨ̀ ndɨ̀rɨ̀ rɔ̀, Pɔlɔ̀ ongónà ndɨ Tìmɔ̀tɛwʉ̀ òvì ràrà ìndrǔ-afí nópè ányɨ̀. Ndɨ dhu bhěyi nɨ́ ndɨ kǎvì ka atdíku ràdɨ Ɛ̀fɛsɔ̀ tɔ́ kɨgɔ̀ ɔ̌, pbàkrɨ́stɔ̀-afí nopé tɨ́ (1Tì 1.3). Nɨ́ yàrɨ́ bhàrʉwà náatù ka ányɨ̀. Ka kɨrɛ̀ nga Pɔlɔ̀ randí ka azà kumì dɔ̀ná ɨ̀bhʉ nà atɔ mà azà kumì dɔ̀ná imbò nà atɔ mànà nzínzì ɔ̌ Yěsù ka kʉ́gʉ̀ dhu-dzidɔ̌. Ndɨ kàsʉmɨ̀ ɔ̌ Pɔlɔ̀ ɨ’ɨ̀ ɨwà ndɨ̀ ndóngò mʉ̀là tɨ́ rɔ́, Tìmɔ̀tɛwʉ̀ ràdʉ̀ ɨ̀’ɨ̀ mbɛ̀mbɛ̀ ɨ̀bhʉ kumì dɔ̀ná imbò nà atɔ nà.
Bhàrʉwà-nyɨ̀tɨ̀ ka kóhù tɨ́ dhu
- Bhàrʉwà-dɔ̀kpa (1.1-2).
- Pɔlɔ̀ rɨ̌ Tìmɔ̀tɛwʉ̀ àvǐ rɔ̀sɔ̀ tɨ̀tɔ̀ tɔ́ màlímó dhu (1.3-11).
- Pɔlɔ̀ rɨ̌ ɔ̀tsɔ̀ àbhʉ̌ Ádrʉ̀ngbǎlɛ Kàgàwà tɔ̀ kàbhà ídzìnga-okú dɔ̀ rɔ̀ dhu (1.12-20).
- Pbàkrɨ́stɔ̀ ròngò ’ɨ̀tsɔ̀ kɔ́rɔ́ alɛ dɔ̌ dhu (2.1-15).
- Kànɨsà ɔ̌ ádrɔ̀drɔ̌ alɛ àkǎ kovò tɨ́ dhu (3.1-16).
- Tìmɔ̀tɛwʉ̀ àkǎ ndòngò dhu ùdhe pbàkrɨ́stɔ̀ tɔ̀ ɔ̀ná ɔ́fɔ̀ (4.1-16).
- Tìmɔ̀tɛwʉ̀ àkǎ ndɔ̀nzɨ̀ kasʉ kànɨsà ɔ̌ kɔ́rɔ́ alɛ-tɨdɔ̀ mànà tɨ́ dhu (5.1–6.2).
- Pɔlɔ̀ rɨ̌ Tìmɔ̀tɛwʉ̀-nyɨ̀kpɔ́ nítdyǔ tɨ̀tɔ̀ tɔ́ màlímó rɔ̌ rɔ̀ dhu mà kàkǎ ndàbhʉ sedzà ònzìtálɛ tɔ̀ ɨ̀nzɨ̌ rʉ̀lɨ fɨ̀yɔ́ a’uta fɨ̀yɔ́ ònzì ɔ̀ dhu mànà dhu (6.3-21).