Ukalata ughwa kwanda ughwa Paabhuli ku
Bhakolinti
Shiisho shikutangila
Ukalata uyu akasimbighwa nu Paabhuli, umutumighwa ughwa Yeesu Kilisiti. Shikulangisha ukuti akasimba ukalata uyu bhwo ali mu kaaya aka Efesi mu chinja icha malongo mahaano ni fyinja finna (54) bhwo uYeesu aapaapighwa. Akachisimbilagha ukalata uyu ichibhughutila icha bhiitiki abha mu kaaya aka Kolinti bhaabho akabhalumbilila iNongwa iNyiisa isha Yeesu kukwabho. Loole bhwo uPaabhuli aatiila mu kaaya ako, abhiitiki abho bhakaanda ukuyabhanika mu lwitiko.
Akaaya aka Kolinti kakabha kaaya kaako kakafumukwa leka mu chiisu icha Bhughiliki na mu bhunyafyale bhwoshi ubhwa Looma ku nongwa iya kuti kakabha kaaya kaako kakabha nu munaalo umukulu. Abhandu abhingi ukufuma imbafu shooshi bhakabhuukagha mu kaaya ako pakughulisha nu kughula utundu tuutwo bhakatulondagha. Ku nongwa iyo, akaaya ako kakabha na bhandu abha tuyiilo utwa luko nu luko.
Inyango iya Paabhuli ukusimba ukalata uyu yikabha ya kubhasoka abhiitiki abho ku sha kuyabhanika nu kukaanikana mu lwitiko. Soona akabhasokagha abhiitiki abho ku sha bhushipani.
Inyango inine yikabha ya kubhamanyisha abhiitiki muumwo bhakulondighwa ukwikalila mu bhweghi, akabhamanyishanga isha lubhaatiko ulwa nyipuuto, isha fikungilwa ifya Mbepo uMwelu, isha muumwo bhakulondighwa ukwikalila pakati pa bhandu bhaabho bhatakumwitika uChaala ni sha kushuuka ukwa bhafwe.