Juda
RUI HYMEI TATDYN
1
1 Jisu Khrista bangc khatni Jakob chana Judas rui—
Pu Ravguangc rui nzianmei khatni Jisu Khrista rui gaeklou bammei kawloumei nunc khang hymei—
2 Zauzian, chuzaenghmei, khatni nzianmei nangniw khou padikna nai bam di tho.
Kachangc Hamhmei Dinhmei nunc
3 Nzianmei thiu, aniu kadam laa nchamc bammei ringcbamv lam khou nangniw khou hy niina bam tuang e; tiki Ravguangc rui nthanmei nunc aniu khang tiiloumei kalaic dat lakmei lwmmei khang hei adow khang, nangniw ta katiulou mak nuh mak khe twmei alung khou guang dat the. 4 Kalam thu, kaniw tuang nthah boulahmei taanv gum bin khang Ravguangc zauzian chamv ta sw mbianghmei nunc, aniu tuang akhat namei Kaipouc Poubauhmei Jisu Khrista ta laalou makmei nunc, rey khou rui kaniw ruc khou latzan keylou tangmei, rav ta thay makmei nunc aniu pang khou nkamhna tiap gut bam the.
5 Mi hei nangniw thay tangv bammei tuang di the; tiki tiningtowlou datpui tuang e. Twmei thu, Israelmei ta Ijipt khou rui gu patloumei Poubauhmei a kamei rui lwm makmei guay ta swmaan dat kan e. 6 Kaniw khang tiiloumei ngamv paengc thangc patna, kaniw tuang lwngbamv mpatlou kanmei kauh baanchara nunc ta tei ningtow o. Kaniw ta tingsaengzaeng kangriang rui ntana kabangc zinghmei bamv thangc bangclou kan the. 7 Sodom lev Gomorra khatni mi tuang kainingmei kaidai guay ta tei ni ningtow o. Mi kaidai guay khou lungc bammei nunc tei, mi kauh baanchara nunc tei kumcna nthah boulahna kariak twanmei taanv taanh khou rui tingsaengzaeng mai khou meic guay khang sw nchinmei tuang swna ryanra khaengv the.
8 Mi hei kumcna, kaniw tuang ndawman rui kaniw pumc sw-mphuam the; kapy swmei ngamv ta chakhwang sw mak khe khatni hymdaihmei nunc ta ramh sak makna sa the. 9 Kauh baanchara kapy Mikhael sini mi tei kumcna sw kan mak e. Kamei Mousi pumc ta asutna Ravsic lev agaypui ganv khou, kamei latsic sana karuc khou latzan kauc pat kan mak e; tiki "Poubauhmei rui nang ta luh e!" twna sa kan e. 10 Tiki kaniw thu kaniw kabah thay mak makmei ta sakasicna athwng e. Kaniw rui thaymei kiu khouringh kumcna kalwnlung tuang lungning khou rui pat patmei tei taancna mi tei rui kaniw ta swmaanmei hei e. 11 Kaniw hei sansi e dav! Kaniw Kain chaeng tat kan the. Syan khang kaniw Balaam tuang khuay khou tei keylou kan the. Kaniw Kora kumcna kapy ta liamna maanmei khou keylou kan the. 12 Kaniw nangniw tuang nzianmei napngai khou ping zak thay makna tu zangv mbana bammei tei laimiak teylou kumh tuang e. Kaniw bung khang na kakhanhmei nunc e. Kaniw hei mpwan rui phungc tat bammei ting maekmei muangc tei kumhmei e. Kaniw hei tingsei mun nganv kathai nthai makmei, phuai patlou tina theic kangc bammei bang tei kumhmei e. 13 Kaniw hei duipui dui luat kumhmei e; kaniw tuang zakmei taanv guay tei dui phwan kumcna phuangc thau e. Kaniw hei kabamv kazy thay makna samc bammei gaanchuangcna nunc, kaniw bamv khang kabangc thangc tingsaengzaeng zinghmei khou chamdaanvlou bammei nunc kumhmei e.
14 Adam khou rui kin chaneimei khou lungcloumei Enok rui ravmundincna sa e: "Poubauhmei katuang baanchara aching aching ta nduanghna guang e. 15 Meic guay ta latzan sw khang e—Rav ta thay makmei nunc ta, kaniw rui Rav ta thay makna taancloumei taanv guay khatni Rav ta thay makmei paapcmei nunc rui karuc khou latsic latrouc salou kanmei guay khang tei riap khang e!"
16 Kaniw hei kaganv kathuic khanc, pianmei maek e; kaniw tuang simei kahawmei khou lungc e; kaniw gaengh swna latsav daic e khatni kaniw khang gaeng nimei khou sathuanc thay e.
Kasiaththay khang Dincloumei
17 Nzianmei thiu, aniu Poubauhmei Jisu Khrista tuang Latdiutatmei nunc rui nangniw khou dinc kasuakcloumei tei ningtow o. 18 "Nkhamhpui ganv khou, kaniw tuang Rav ta thay makmei kahawmei khou tat bammei sinnui sinnumei nunc guang puni," twna kaniw rui nangniw khou salou kan the. 19 Kaniw hei kalangv tipatmei nunc e, mbaanv chwn phunghmei nunc e, Ravguangc Bumaengc maekmei nunc e. 20 Tiki, nzianmei thiu, nangniw thu nangniw ta nthan liangmei lwmmei panty khou kasiamh thau o. Bumaengh Nthanmei paan rui huayney bam o; 21 khatni Poubauhmei Jisu Khrista rui kazauzian paan rui ringcsuangmei tiilou nimei ta nkhwan bam khou hei, nangniw Ravguangc tuang nzianmei khou tei bam o. 22 Lwmsimei nai bammei nunc ta tei nzianlou o; 23 gaanv saekc ta mai khou rui kathangv patna gulou o; khatni gaanv saekc khou ping kadanna zauzian lyanlou o. Tiki kaniw pumc tuang kahawmei rui sw-mphuammei pheybaan ta tei thu karaeng o.
Suaic Samcloumei
24 Nangniw ta bow mak khang gaeklouna, hiaksuimei swna khatni neihlana hymdaihmei kapamv khou phungc guanglou ngammeipu— 25 akhat namei Racguangc khatni Guloumeipu khang, aniu Poubauhmei Jisu Khrista paan rui, hymdaihmei, tikguncdaihmei, pumtan khatni ngamv hei reynungc ni, ntaw ni, tingsaengzaeng khang sw diu! Amen