John
RUI HYMEI KATHUMHMEI TATDYN
1
1 Gaanvdaih ai rui—Ai kalingna nzianmei Gaias khang hymei:
2 Kungcna nzianmei, ramh lam guayna khou nang khang gaymei rana ariw bam khang khatni nang bumaengh khou gayna bammei kumcna nang pumc ni gayna bam khang ai huayney bam e. 3 Aniu chana punav gaanv saekc guangna nang nchumhmei khou lwmnuhmei swna bammei khatni nang nchumhmei khou lungc bammei chamv tei raclou pwkhou akhang mpeyna neihla e. 4 Anac nunc nchumhmei khou lungc bam e twmei chamv chuna neihlamei suangc baihmei neihlamei maek e.
Gaia ta Thuanhmei
5 Kungcna nzianmei, nang rui chana punav nunc, gin ga swna guangmei nunc khang sw chuyna swlou bammei hei lwmnuhmei taanv e. 6 Kaniw rui mi khou hei guangna nang ramzian tei phwamling khou raclou the. Kaniw tuang chaengtat khou tei Ravguangc rui pianlou nuhmei thak khou kaniw ta nkhavlou tio. 7 Kalam thu kaniw tei Khrista tuang taanv khang tat pat kan tuang e, kumna Jentailmei nunc rui thu kaniw ta nkhavlou mak khe. 8 Kum thena, aniu rui kaniw ta nkhavlouna kaniw rui nchumhmei khang taanc bammei khou hei kadam laa nchamclou nina the.
Diotrephis lev Demitrias
9 Ai rui phwamling khang duimei tatdyn hylou kan tuang e; tiki kapy sw niimei Diotrephis tei ai rui samei tei chulou mak khe. 10 Kumna ai guang pwkhou kiu, kataanv guay tei phungc pat pwni: kamei rui saraemcna aniw ta sakasicna sa kanmei; mi na tei rui kakhang pian makna, Khristian chana punav nunc guangmei ta tei kamei rui laalou makmei na hamhna, laalou niimei nunc ta sini thingc lana kaniw ta phwamling khou rui alay ganc khang swmei, mi guay hei e.
11 Kungcna nzianmei, simei ta lay nzeic riu; gaymei ta lay nzeic o. Gaymei taanhmei guay tei thu, Ravguangc tuang e; simei taanhmei tei thu Ravguangc ta how mak e.
12 Meic guayna rui Demetrias ta sa chuy bam e; nchumhmei kahak rui ni sa chuy bam e. Aniw rui ni kalam khou mi tei kumcna sa bam muai e. Kumna aniu sa bammei hei kaling e twmei nang thay e.
Kady Kanavloumei
13 Ai nang khou sa khang mpeyna nai he; tiki tatdyn swna hy nii mak khe.
14 Ai nang ta asaanh mak khou ariw khang lwmgay bam e. Mi khou kiu rui zaw lev zaw puanc kariuna rac di kho.
15 Nang khou chuzaenghmei nai diu. Nang pam guay rui dwangay kady e. Aniw pam guay ta gaanv khat gaanv khat swna dwangay kady e twna salou o.