5
Aniu rui Mbaanv ta Ngammei
1 Thow pwni Jisu hei Khrista e twna lwmmei mei tei Ravguangc nac the. Pu ta nzianpui mei tei kanac ta ni nzian e. 2 Aniu Ravguangc nac nunc ta nzian e twmei aniu thaymei kiu thu: Ravguangc ta nzianmei khatni katuang latdanv guay piumei khou nai the. 3 Kalam thu aniu rui Ravguangc ta nzianmei twmei hei katuang latdanv guay piumei hei the. Katuang latdanv guay hei aniu piu ngam lakpui tuang hamh e. 4 Kalam thu Ravguangc nac guay thu mbaanv ta ngam the. Kumna lwmmei paan rui aniu mbaanv ta ngam the. 5 Mbaanv ta ngammei kiu thow tei cho? Jisu hei Ravguangc Nac Mpouh e twna lwmmei nunc tei e.
Jisu Khrista tuang Sakhi
6 Jisu Khrista hei dui lev zei rui sakhi swna guang tuang e. Dui na rui hamh e; dui lev zei mi kanei rui e. Mi hei nchumhmei e twmei Bumaengh kahak rui sa the. Bumaengh hei thu nchumhmei e. 7 Sakhi kathumh nai e. 8 Mi kiu thu: Bumaengh, dui khatni zei e. Mi kathumh tuang sakhi hei nchamc e. 9 Aniu maansei tuang sakhi ta lwm e; tiki Ravguangc tuang sakhi thu tanc ranv e, kumna kamei rui Kanac Mpouh lam khou katuang sakhi tiilou the. 10 Ravguangc Nac Mpouh khou lwmloumei kathuic lungc khou mi sakhi hei nai the; tiki Ravguangc ta lwm makmei guay rui kata saraemhmei tiswlou the. Kalam thu Ravguangc rui Kanac Mpouh lam khou samei ta tei kamei lwm mak e. 11 Sakhi kiu thu mi hei e: Ravguangc rui aniu khang ringcsuangmei tiilou the, kumna mi ringcsuangmei hei Kanac Mpouh khou nai e. 12 Ka Nac Mpouh ta laatowmei guay tei mi ringcsuangmei hei laatow the; tiki Ravguangc Nac Mpouh ta laatow makmei guay tei ringcsuangmei laatow mak e.
Ringcsuangmei
13 Ravguangc Nac Mpouh khou lwmmei nangniw khou ringcsuangmei nai the twmei nangniw thay khang ai hypui tuang e. 14 Aniu Ravguangc hu khou aniu lam khou lwmsi tuang nai dat mak khe, kalam thu aniu rui tabui pwni kamei ningmei thei layna kakhou ney pwkhou kamei chulou the. 15 Aniu neymei kathuic kamei rui chulou e twmei aniu thaypui zaeng rui, kakhou aniu rui neymei guay tiilou e twmei ni aniu thay e.
16 Nang chana punav rui paapc taanc bammei ta how e thei, kumna mi tei theic nimei paap hamh e thei, kakhang huayneylou nina e. Kum pwkhou kapaap tei theic nimei paap hamh mei khang tei ringhmei tiilou puni. Theic nimei paap nai e; mi khang tei huayney o twna ai sa mak e. 17 Nchumh makmei taanv guay paapc e; tiki theic nimei paap hamhmei nai e.
18 Ravguangc nac nunc thu paapc taancna bam mak e twmei aniu thay e. Kalam thu Ravguangc Nac Mpouh rui kaniw ta gaeklou bam e, kumna simeipu rui kaniw ta swkasic ngam mak e.
19 Mbaanv kapwm Simeipu baanc bangc khou bam sini, aniu thu Ravguangc tuang e twmei aniu thay e.
20 Ravguangc Nac Mpouh lungc guang the, kumna kalingmei Racguangc ta thay khang, aniu khou kabah thaymei tiilou the twmei aniu thay e. Kanac Mpouh Jisu Khrista khou bammei paan rui aniu kalingmei Racguangc khou bam the. Kalingmei Racguangc kiu mi hei the, khatni ringcsuangmei kiu mi hei the.
21 Anac thiu, ravmaengc khou rui rei pat o!