Hura Yohanes Katolungkanina
Tabe
1
1 Lako hi aku penatua. Hura ei laipakatuku hi Gayus to laipotoweku mpuu.
2 Ompiku to laipotoweku, mohambaya'a bona mabelo pade maseha motoko, ewa karoho peparahayamu. 3 Nagoe mpuu raraku karataira bahangkua dua ompita i rara Kristus nangkewoka'a nangkambelai katigumu rara katuwua to nanoro. Apa natuwu rara ingku to nakono amiko. 4 Nangepe ane ompi-ompiku natuwu rara ingku to nakono, eemi to mpuu-mpuu nampakagoe raraku, moma naria ntanina.
Gayus laiune
5 Ompiku to laipotoweku, natigu mpuuko nampalayani ompi-ompita hangu kaparahayaa, naupa hira to lailayanimu ee pomara laincanimu. 6 Laiparatarami hi jumaa i hei bewa katowemu. Nabelo mpuu ingkumu ane mutulungira mopadola pomakoara ewa ingku to laipokagoe Alatala. 7 Apa rara pomakoara nampalayani Kristus, moma naria napa-napa laitarimara lako tauna to moma nangincani Alatala. 8 Tauna to ewa eera kana tatulungi bona ta'ala bagiata mampahuko bagora nampopotolele patudu to nakono lako Alatala.
Diotrefes pade Demetrius
9 Laitulihikumi hura rau hi jumaa. Naupawee, Diotrefes to mingki mawali to pangkeni rara jumaa, moma'i nadota nanturuhi'a. 10 Ane marata'adamo mei ritu, kana ku'uli pura humawee ingku to laibabeina. Apa laituturana to moma nakono nangkambelai kami. Pade poma oa'i naoha hante lauria. Karatara ompita to ntanina to hangu kaparahayaa nampatako komi, moma'i nadota nantarimara. Moma wuwu ee, laitagina muirapa tauna to madota mantarimara pade laipopehuwunara tauna ee lako jumaa.
11 Ompiku to laipotoweku, nemo mantuku ingku to nadaa. Tukumi ingku to nabelo. Tauna to nabelo ingkuna, hia ee mai lako Alatala. Tauna to nadaa ingkuna, hia ee mai moma nangincani Alatala.
12 Nangkambelai Demetrius, nadea tauna nampaune'i. Kanoro ingkuna motomi nampopahiloi ane hia ee nantuku patudu to nakono. Kami mui nampaune'i. Laincanimu moto ane humawee to laiparata kami mamala raparahaya.
Tabe kahuduana
13 Nadea mpuu to kana kukewokako. Naupawee nabelopi ane moma hante hura. 14 Harumakakumi, moma'amo mahae mampotomukako pade mojaritatada. 15 Katuwu to nanone lako Alatala mampodoheko. Tabe hi iko lako dohe-dohemu i hei, pade parata tabeku hi doheta ritu, butu-butu duara.