Ɛnza ngó ale lée lɛ́zɛnnzun ŋó lé
15
Ɛnza ŋé fɔ íkwɔ kó: «Né lée lɛ́zɛnnzunmɛɛ ó lé, Nvá lée sɛɛnkɛbhaa ó lé. 2 A bhóo mínnu tɛ́ i dhyé ngɛ́la, a yáa ólu tɛ́ɛ kɛ olu bhɔ́ yé. A bhóo mín núu i dhyé ngɛ́la, a yáa ólu bhóo mɛnsɛn ŋó bhɔ́ yé ne, ké aa sé kɛ́ dhyé nzhɛ́ɛman ngɛ́ kɛ́ tínmin síɲan jónan ó ka. 3 Ále wɛ́ɛ sɛ́nnɛnya kɛ́ bhá né yɛ́ kóman o kósɔn ní o min nvɔ a yɛ́. 4 Áa í gbɛ́nnɛnnin ndó né man óyoo né gbɛ́nnɛnnin yé a man ɲánminman. Yilibhoo tɛ́ɛnin ŋó tɛ́ sé kɛ́ tó i kéenan kɛ́ i dhyé ngɛ́ i yɛ́ɛ mán ni a nɔlɔnin ndɛ́ lɛ́zɛnnzun ŋo man; o ɲán kée ŋó man, ní a man í gbɛ́nnɛnnin ndó né mán, a táa sé kɛ́ fósi kɛ́ Ala yɛ́. 5 Né lée lɛ́zɛnnzunmɛɛ o lé, ále lée a bhóo ólu lé. Mɔɔn min ngɛ́ i gbɛ́nnɛnnin ndó né mán, né gbɛ́nnɛnnin ɲaankɛ o tíi ó mán, o tíi ó yáa sé kɛ́ kóbhɛɛ shɛ́ɛman ngɛ Ala yɛ́, kɛ mansɔɔ ni né sɔ́ɔbu tɛ́, ale tɛ́ sé kɛ́ fósi kɛ́ i yɛ́ɛ mán. 6 Ni mɔɔn min man i gbɛ́nnɛn né mán, o tíi ó wɛ́ɛ kɛ́ óyoo yilibhoo tɛ́ɛnin, íi a láfii kɛ́ɛnman aa já, íi a tá kɛ́ a síi tála aa ɲɛ́ɛn. 7 Ní a kɛ́ i gbɛ́nnɛnnin ndó né mán, óni né ta kóman ólu kɛ́ tó a kɔ́ɔnnɔn, áa fé min nvɛ́, áa ó kófɔ a yáa o sɔ́ɔ. 8 Ni a kɛ́ kóbhɛɛ shɛ́ɛman ngɛ́, o lé káa kɛ́ tó Nvá é bwóɲan sɔ́ɔ, óni álee kɛ́ né ta kaamɔɔndhye né. 9 Ngo a dí Fá o yɛ ɲánminman, áa dí né yɛ cé né. Áa tó ó dhyáaɲɔɔnya kée ŋó lɔ. 10 Ní a kɛ né yɛ́ tɔ́ ŋólu mánfa, a yáa tó né ta dhyáaɲɔɔnya o lɔ, óyoo née Nvá yɛ cé ólu mánfa ɲánminman kɛ́ tó a yɛ́ dhyáaɲɔɔnya ó lɔ.11 Né wɛ́ɛ ó kó ólu fɔ a yɛ́ ké áa nisɔdhyaa o sɔ́ɔ né fɛ́, óni ké a yɛ́ nisɔdhyaa o waa i lafa.
12 Né ta tɔ́ ŋo lée nin, áa dhyáaɲɔɔnɲɛn óyoo á ko a dí ne yɛ́ ɲán min mán. 13 Kɛ i yɛ́ɛ ní ó dí i twáanva ólu kósɔn, bhyáaɲɔɔnya gbɛ́ɛ tɛ́ yé min ŋan físaa óle. 14 Ale lée né twáanva ólu le, ní mínnu fɔ́la a yɛ́ ni a kɛ o kɛ. 15 Né táa a kíi bhée ngó bháalakɛdhye ŋólu, kɛ mansɔɔ bháalakɛdhye ŋo tɛ́ a kunndii o yɛ kó ólu kɛ́la a mán. Né yáa a kíi ngó ndwáanva ólu, kɛ mansɔɔ né wɛ́ɛ fé min myɛ́n Nvá lá, né wɛ́ɛ ó bɛ́ yáa a lá. 16 A tɛ́ óo ale lée né lɔ́tɔnmɔn, né lée ále lɔ́tɔnmɔn kɛ́ a bhyáa ké áa táa kóbhɛɛ shɛ́ɛman ngɛ́a kóbhɛɛ min núu myɛ́nnan ké a kɛ fé ŋóo fé ngófɔ Fá o yɛ́ né tɔ́ɔla, a yáa ó dí a mán. 17 Née min nvɔla a yɛ́ bhádhye ŋólu óle míin ne: ‹Aa dhyáaɲɔɔnɲɛn.› »
Ɛnza ni a yɛ kaamɔɔndhye ŋolu man dí dínɲan mɔɔn olu yɛ́
18 «Ní a kɛ́ yé kó áa gbó dínɲan mɔɔn ólu yɛ́, áa lɔ ŋóo né lée gbóya i yɛ jónan. 19 Ní a tɛ́ɛkɛ dínɲan ta le, a tɛ́ɛnan dhyáa dínɲan mɔɔn ólu yɛ, waa ale tɛ́ dínɲan ta le. Né lée álee lɔ́tɔnmɔn kɛ́ a bhɔ́ dínɲan mɔɔn olu cɛ́man, ó lé kósɔn, áa gbó dínɲan mɔɔn ólu yɛ́. 20 Aa í hákii tó né ta kóman míin nɔn. Ndɛ́ wɛ́ɛ fɔ a yɛ́ ngó bháalakɛdhye ŋó man bwó a kunndii o lé. Ni í wɛ́ɛ né tɔ́lɔ, í káa ale tɔ́lɔ céne. Ni íi né ta kóman ólu bháto, í yáa ale ta kóman ólu bháto 21 Í yáa ó bɛ́ kɛ́ a lá né le kósɔn kɛ mansɔɔ í man né cébhaa ó lɔ. 22 Ní né tɛ́man nan kɛ́ kóman í fɛ́, kíti tɛ́ táa bé í ka í yɛ́ yúumu o kósɔn, waa kwáalenin í yɛ́ yúumu ó tɛ́ sé kɛ i mankoto bhée. 23 Né kɛ gbóya mɔɔn min ɲɛ́n, nvá yáa gbóya o tíi o yɛ́. 24 Mɔɔn gbɛ́ɛ mán sé kɛ́ kó mínnu kɛ́, ní né tɛ́man nan ó ɲɔ́ɔn ngɛ́ í cɛ́man, í yɛ́ yúumu o tɛ́ mánfaa kɛ́ i man, waa sísan íi ó bɛ́ yé, o bɛ́ kwɔ́, né ní Nvá á gbó í yɛ́. 25 Waa kóman min fɔnin yé í yɛ́ sɛliya o sɛ́wɛ ó kɔ́ɔnnɔn, fɔ o tɛ́ɛ i lafa le. Aa fɔ kó: Né wɛ́ɛ gbóya í yɛ́ ké kún ndɛ́ a lá.