Matiyu 1

MATIYU

é sanmankanmɛɛ mín nzɛ́wɛ

Ɛnza Ngílisi kó ó lɔ́

Ɛnza Ngílisi búluyi o

Ɛnza Ngílisi é bhɔ́ mɔɔn mínnu lɔ, kó mín nzɛ́wɛnin ŋé o mɔɔn ólu ka, o lée lúu nín: Ɛnza ŋé Laula Bhɔ́nzɔ né le; Laula lo ŋé Bulaaman bhɔ́nzɔ ne le. 2 Bulaaman é Shaaka fá le le, tó Shaaka é Yangubha fá le le; Yangubha lée Zuda ní a kɔ́ɔcɛ ní a lɔ́ɔcɛ lú fá le. 3 Zuda lée Pelɛsi ní Zela lú fá le. Aa i sɔɔ a muso Tamaa lé la. Pelɛsi lée Ɛsilɔn fá le, Ɛsilɔn née Alamu fá le. 4 Alamu lée Aminadabu fá le, Aminadabu lée Naasɔn fá le, tó Naasɔn née Salimɔn fá le. 5 Salimɔn ŋé Boozi sɔ́ɔ a muso Lahabu le la, Boozi é Obɛdi sɔ́ɔ a muso Luti le la; Obɛdi lée Yese fá le, 6 tó Yese é mansacɛ Laula fa le.

Laula é Swɛmannan sɔ́ɔ Uli fúumuso o lé la. 7 Swɛmannan lée Lehabamu fá le, Lehabamu lée Abiya fá le, tó Abiya lée Asafu fá le. 8 Asafu lée Zozafati fá le, Zozafati lée Zolamu fá le; Zolamu lée Wuziya fá le. 9 Wuziya lée Zotamu fá le, Zotamu lée Ahazi fá le, Ahazi lée Ezekiyasi fá le. 10 Ezekiyasi lée Manase fá le, Manase lée Amɔn fa le, tó Amɔn lée Zoziyasi fá le. 11 Zoziyasi é Yekoniya ni a kɔ́ɔcɛ ní a lɔ́ɔcɛ lú sɔ́ɔ í wóobhaa la. O wáati kée ŋó lɔ, Babilɔninnga ólu táa ni Izalayɛlika ólu lé Babilɔnin mála o lɔ́ i myaannin ngwɔ Izalayɛli.

12 Izalayɛlika ólu táa mínngɛ Babilɔnin, Yekoniya tɛ́ɛ Babilɔnin ndáa sɛɛ o lɔ. Ale lé lée Sheyatɛli fá le. Sheyatɛli lée Zolobabɛli fá le. 13 Zolobabɛli lée Abiyudi fá le, Abiyudi lée Eliyakimu fá le; Eliyakimu lée Azɔɔ fá le, 14 Azɔɔ lée Sadɔki fá le, tó Sadɔki lée Akimu fá le le, Akimu lée Eliyudi fá le. 15 Eliyudi lée Eleyazaa fá le, Eleyazaa lée Matan fá le, tó Matan lée Yangubha fá le. 16 Yangubha lée Yusufu fá le; Mwɛnyamu é sii Yusufu lé kunman. Ale Mwɛnyamu lée Ɛnza ŋwóo. Fɔ́ é kɛ́la o Ɛnza ŋo le mán kó Kílisi o.

17 Wóosɛɛ tá ni náannin lée lo Bulaaman ni Laula cɛ; tó kɛ ta Laula ta sán o mán kɛ táa sii Izalayɛlika ólu myáansan ŋo man tó ii táa Babilɔnin, wóosɛɛ tá ni náannin lée ló o wáati fyáa ó cɛ; wóosɛɛ tá ni náannin lée ló í gbɛnzan óni Kílisi o wóosan o cɛ.

Mantii Ɛnza ŋwóoko o

Luka 2.1-7

18 Ɛnza Ngílisi é wóo ɲán mín man, o lée kɛ́ nín: Mwɛnyamu lée Ɛnza ŋwóo; óo kɛ́la sán mínnɔn, Mwɛnyamu mánmyaannin ndɛ́ɛ Yusufu lé kwɔ; bhó ɲɛ́ɛ tɛ́ mán ló i cɛ bhá tó Mwɛnyamu é kɔ́ɔn tá. Aa kɔ́ɔn ó tá Ní Sɛnnɛnyanin ŋó lé tá fwɛ́ɛnseya lɔ. 19 Mwɛnyamu mánmyaan cɛ mín Yusufu, o tɛ́ɛ mɔɔn téenin né le; a lo ndɛ́ tɛ́ fɛ́ ké Mwɛnyamu tɔ́ɔ o a cáan. O kósɔn, ale Yusufu é a yace síi kó a káa o fúu ó lábhyaa lóonɔn. 20 A tɛɛ o kó ó lɔ́kiila bhée, tó Mantii o yɛ́ malɛɛka lɔ é í kíbhalokan ná a ɲanman kɛ fɔ a yɛ kó: «Laula Bhɔ́nzɔ Yusufu, í kɛ́nan sháan Mwɛnyamu ta kɛ a kɛ í muso le; kɛ mansɔɔ a kɔ́ɔnman ŋé dhyé mínnan wé, óo bhɔ́la Ní Sɛnnɛnyanin ó lé lɔ. 21 A yáa wóo dhyénjɛ la. Dhyé ŋó tɔ́ɔla kó Ɛnza, kɛ mansɔɔ ale lé káa a yɛ mɔɔn ólu kísi kɛ i bhɔ́ i yɛ yúumu olu lɔ.»

22 Mantii o tɛ́wɛɛ tínmin a yɛ céla ó mán kɛ saanin mínngɛ, óo í láfa céne. A fɔnin ndɛ́ɛ Mantii o kwɔ́ tá ne kó:

23 Sínngbiinin mín man cɛko kɛ́ bhá ŋwé,

o yáa kɔ́ɔn tá kɛ í yɛ́ɛ mansɔɔ dhyénjɛ la;

fɔ́ yáa kɛ́ dhyé ŋó mán kó Emannuwɛli.

O tɔ́ɔ ó kɔ́ɔ tɔ́ɔ tá kó: Ala é án nvɛ́.

24 Yusufu é kúun mínngɛ kɛ bhɔ́ sunnɔɔn o lɔ, Mantii o yɛ́ malɛɛka óo kó mín nvɔ́ a yɛ́, áa ó kɛ: Yusufu é Mwɛnyamu táa muso le. 25 Wáa bhó mán lo i cɛ fɔ́ kɛ táa sé Mwɛnyamu wóo ó man. Mwɛnyamu é í yɛ́ɛ mansɔɔ dhyénjɛ la, tó Yusufu é dhyé ŋó tɔ́ɔla kó Ɛnza.