Raja Daud na kota Yerusalem to Napilei Puang Allataala
132
Kelong dipukelong ke male deꞌ kota Yerusalem.Oo Puang Allataala, Taingaranni to Raja Daud
sola sininna kamasussanna.
2 Danggiꞌ Takalupaii kumua mangkami massapah
namangtinjaꞌ lako Kitaꞌ to makuasa to nasompa Yakub.
3 Nakua mangtinjaꞌ,
“Nang teꞌda kulamentama bolakuꞌ mpasau boꞌjoꞌkuꞌ,
nang teꞌda kulamammaꞌ jao katindoankuꞌ,
4 na nang teꞌda kulanneloranni rapaꞌ to matangkuꞌ,
kuleppeng,
5 ke teꞌdapi kupasadiai to ngenan la nanii Bola Puang Allataala
nanii torro Puang Allataala to makuasa to nasompa Yakub.”
6 b Tongan, mangkamo tasaꞌding jio kota Betlehema to nanii Patti Basse-Na Puang Allataala,
taampaꞌi jio padang Yaar. c
7 Tamangkada kumua, “Tamale lako joo nanii torro Puang Allataala
tasujuꞌ ssompa-I jio olo kadera malaꞌbih-Na.”
8 Oo Puang Allataala, mentamami-Kiꞌ ngenan la Tanii torro,
sola Patti Basse-Taꞌ tanda kamakuasan-Taꞌ.
9 Dennaa upaꞌ na sininna imang-Taꞌ tuo situruꞌ pakkaeloran-Taꞌ
namario makkelong to ummaꞌ-Taꞌ.
10 Danggiꞌ Tapabokoꞌii penawa to raja Tapilei,
ingaranni janjin-Taꞌ lako Raja Daud kaunan-Taꞌ.
11 d Mangka-Mi Puang Allataala massapah lako Raja Daud,
na teꞌda nalangkalupaii to janjin-Na.
Nakua, “La den mesaꞌ anakkamu la Kupupenjaji raja,
la ssulleko mangparenta.
12 Ia ke tattaꞌi to batiꞌmu mpentoei janjing-Kuꞌ,
natattaꞌ mpugaukki to atoran-Kuꞌ to Kuajaranni,
nang la nasiturunanni menjaji raja.”
13 Mangkami Napilei Puang Allataala to kota Yerusalem,
to Nakabudai nanii torro.
14 Nakua, “Iamo tee to ngenan la Kunii torro teꞌda anggena,
iamo la Kunii mariꞌpih sabaꞌ Kukabudai.
15 La Kubarakkaꞌi to to-Yerusalem nakalaꞌbian to naputuona,
na sininna tokaasi-asi la Kupebarahhi.
16 Na imang jio kota Yerusalem mpangpeissenanni kumua ia to kasalamatan pole jiori mai Akuꞌ,
na teꞌda napaja mario makkelong to ummaꞌ-Kuꞌ.
17 e Nteemo kota Yerusalem
la Kunii mpupenjaji raja mesaꞌ batiꞌna Raja Daud,
Kupemawatangngii joo to-Kupilei namangparenta tarruh
butung palita dukku tarruh.
18 Tattaꞌi malaꞌbih mangparenta,
apa ia to sininna ewana, la Kupakasiriꞌ.”