پرميشوَر مھورو ݾنڀال ڪرڻ آݪو
121
ھُون آپرَي اونکَي ڏُونگرون ڏيݾا ڪرين۔مھارِي مدد ڪيٿ ݾون آشَي؟
2 مھارِي مدد پرميشوَر ڪرشَي
جڪَي آڪاش ھانَ ڌرتي ٺاھيا۔
3 او ٿارَي پگون نَي کِرڻ ݾون بچاشَي۔
ٿارِي رُکاݪِي ڪرڻ آݪو ڪڏي ڀِي اُونگاجَي ڪونھي۔
4 جو، اِسرائيلي قوم رو رُکاݪِي ڪرڻ آݪو
نَڪو اُونگاجتو نَڪو ݾُوتو۔
5 پرميشوَر ٿارو رُکاݪِي ڪرڻ آݪو ھَي
پرميشوَر ٿارَي ݾاجَي ھاٿ ٿارِي ݾنڀال ڪرشَي،
6 نَڪو ݾُورج ٿنَي ڏِن رو نُقصون ڏَي،
نَڪو چندر رات رو۔
7 پرميشوَر ھر ھيڪ مُصيبت ݾون ٿنَي بچاوَي۔
8 پرميشوَر ٿارَي آوڻ جاوڻ ۾
آج ݾون لي ھميشا توڻي ٿارِي رُکاݪِي ڪرَي۔