زبُور 67

شُڪر گُذارِي رو ڀجن

مير مُغنِي رَي ݾارُو ڀجن

ايشوَر مھون تي دايا ڪرَي ھانَ مھونَي برڪت ڏَي

ھانَ آپرَي درشن رو چمتڪار مھونَي بتاوَي۔ (سيلا)

‏2 اِيئي رَي ڪري ڪہ ٿارو مارگ ڌرتي تي ظاھر ھووَي

ھانَ ٿارِي مُگتي ݾجَي قومون رَي ݾارُو۔

‏3 اي ايشوَر، مِنک ٿارِي بڏائي ڪرَي۔

ݾجائِي مِنک ٿارِي بڏائي ڪرَي۔

‏4 قومون خُوش ھووَي ھانَ خُوشِي ݾون ڀجن گاوَي

ڪيونڪہ تُو ݾچائي ݾون مِنکون رو اِنصاف ڪرِي

ھانَ ڌرتي رَي مِنکون تي حڪُومت ڪرِي۔ (سيلا)

‏5 اي ايشوَر، مِنک ٿارِي بڏائي ڪرَي۔

ݾجائِي مِنک ٿارِي بڏائي ڪرَي۔

‏6 ڌرتي آپرِي پوک ڏينِي رِي۔

ايشوَر يعني مھورو ايشوَر مھونَي برڪت ڏيشَي۔

‏7 ايشوَر مھونَي برڪت ڏيشَي

ھانَ زمين رَي ڇيڙَي توڻي اُوئي رو ٻِي راکشَي۔