ايشوَر تي ڀروسَي رِي پراٿنا
مير مُغنِي رَي ݾارُو يُونت اَيليم رخوقيم رَي ݾُر تي دائُود رو ڀجن
اُوئي ٽيم جڏي فلستيون اُوئي نَي جات شھر ۾ جھاليو ھتو۔
56
اي ايشوَر مھَي تي دايا ڪروڪيونڪہ اِنسون مھنَي نوکڻ رَي ݾارُو ڪرَي ھَي۔
او ݾجو ڏِن مھنَي ݾتاوَي ھَي۔
2 مھارا دُشمن ݾجو ڏِن مھنَي ݾتاوَي ھَي
ڪيونڪہ مھارا دُشمن جڪو مھَي ݾون بِڙھيجَي ھَي
او تموم گھڻا ھَي۔
3 جڪَي ڏِن جڏي مھنَي ٻِي لاگشَي
ھُون ٿَي تي وِشواس ڪرين۔
4 ھُون ايشوَر رَي شاستر تي وِشواس راکي اُوئي رِي بڏائي ڪرين۔
مھارو بڏائو ايشوَر رَي شاستر تي ھَي۔
ھُون ٻيئاجڻ آݪو ڪونھي۔
مِنک مھارو ڪِي ڪرشَي۔
5 او ݾجو ڏِن مھارَي باتون رَي مشڪرَي ڪرَي ھَي۔
اُوئون رِي ݾوچ اَي ھَي ڪہ او مھارَي خلاف ھووَي۔
6 او ڀيڙا ھوئي لِڪي جاوَي ھَي۔
او مھارا پگ جوتا رَي ھَي
ڪيونڪہ او مھنَي ٺُپ مارڻ رَي ݾارُو ڪرَي ھَي۔
7 ڪِي او ڏوھ ڪري بچي جاشَي؟
اي ايشوَر آپرَي ڪھر ݾون مِنکون نَي برباد ڪر۔
8 تُو مھارا ڏُک اوݪکَي ھَي۔
مھارا اَنݾُو ٿارِي بوتل ۾ ڀيڙا ھويوڙا ھَي۔
ڪِي او ٿارَي ڪِتاب ۾ ڪونھي؟
9 جڏي ھُون ٿنَي ھيلو ڪرين
تو مھارا دُشمن مِٽي جاشَي۔
مھنَي خبر ھَي ڪہ ايشوَر مھارَي پاݾَي ھَي۔
10 مھارو بڏائو ايشوَر رَي شاستر تي ھَي۔
مھارو بڏائو ايشوَر رَي شاستر تي ھَي۔
11 مھارو ڀروسو ايشوَر تي ھَي۔ ھُون ٻيئاجڻ آݪو ڪونھي۔
مِنک مھارو ڪِي ڪرشَي؟
12 اي ايشوَر، ٿارَي نون رَي جڪو باݾون مھَي باݾئي ھَي،
او ھُون ٿارَي چرڻون ۾
شُڪر گُذارِي را ٻَليدون ضرُور ڪرين۔
13 ڪيونڪہ ٿَي مھنَي موت ݾون بچايو ھَي۔
ڪِي ٿَي مھارا پگ پِتلڪڻ ݾون ڪونھي بچايا
اِيئي رَي ڪري ڪہ ھُون پرميشوَر آگھي
جيتون رَي اُجاݪَي ۾ بون۔