6
Gerzitin o ɔl o deer
1-2 Baale akɔ mazi ɔɔt azaace ɔl loota kizi mɛɛlɛ, ma itiryai dɔlya ci ŋaaiye ŋaatineeŋ e, icinit lɔgɔz ci joowanɛ oogi kabarzɛ ci ɔl ci deer o alina ɔrɔɔt, ma arɔc niigi nɔɔgɔ.
3 Izi ni Jooi nɛ, “Alaŋ bodo vɔŋizi onane rogeto aavi eete ci deer kodot loota ŋina, eeci niini een gi ci adaai. Alaŋ niini arogi katayaŋ irkitok ceen eet tɔrkɔnɔm (120).”
4 Mazi waanice avɔ aromɛ lɔgɔz ci joowanɛ oogi o kibeen dɔl ci ɔl ci deer neke, itirta niigi ŋaatineeŋ baraknya ci appintik ɔrɔɔt loota ŋina. Baraknya nicigi iziti niigi olenya ci mootik ci agayi ɔrɔɔt iinyaye niceke.
5-6 Mazi acin Jooi izi gerzitin appe ɔrɔɔt eete ci deer loota, ma akɔ baabani o zinzeeti ugeec ki gerzitin iinya dook nɔkɔ, abadun niini mony giye ci ɛɛnycanɛ eet ci deer loota o, ma awucnyek nɔɔnɔ zɔɔz nici ziniza ɔrɔɔt. 7 Izi ni Jooi nɛ, “Abon kɛɛya loota ŋina eet ci deer baal kɛɛnyca noko, ki kɛlɛk, ki kibaali, kibeen kaal o awɔ keŋtinɛ. Inoko naana kabadi mony giye o kɛtɛɛnyayɛ nɔɔgɔ.”
8 Bar zin waanice Nowa doon ci atalnɛ Manyi Jooi ŋaatin.
Zɔɔz o akati Nowa
9 Ceeni zin zɔɔz o akati Nowa. Niini eet ci abona ɔrɔɔt ɛlɛ. Abona waanice niini doon ole niceke dook, ma ɔrkɔr niini ki Jook tup nɔkɔ. 10 Anyak niini waanice ŋɛɛrigin ceen iiyu ci kazi Cɛm, ki Am, kibeen Javaz. 11 Acin zin Jooi waanice ɔl ci deer o loota ŋina agɔɔn kaal ci gɛr ɔrɔɔt, ma anyawun lɔɔci yowonok ɔrɔɔt ɛlɛ. 12 Acin niini looc izi gɛrzɛ ɔrɔɔt ɛlɛ, eeci ɔl o loocu dook abaayit baayiz ci gɛr.
13 Enek ni niini Nowa nɛ, “Inoko karooŋ kuulal ɔl ci deer o dook kibeen looc buk kizeectɔ, eeci adala gerzitin ci eet ci deer looc dook ɔrɔɔt.
14 Inoko zin niina tɛɛnya kavool ci appe aleenonu ki ineet keene ci adɔi kak aganɔ ki tɛɛnyinɛt. Tuguwa keŋti ci meelik kavoola eecitɔ. Dilɔ eecitɔ ki bawuca buk zooyɛni. 15 Yabiza corcoritin ci kavoolo o kizi mitirɛt eet tɔrkɔnɔm kamɔtɔ ki tiin iiyu (133). Yabiza kɛŋ eecitɔ kɔlɔɔlanɛ kizi mitirɛt eetoma ki tiin ram (22). Yabiza wunzɛt ci akɔ ki taden o kizi mitirɛt amɔnki iiyu (13). 16 Tɛɛny rukcok ci abuŋ kavool taden. Tɛɛnya buk kavool keŋti iiyu ci ataadizɔ. Arek kavool karogi kabanyca. 17 Kakɔ naana kitoona tawan ka kuruk kaal dook o arogi loota kadaayitɔ. 18 Ŋaan zin katerkedekin ineet terkediin ci ka kɛɛlayin. Bitɔ kavoola niina ki ŋaa unun kibeen dɔl ugun been ŋaai ci lɔgɔz ugun. 19-20 Biti buk kavoola eecitɔ gi ci mac ki gi ci ŋai kaale ci arogi noko dook ka oromtɛ ki ineet ka zooti nɔɔgɔ. 21 Biti buk dayiin keŋti dook ka adayit niina kibeen kaal ci arogi o dook.” 22 Utugu ni Nowa kaal dook eo aduwakɛ Jooi nɔɔnɔ.