योहन 13

ईसु ने चेलाहुंण का पग पखाळ्या

¹ अबे फसह का परब से पेलां ईसु ने यो जाणी के के म्हारी घड़ी अइगी हे के हूं जग के छोड़ी के पिता कने जउं। तो अपणाहुंण से जो जग माय था जसो परेम करतो अई र्‌यो थो उणकासे अपणा जीवन का अंत तक वसोज पूरण परेम राख्यो।

² अने जिमवा का बखत जदे सेतान पेलांसेज सिमोन का बेटा यहूदा इस्‍करियोती का हिरदा माय यो लाखी चुक्यो थो के उ ईसु के धोको दइने पकड़वई देगा। ³ तो ईसु यो जाणतो होयो के, "पिता ने सगळो कंई म्हारा हात माय करी लाख्यो, अने यो के हूं परमेसर कने से आयो अने परमेसर कने पाछो जई र्‌यो हूं।" ⁴ तो जिमता बखत उठी के ईसु ने अपणो चोळो हेड़्यो अने बगले धरी लाख्यो अने सांपी लई के अपणी कमर कसी ली। ⁵ तो उने एक बड़ा बरतन माय पाणी भर्‌यो अने चेलाहुंण का पग पखाळ्या अने जेनी सांपी के अपणी कमर माय खोंसी थी उकासे इणका पग पोंछवा लाग्यो। ⁶ अने जदे उ सिमोन पतरस कने आयो, पतरस ने उकासे क्यो, "हे परभु, कंई तू म्हारा पग धोई र्‌यो हे?"

⁷ ईसु ने जुवाब माय क्यो, "हूं जो करूं तू उके अबी नी जाणी सके, पण तू इका बाद समजी जायगा।"

⁸ पतरस ने उकासे क्यो, "हूं कदी थारे अपणा पग पखाळवा नी दूंवां।"

ईसु ने उके जुवाब द्‍यो, "अगर हूं थारे नी धोउं तो म्हारा गेले थारो कइंज हिस्सो हयनी।"

⁹ सिमोन पतरस ने उकासे क्यो, "परभु, खाली पगीज नी पण म्हारा हात अने माथो बी धोई दे।"

¹⁰ ईसु ने उकासे क्यो, "जेने सांपड़ी ल्यो उके तो खाली पगीज धोवा की जरुवत हे। क्योंके उ पूरो साफ-सुतर्‌यो हे। अने तम साफ हो पण तम सगळा का सगळा हयनी।" ¹¹ उ तो उके जाणतो थो जो धोको दई के पकड़वाणे वाळो थो। इकासरु उने क्यो, "तम सगळा का सगळा सुद्द हयनी।"

¹²  अने जदे उ उणका पग पखाळी चुक्यो अने अपणो चोळो पेरिके जिमणे बेठी ग्यो, तो उने उणकासे क्यो, "कंई तम समज्या की म्हने तमारा गेले असो कायसरु कर्‌यो? सुणो, हूं तमार से खास बात कूं। ¹³ तम म्हारे गरु अने परभु को हो। तम ठीकज को, क्योंके हूं उज हूं। ¹⁴ अगर म्हने परभु अने गरु हुई के तमारा पग धोया तो तमारे बी एक दूसरा का पगहुंण धोणो चइये। ¹⁵ क्योंके म्हने तमारे नमुनो द्‍यो हे, की तम बी असोज कर्‌या करो, जसो म्हने तमारा गेले कर्‌यो। ¹⁶  हूं तमारे खास बात कूं, 'चाकर अपणा मालेख से मोटो हयनी अने नीज मोकल्यो होयो अपणा मोकलवा वाळा से मोटो रे। ¹⁷ तम इनी बातहुंण के जाणो हो - अगर उणका पे चलो तो तम धन्‍य हो।

¹⁸  "हूं तमारा सगळा का बारामें नी कूं। हूं उणके जाणूं जिणके म्हने छांटी ल्या, पण उका सरु के पवित्तर सासत्तर को बचन पूरण होय, 'जो म्हारा रोटा खाय उज म्हारो बिरोद करे'। ¹⁹ इका होवा से पेलां हूं तमारे अबी बतई र्‌यो, जेकासे की जदे यो पूरण हुई जाय, तो तम बिसास करो के हूं हूंज हूं। ²⁰  हूं तमार से खास बात कूं जेके हूं मोकलुं उके जो माने, उ म्हारे माने, अने जो म्हारे माने, उ म्हारा मोकलवा वाळा के माने।"

पकड़वाणे वाळा का बारामें भविसबाणी

(मत्ती २६.२०–२५; मरकुस १४.१७–२१; लूका २२.२१–२३)

²¹ जदे ईसु यो कई चुक्यो तो आतमा माय बेचेन हुई ने गवई दई के क्यो, "हूं तमार से खास बात कूं के तमारा माय से म्हारे एक जणो पकड़वायेगा।

²² इकासरु चेलाहुंण एक दूसरा आड़ी ताकणे लाग्या क्योंके समजी नी सक्या के उ केका बारामें कई र्‌यो हे। ²³ चेलाहुंण माय से हूं, जेकासे ईसु परेम राखतो थो, ईसु आड़ी नमिने बेठ्यो थो। ²⁴ तो सिमोन पतरस ने म्हारा आड़ी इसारो करिके म्हार से क्यो, "पुछी ले, 'उ कुंण हे जेका बारामें ईसु कई र्‌यो हे?' "

²⁵ तो ईसु की छाती आड़ी हूं नमिके उकासे बोल्यो, "परभु, उ कुंण हे?"

²⁶ तो ईसु ने जुवाब द्‍यो, "जेके हूं रोटा को कोळ्‍यो डुबाड़ी के दूंवां, उज हे।" तो उने रोटा को कोळ्‍यो डुबाड़ी के सिमोन इस्‍करियोती का बेटा यहूदा के दई द्‍यो। ²⁷ अने कोळ्‍यो लेताज सेतान उका माय समई ग्यो। ईसु ने उकासे क्यो, "जो तू करे झट कर।" ²⁸ पण जो उका गेले जिमणे बेठ्या था उणका माय से कईं को नी जाणी पायो के उने कायसरु असो क्यो थो। ²⁹ यहूदा कने रुप्या की थेली रेती थी वी सोंची र्‌या था की ईसु उकासे कई र्‌यो होगा, के परब सरु जरुरी समान मोल ल्याय के गरीब-गुरबा के थोड़ोक दई दां।

³⁰ तो मुन्डा माय कोळ्‍यो लेवा का बाद यहूदा झट बायरे चल्यो ग्यो, अने यो रात को बखत थो।

एक नवो हुकम

³¹ जदे यहूदा बायरे चल्यो ग्यो तो ईसु ने क्यो, "अबे हूं मनख का बेटा की म्हेमा हुई अने परमेसर की म्हेमा उका माय होय। ³² अगर म्हारा माय परमेसर की म्हेमा होय तो परमेसर बी अपणा माय म्हारी म्हेमा करेगा। अने झट करेगा। ³³  "बाळकहुंण, हूं हजु जरासी देर तमारा गेले हूं। तम म्हारे ढुंडोगा अने जसो म्हने यहूदिहुंण से क्यो तमार से कूं, की जां हूं जावां वाळो हूं वां तम नी अई सकता। ³⁴  हूं तमारे एक नवो हुकम दूं के तम एक दूसरा से परेम राखो। जसे म्हने तमारा से परेम राख्यो असोज तम बी एक दूसरा से परेम राखो। ³⁵ अगर तम माय-माय परेम राखोगा, तो इका से सगळा जाणी जायगा की तम म्हारा चेलाहुंण हो।"

पतरस का बारामें भविसबाणी के हूं ईसु के नी जाणूं

(मत्ती २६.३१-३५; मरकुस १४.२७-३१; लूका २२.३१-३४)

³⁶ सिमोन पतरस ने उकासे क्यो, "परभु, तू कां जावे?"

ईसु ने जुवाब द्‍यो, "जां हूं जउं, तू अबी म्हारा पाछे नी अई सकतो पण इका बाद तू आयगा।"

³⁷ पतरस ने उकासे क्यो, "परभु, हूं थारा पाछे कायसरु अई नी सकतो? हूं तो थारा सरु अपणी जान दई दूंवां।"

³⁸ ईसु ने जुवाब द्‍यो, "कंई तू म्हारा सरु थारी जान देगा? हूं थार से खास बात कूं के जदत्तक तू तीन कावा म्हारे नकारी नी लाखेगा, मुरगो बांग नी देगा।"