योहन 8

ब्योबिचार माय पकड़‍ई गी बइरा

¹ पण ईसु जेतून परबत पे चल्यो ग्यो। ² सवेर माय से पाछो मन्‍दर माय आयो। सगळा मनख उका कने आवा लाग्या अने उ बेठिके उणके परबचन देवा लाग्यो। ³ तो फरीसी अने सासतरिहुंण एक बइरा के ल्याया जो ब्योबिचार करता होया पकड़‍ई गी थी अने उके अदाड़ माय उबाड़ी के। ⁴ उणने ईसु से क्यो, "हे गरु, या बइरा ब्योबिचार करता होया पकड़‍ई गी हे। ⁵  नेम-बिधान माय मूसा ने हमारे असी बइरा सरु भाटा मारवा को नेम राख्यो हे। इका बारामें थारो कंई केणो पड़े?" ⁶ वी उके जांचवा सरु असो कई र्‌या था के उका पे दोष लगावा को मोको मिळी सके।

पण ईसु नमिके अपणी अंगळी से जमीन पे लिखवा लाग्यो। ⁷ पण जदे वी घड़ी-घड़ी पुछ्वा लाग्या तो ईसु सुदो उबी ने उण से बोल्यो, "तमार माय जो पापी हयनी उज सगळा से पेलां इके भाटो मारे। ⁸ उ पाछो नमी ग्यो ने अंगळी से जमीन पे लिखवा लाग्यो। ⁹ जदे उणने यो सुण्यो तो पेलां बुड़ाहुंण, अने पाछा सगळा एक-एक करिके जावा लाग्या, अने उ एखलो रई ग्यो, अने वा बइरा वांज उबी रइगी। ¹⁰ जदे ईसु सुदो उबो हुई ने उकासे बोल्यो, "हे नारी वी कां ग्या? कइंका ने थारे सजा को हुकम नी द्‌यो?

¹¹ वा बोली, "कइंका ने नी, परभुजी।"

तो ईसु ने क्यो, "हूं बी थारे सजा नी दउं। जा चली जा, अने अबे पाछी पाप मती करजे।"]

ईसु जगत को उजाळो

¹²  ईसु पाछो लोगहुंण से केवा लाग्यो "जग को उजाळो हूंज हूं। जो म्हारा पाछे हुई जावे उ इन्‍दारा माय नी भटके, पण जीवन जोत पायगा।"

¹³  तो फरीसिहुंण ने उकासे क्यो, "तू अपणी गवई खुदज दई र्‌यो। थारी गवई सांची हयनी।"

¹⁴ ईसु ने जुवाब दई के क्यो, "हालाके अपणी गवई हूं खुदज दउं पण फेर बी म्हारी गवई सांची हे, क्योंके हूं जाणूं के हूं कां से आयो अने कां जई र्‌यो हूं। पण तम नी जाणो के हूं कां से आयो अने कां जई र्‌यो हूं। ¹⁵ तम लोगहुंण काया का मुजब न्याव करो। हूं कइंका को न्याव नी करूं। ¹⁶ अगर हूं न्याव बी करूं तो म्हारो न्याव सांचो, क्योंके हूं एखलो हयनी, पण म्हारा गेले म्हारो पिता परमेसर, जेने म्हारे मोकल्यो हे। ¹⁷  तमारा नेम-बिधान मेंज लिख्यो के कइंकी बात पे दो मनख की गवई मिळी के सांची रे हे। ¹⁸ एक हूं जो म्हारी गवई दउं, अने दूसरो म्हारो पिता हे जेने म्हारे मोकल्यो अने उ म्हारा बारामें गवई दे हे।"

¹⁹ तो वी उकासे केवा लाग्या, "थारो पिता कां रे?"

ईसु ने जुवाब द्‍यो, "तम नी तो म्हारे जाणो नी म्हारा पिता के। अगर तम म्हारे जाणता तो म्हारा पिता के बी जाणता।"

²⁰ ई बचन उने उणकासे मन्‍दर का खजाना कने परबचन देता बखत बोल्या, अने कइंका ने उके नी पकड़्यो क्योंके उको बखत अबी तक नी आयो थो।

तम वां नी जई सकता जां हूं जउं

²¹ उ पाछो उणकासे बोल्यो, "हूं जउं, अने तम म्हारे ढुंडोगा पण अपणा पाप माय मांफी बिना मरोगा। जां हूं जई र्‌यो हूं, वां तम नी अई सकोगा।"

²² इका पे यहूदी हाकिमहुंण बोलवा लाग्या, "कंई उ अपणे खुद के तो मारी नी लाखेगा? उ के हे, जां हूं जई र्‌यो तम नी अई सकता।"

²³ उने उणकासे क्यो, "तम निच्चे का अने हूं अदरे को हूं। तम इना जग का हो अने हूं इना जग को हयनी। ²⁴ इकासरु म्हने तमार से क्यो के तम अपणा पाप माय मरोगा क्योंके जदत्तक तम बिसास नी करो के हूं उज हूं, तम अपणा पापहुंण मेंज मरोगा।"

²⁵ वी उकासे केवा लाग्या, "तू कुंण हे?"

ईसु ने उणकासे क्यो, "हूंज हूं, जो तमारे सुरु सेज केतो अई र्‌यो हूं। ²⁶ म्हारे तमारा बारामें घणी बातहुंण केणी हे अने न्याव करनों हे। पण जेने म्हारे मोकल्यो उ सांचो हे अने वी बातहुंण जो म्हने उकासे सुणी वीज हूं जग से कई र्‌यो हूं।

²⁷ वी या नी जाणी र्‌या था के उ उणकासे परमेसर पिता का बारामें कई र्‌यो थो। ²⁸ तो ईसु ने क्यो, "जदे तम हूं मनख का बेटा के अदरे चड़ावगा जदे तम जाणोगा के हूं हूंज हूं, अने अपणे आप कइंनी करूं, पण जसे पिता ने म्हारे सीखई दी, हूं याज बात कूं। ²⁹ जेने म्हारे मोकल्यो उ म्हारा गेले रे हे उने म्हारे एखलो नी छोड़्यो, क्योंके हूं सदा सेज उज काम करूं जेकासे उ खुस रे।"

³⁰ जदे उने इनी बातहुंण के करी तो घणा मनखहुंण ने उका पे बिसास कर्‌यो।

आजादी को सांचो मारग

³¹ ईसु उना यहूदिहुंण के जिणने उका पे बिसास कर्‌यो थो केवा लाग्यो, "अगर तम म्हारा बचन माय बण्या रोगा, तो सांचीमेंज म्हारा चेलाहुंण केवाड़्या जावगा। ³² अने तम सच्चई के जाणोगा अने सच्चईज तमारे आजादी देवाड़ेगा।

³³  उणने उके जुवाब द्‍यो, "हम इबराइम का बंस का हे। अबी तक कोइंका का गुलाम नी होया। तो फेर तू कसे बोले, के तमारो छुटकारो हुई जायगा?"

³⁴ ईसु ने उणके जुवाब द्‍यो, "हूं तमार से खास बात कूं, हरेक जो पाप करे उ पाप को गुलाम हे। ³⁵ गुलाम हमेस्या घर माय नी रे, पण बेटो हमेस्या रे। ³⁶ अगर हूं परमेसर को बेटो तमारे आजादी दउं तो तम सांचीमेंज आजाद हुई जावगा। ³⁷ हूं जाणूं के तम इबराइम का बंस का हो। फेर बी म्हारे मारी लाखणो चावो, इकासरु के म्हारा बचन तमारा हिरदा माय जगा नी पई र्‌या हे। ³⁸ हूं वीज बातहुंण कूं जे के अपणा पिता का यां देखी। असोज तम बी वीज काम करो हो जिणके तमने अपणा पिता से सुण्यो हे।"

³⁹ उणने जुवाब द्‍यो, "हमारो पिता तो इबराइम हे।"

ईसु ने उणकासे क्यो, "अगर तम इबराइम का बंस का हो तो इबराइम सरीका काम करो। ⁴⁰ पण अबे म्हारा जसा मनख के मारी लाखणो चावो जेने तमारे वा सच्चई बतई जो म्हने परमेसर से सुणी। असो तो इबराइम ने नी कर्‌यो। ⁴¹ तम अपणा पिता को काम करी र्‌या हो।"

पण उणने उकासे क्यो, "हम ब्योविचार से नी जन्म्या। हमारो एकज पिता हे याने के परमेसर।"

⁴² ईसु ने उणकासे क्यो, "अगर परमेसर तमारो पिता होतो, तो तम म्हार से परेम राखता, क्योंके हूं परमेसर से हिट्यो हूं। अपणी मरजी से नी आयो पण म्हारे उनेज मोकल्यो। ⁴³ जो हूं कई र्‌यो हूं उके तम समजो क्यों नी? यो इकासरु हे के तम म्हारा बचन सुणी नी सको। ⁴⁴ तम तो अपणा पिता सेतान का हो अने अपणा पिता की मरजिहुंण के पूरण करनों चाव हो। उ तो सुरु से हत्यारो हे अने सच्चई पे नी ठेर्‌यो रे, क्योंके सच्चई उका माय हेज हयनी। जदे बी उ झुंटो बोले तो अपणा सोभाव सेज बोले, क्योंके उ झुंटो अने झुंटाहुंण को पिता हे। ⁴⁵ हूं सांचो बोलुं, इकासरु तम म्हारो बिसास नी करो। ⁴⁶ तमार माय से कुंण म्हारे पापी ठेराय हे। अगर हूं सांची बोलुं तो तम म्हारो बिसास कायसरु नी करो हो? ⁴⁷ जो परमेसर को हे उ परमेसर की बातहुंण सुणे। तम इकासरु नी सुणो क्योंके तम परमेसर का होज नी।"

ईसु इबराइम से पेलां को हे

⁴⁸ यहूदिहुंण ने उकासे क्यो, "कंई हम सांची नी कई र्‌या के तू सामरी मनख हे, अने थारा माय बुरी आतमा हे?"

⁴⁹ ईसु ने जुवाब द्‍यो, "म्हार माय बुरी आतमा हयनी। हूं अपणा पिता को मान करूं, पण तम म्हारो मान पाड़ो हे। ⁵⁰ हूं अपणी मान मरियादा नी चउं, एक हे जो चावे अने धरम से न्याव करे हे। ⁵¹ हूं तमार से खास बात कूं के अगर कईं को म्हारा बचन के पाळे तो उ कदी मरेगा हयनी।"

⁵² यहूदिहुंण ने उकासे क्यो, "अबे हम जाणी ग्या के थारा माय बुरी आतमा हे। इबराइम मरी ग्यो अने नबिहुंण बी, पण तू के हे के अगर कईं को म्हारा बचन के पाळे तो उ कदी मोत का बस माय नी रेगा। ⁵³ निस्चित तू हमारा पिता इबराइम से बड़ो हयनी जो मरी ग्यो। नबिहुंण बी मरी ग्या। तू अपणे खुद के कंई समजे?"

⁵⁴ ईसु ने जुवाब द्‍यो, "अगर हूं खुदी अपणो मान दउं तो म्हारो आदर मान कइंबी हयनी। म्हारे मान मरियादा देणे वाळो म्हारो पिता हे, जेका बारामें तम को हो उ हमारो परमेसर हे। ⁵⁵ तमने तो उके नी जाण्यो पण हूं उके जाणूं। अगर हूं कूं के हूं उके नी जाणूं, तो हूं तमारा सरीको झुंटो रुंवां, पण हूं उके जाणूं अने उका बचन को पाळण करूं। ⁵⁶ तमारा पिता इबराइम म्हारो दन देखवा की आस से खुस होयो। उने देख्यो बी अने मगन हुई ग्यो।"

⁵⁷ इका पे यहूदिहुंण ने उकासे क्यो, "तू अबी पचास बरस को बी हयनी। कंई तने इबराइम के देख्यो?"

⁵⁸ ईसु ने उणकासे क्यो, "हूं तमार से खास बात कूं, इका पेलां के इबराइम जन्‍म्यो, हूं हे।"

⁵⁹ तो उणने ईसु के मारवा सरु भाटा उठाड़्या, पण उ छिपी के मन्‍दर से बायरे चल्यो ग्यो।