लूका 1

लूका

लिख्यो सुब-समिचार

लूका ने यो सुब-समिचार थियुफिलुस के लिख्यो

¹ आदरणी थियुफिलुस,

नरा लोगहुंण ने उण बातहुंण का बारामें लिखवा को काम अपणा हात माय ल्यो जो हमारा माय घटी। ² ठीक वीज बातहुंण जो हमारे उण लोगहुंण से मिळी, जिणने इनी बातहुंण के सुरु सेज देखी थी अने जो परमेसर का बचन का सेवक था। ³ इकासरु सुरु सेज इनी सगळी बातहुंण के होसियारी से अने सई-सई परखवा का बाद, तमारा सरु लिखणों म्हारे सई लाग्यो। ⁴ जेकासे के तू उण बातहुंण की सच्चई के जाणी ले जिणकी थारे सीख दइगी हे।

योहन का जनम की भविसबाणी

⁵ यहूदिया का राजा हेरोदेस का राजकाल माय जकरियाह नामको एक पुरोहित थो जो पुरोहित अबियाह का दळ को थो। अने उकी बइरा को नाम इलीसिबा थो जो हारुन का कुळ की थी। ⁶ वी दोइज परमेसर की नगे माय धरमी था अने उणका चरित्तर परभु का सगळा हुकम अने नेम-बिधान का मुजब निरदोस था। ⁷ वी बे-ओलाद था, क्योंके इलीसिबा बांझ थी अने दोइज डोकरा-डोकरी हुई ग्या था।

⁸ असो होयो के जदे जकरियाह अपणा दळ की सारी आवा पे परमेसर का सामे पुरोहित को काम करी र्‌यो थो ⁹ तो पुरोहितहुंण की रीति मुजब चिट्ठी लाखी के उके छांटी ल्यो के परभु का मन्‍दर माय जई के धूप-बत्ती जळाय। ¹⁰ अने धूप-बत्ती जळावा का बखत सगळा मनखहुंण बायरे पराथना करी र्‌या था। ¹¹ अने उके धुप-देवा की बेदी का सुदा हाताड़ी परभु को एक सरगदूत उबो नगे आयो। ¹² अने उके देखी के जकरियोह घबरायो अने डर का मारे उबो को उबोज र्‌यो। ¹³ पण सरगदूत ने उकासे क्यो, "हे जकरियाह डरे मती, क्योंके परमेसर ने थारी पराथना सुणी ली हे; थारी बइरा इलीसिबा से थारा सरु एक बेटो पेदा होयगा अने तू उको नाम योहन राखजे।" ¹⁴ थारे आनन्द अने खुसी रेगा, अने उका जनम से नरा लोग आनन्द मनायेगा। ¹⁵  क्योंके परभु की नगे माय उ म्हान रेगा। उ दाखरस अने दारु नी प्येगा, उ अपणी मेतारी की कोख सेज पवित्तर आतमा से भर्‌यो होयो रेगा। ¹⁶ उ इसराइल जात का कुळ माय से नरा के उणका परभु परमेसर आड़ी फेरी लायगा। ¹⁷  अने उ परभु का अगड़े-अगड़े एलियाह नबी की आतमा अने सामरत माय हुई के चलेगा, के पूरखाहुंण का हिरदा बाळ-बच्चाहुंण आड़ी फेरी दे अने हुकम नी मानवा वाळाहुंण के असी समज देगा के धरमिहुंण का जसा बिचार राखे जेकासे के उ परभु सरु एक लायक परजा तय्यार करे।"

¹⁸ जकरियाह ने सरगदूत से पुछ्‌यो, "हूं इके पक्‍की तरा से कसे जाणी सकूं? क्योंके हूं तो डोकरो हुई ग्यो हूं अने म्हारी घराळी बी डोकरी हुई गी।"

¹⁹  सरगदूत ने जुवाब द्‍यो, हूं जिबराइल हूं जो परमेसर का सामे उबो रूं हूं। म्हारे इकासरु मोकल्यो के थार से बातहुंण करूं, अने थारे यो सुब-समिचार सुणउं। ²⁰ देख, जेना दन तक ई बातहुंण पूरण नी हुई जाय तू गुंगो रेगा अने बोली नी सकेगा, क्योंके तने म्हारी बातहुंण पे जो ठीक बखत पे पूरण होयगा बिसास नी कर्‌यो।"

²¹ उना बखत लोग जकरियाह पुरोहित की बाट देखी र्‌या था, अने उणके अचरज हुई र्‌यो थो के उके मन्‍दर माय इतरी देर कायसरु लागी री हे? ²² पण जदे उ बायरे आयो तो उणका से बोली नी सक्यो, अने वी जाणी ग्या के उके मन्‍दर माय कईं को दरसन मिळ्यो हे, क्योंके उ इसारो करतो र्‌यो अने गुंगो बण्यो र्‌यो।

²³ अने असो होयो के जदे उका पुरोहितपणा की सेवा का दन पूरण होया तो उ अपणा घरे अई ग्यो। ²⁴ इना दनहुंण का बाद उकी घराळी इलीसिबा भारीपग से हुई अने उने या कई के खुद के पांच मइना तक छिपाड़ी राखी। ²⁵ उने क्यो, "इना दनहुंण माय परभु ने म्हार पे किरपा भरी नगे करिके, मनखहुंण माय म्हारो लांछण मिटावा सरुज, उने म्हारी बिणती सुणी।"

ईसु का जनम की भविसबाणी

²⁶ इलीसिबा का छटवां मइना माय परमेसर आड़ी से जिबराइल सरगदूत गलील का नासरत नगर माय ²⁷  एक कुंवारी कने मोकल्यो, जेकी सगई यूसफ नामका एक मनख से हुई थी जो दाऊद का बंस को थो, अने उनी कुंवारी को नाम मरियम थो। ²⁸ अने भित्तरे अई के सरगदूत ने मरियम से क्यो, "हे परभु की किरपा-पावा वाळी, परणाम! परभु थारा गेले हे।" ²⁹ या बात सुणी के मरियम घणी डरी गी अने वा सोंच-बिचार माय पड़ी गी के यो कसतरा को परणाम हे। ³⁰ पण सरगदूत ने उकासे क्यो, "हे मरियम, डरे मती! क्योंके थार पे परमेसर की किरपा हुई हे। ³¹  देख, तू गरभ धारेगा अने एक बेटो जणेगा, अने तू उको नाम ईसु राखजे ³²  उ म्हान रेगा, अने परमपरधान को बेटो केवायगा। परभु परमेसर उका पुरखा दाऊद को राज ईसु के देगा। ³³ अने उ याकूब का घराणा पे हमेस्या तक राज करेगा, अने उको राज कदी नी मिटेगा।"

³⁴ मरियम ने सरगदूत से क्यो, "यो कसे हुई सके, क्योंके हूं तो कुंवारीज हूं?"

³⁵ सरगदूत ने उकासे क्यो, "पवित्तर आतमा थार पे उतरेगा अने परमपरधान की सामरत को छायळो थार पे रेगा। इकासरु उ पवित्तर बाळक जो जनमेगा, परमेसर को बेटो केवायगा। ³⁶ देख, थारी नातेदारनी इलीसिबा के बी इना बुड़ापा माय एक बेटो होवा वाळो हे अने जो बांझ केवाड़ी जाती थी यो उको छटवों म‍इनो हे। ³⁷  क्योंके परमेसर सरु कइंज अबगो हयनी।"

³⁸ मरियम ने क्यो "देख, हूं तो परभु की दासी हूं। थारा बचन मुजबीज म्हारा गेले होय।" अने सरगदूत उका कने से चल्यो ग्यो।

मरियम अपणी नातेदारनी इलीसिबा कने

³⁹ तो उणाज दनहुंण माय मरियम उठी ने झट बळ्डा आळा परदेस माय यहूदा का एक नगर आड़ी गी, ⁴⁰ अने जकरियाह का घरे जई ने उने इलीसिबा के परणाम कर्‌यो। ⁴¹ असो होयो के जसोज इलीसिबा ने मरियम को परणाम सुण्यो असोज बाळक उकी कोख माय जोर से उछळी पड़्यो अने इलीसिबा पवित्तर आतमा से पूरण हुई। ⁴² अने उने उंची अवाज से हेला पाड़ी ने क्यो, "तू सगळी नारीहुंण माय धन्‍य हे, अने थारी कोख को फळ बी धन्‍य हे! ⁴³ म्हार पे या किरपा कसे हुई के म्हारा परभु की मेतारी म्हारा कने अई? ⁴⁴ देख, जसाज थारा परणाम का सबद् म्हारा कान माय पड़्या, बाळक म्हारी कोख माय खुसी से उछळी पड़्यो। ⁴⁵ धन्‍य हे वा नारी जेने बिसास कर्‌यो के जो कंई परभु ने उकासे क्यो, उ पूरण होयगा।"

मरियम ने परमेसर की म्हेमा को गीत गायो

⁴⁶  तो मरियम ने क्यो,

"म्हारो हिरदो परभु की बड़ई करे,

⁴⁷ अने म्‍हारो आतमा म्हारा उध्दार करवा वाळा परमेसर माय खुस हूं,

⁴⁸  क्योंके उने अपणी दासी की दीन-हीन दसा पे किरपा करी हे।

इकासरु देखो, अबी से लई के सगळा जुग की पीड़िहुंण म्हारे धन्‍य केगा।

⁴⁹ क्योंके सगळा से सामरतवान ने म्हारा सरु म्हान काम कर्‌या हे,

अने उको नाम पवित्तर हे।

⁵⁰ अने उकी दया पीड़ी दर पीड़ी तक

उणका पे बणी रे हे जो उका से डरे हे।

⁵¹ उने अपणी भुजाबळ से सामरत का काम कर्‌या हे

अने उणके खक्कळ-बक्कळ करी लाख्या जो अपणा हिरदा की भावनाहुंण माय घमण्डी था।

⁵²  उने राजाहुंण के सिंगासण से पटकी लाख्या

अने गरीब-गुरबाहुंण के म्हान करी लाख्या।

⁵³ भूकाहुंण के तो उने अच्छी-भली चीजहुंण से तिरप करी लाख्या

अने धणिहुंण के रित्ता हात हेड़ी लाख्या।

⁵⁴ जसा के उने हमारा पूरखाहुंण से वायदो कर्‌यो

अने अई के अपणा सेवक इसराइल की मदद करी।

⁵⁵ असोज उने रियाद करी ने अपणी दया इबराइम

अने उका बंस से हमेस्या तक करे हे!"

⁵⁶ गीत खतम करवा का बाद, मरियम इलीसिबा का गेले तीन मइना तक रई के अपणा घरे नासरत पाछी अई।

जकरियाह बड़ई को गीत गावा लाग्यो

⁵⁷ जदे इलीसिबा के बाळक जणवा का दन पूरण होया तो उने एक बाळक जण्यो। ⁵⁸ उका पड़ोसी अने नातेदारहुंण ने जदे यो सुण्यो के परभु ने उका पे घणी किरपा करी हे तो उणने उका गेले खुसी मनई।

⁵⁹  असो होयो के वी मनख आठवां दन बाळक को खतणो करावा आया अने उका पिता का नाम पेज उको नाम जकरियाह राखवा लाग्या। ⁶⁰ पण उकी मेतारी ने क्यो, "नी! उको नाम योहन राख्यो जायगा।"

⁶¹ तो उणने उकासे क्यो, "तमारा नातेदारहुंण माय से कइंका कोज यो नाम हयनी!" ⁶² उणने उका पिताजी से इसारो करी ने पुछ्‌यो के "तू उको कंई नाम राखणो चावे?"

⁶³ जकरियाह ने लिखवा की पट्टी मंगाड़ी अने उका पे लिख्यो, "उको नाम योहन हे।" अने सगळा के अचरज होयो। ⁶⁴ झट उकी जीब की गठाण खुली गी अने जीब से परमेसर की इसतुती, करतो होयो बोलवा लाग्यो। ⁶⁵ इका पे अड़ोसी-पड़ोसिहुंण डरवा लाग्‍या अने यहूदिया का आखा बळ्डा परदेस माय इनी सगळी बातहुंण की चरचा होवा लागी। ⁶⁶ जिणने इनी सगळी बातहुंण के सुणी उण सगळा ने अपणा-अपणा मन माय बिचारी ने क्यो "यो बाळक कसो रेगा?" क्योंके जरुरीज परभु को हात उका पे थो।

जकरियाह की भविसबाणी

⁶⁷ अने उको पिताजी जकरियाह पवित्तर आतमा से भर्‌यो होयो, यो कई के भविसबाणी करवा लाग्यो;

⁶⁸ इसराइल को परभु परमेसर धन्‍य होय!

उने हमारी सुद्द लई अने अपणा लोगहुंण के छुड़ावा को काम पूरण कर्‌यो हे।

⁶⁹ अने हमारा सरु अपणा दास दाऊद राजा का कुळ माय

उध्दार को एक सींग हेड़्यो हे,

⁷⁰ पुराणा काल से अपणो वायदो पवित्तर नबिहुंण का मुन्डा से केवाड़्यो थो।

⁷¹ हमारा दुसमनहुंण से

अने हमार से बेर राखवा वाळाहुंण से उने हमारो छुटकारो कर्‌यो हे।

⁷² हमारा पूरखाहुंण पे दया करे

अने अपणा पवित्तर करार के रियाद करे,

⁷³ याने उ वायदो जो उने हमारा पिता इबराइम से कर्‌यो थो, ⁷⁴ के हमारे यो केवा दे के,

हम अपणा दुसमनहुंण का हातहुंण से छुटी के डर्‌या बिना,

⁷⁵ अपणा जीवन भर पवित्तरता

अने धरम से उकी सेवा करां।

⁷⁶  "अने तू हे बाळक परमपरधान को नबी केवायगा क्योंके

तू परभु का अगड़े-अगड़े चली के,

उको मारग तय्यार करे हे।

⁷⁷ अने उका लोगहुंण के

उणका पापहुंण की मांफी की वजासे उध्दार को ज्ञान देगा।

⁷⁸ हमारा परमेसर की घणी दया से हमारा अदरे से सूरज,

याने मसीह को उजाळो चळकेगा,

⁷⁹  याने उणका पे जो इन्‍दारा अने मोत का छायळा माय बेठ्या हे,

के हमारा पगहुंण की अगवाणी सान्ती का रस्ता पे करे।"

⁸⁰ अने उ बाळक बड़तो अने आतमा माय बळवन्‍त होतो अने इसराइल पे परगटवा का दन तक सुनसान जगा पे र्‌यो।