28
ईसु मर्या माय से जीवतो होयो
(मरकुस १६.१–१०; लूका २४.१–१२; योहन २०.१–१०)
1 सबद् बितवा पे, हफ्ता का पेलां दन परोड़ाज मगदला गांम की मरियम अने दूसरी मरियम कबर के देखवा अई। 2 अने देखो, घणी जोर से धरती धुजी, क्योंके परमेसर को एक दूत सरग से उतरी के आयो अने सिल्ला के कबर पे से इकाड़ी सरकई के उका पे बेठी ग्यो। 3 उको रुप बिजळी जसो अने उका लतरा बरफ सरीका धोळा था। 4 नेपादारहुंण उका डर से धुजवा लाग्या अने मर्या जसा हुई ग्या।
5 सरगदूत ने बइराहुंण से क्यो, "डरो मती, क्योंके हूं जाणूं के तम ईसु, जेके कुरुस पे टांगी लाख्यो थो ढुंडी र्या हो। 6 उ यां हयनी, क्योंके उ अपणा केवा का मुजब जिन्दो हुई ग्यो। आव, उनी जगा के देखो जां उके धर्यो थो। 7 उका चेलाहुंण के झट जई के बताड़ो, 'उ मर्या माय से जिन्दो हुई ग्यो। अने देखो, उ तमार से पेलां गलील जायगा; वां तम उके देखोगा।' देखो, म्हने तमारे बताड़ी द्यो हे।"
8 इका पे वी डरी अने घणी खुसी का साते झट कबर से पलटी अने चेलाहुंण के यो समिचार देवा सरु पाटी दई।
9 जदे देखो, ईसु उणकासे मिळ्यो अने क्यो, "तमारे सान्ती मिळे।" वी उका कने अई अने उणने उका पग पकड़ी के उके धोक द्यो। 10 तो ईसु ने उणकासे क्यो, "डरो मती। जाव अने म्हारा भई-बेनहुंणa से को के वी गलील चल्या जावे, अने वां वी म्हारे देखेगा।"
नेपादारहुंण की गवई
11 वी रस्ता मायज थी के देखो, नेपादारहुंण माय से थोड़ाक ने नगर माय जई के पूरो हाल मुख-पुरोहितहुंण से कई सुणायो। 12 तो उणने बुड़ा-हाड़ा नेताहुंण का गेले भेळा हुई के एको कर्यो। अने सिपईहुंण के नरा रुप्या दई के 13 क्यो, "लोगहुंण से कोजो, 'राते जदे हम सोइर्या था तो उका चेलाहुंण अई के उके चोरी लई ग्या।' 14 अने अगर राजपाल का कान तक या बात पोंचे तो हम उके समजाड़ी दांगा अने तमारे संकट से बचई लांगा।"
15 उणने रुप्या लई के जसो सीखाड़्यो थो वसोज कर्यो। या बात यहूदिहुंण माय दूर-दूर तक फेली गी जो आज तक चली री हे।
ईसु ने चेलाहुंण के दरसन अने आखरी हुकम द्यो
(मरकुस १६.१४-१८; लूका २४.३६-४९; योहन २०.१९-२३; परेरितहुंण १.६-८)
16 b फेर ग्यारा चेला गलील का उना परबत पे ग्या जां ईसु ने जावा सरु क्यो थो, 17 अने जदे उणने उके देख्यो तो उके धोक द्यो, पण कंई-कइंका के सक होयो। 18 तो ईसु ने उणका कने अई के क्यो, "सरग अने धरती को सगळो हक म्हारे द्यो हे। 19 c इकासरु जाव, अने सगळी जात का लोगहुंण के चेला बणाव अने उणके परमेसर पिता, बेटो अने पवित्तर आतमा का नाम से बपतिसमो दो, 20 अने जो जो हुकम म्हने तमारे द्या उको पाळण करनों सिखाड़ो। अने देखो, हूं जुगd का आखरी तक सदाज तमारा गेले हूं।"