Hibelu 1

Ini Sa Igsulat Diyà Sa Medoo

HIBELU

Tigtu Eglowon Hésus I Anak I Nemula

¹ Na, egoh anay migtulon sa medoo tegesugkow i Nemula sa kagi igpetiig di diyà sa medoo tupù ta etaw Hudiyu. Medoo gulê mig-ikagi Nemula i diyà kenagda, owoy medoo sa ukit di eg-ikagi diyà kenagda. ² Dodoo ini egoh di tigesa dé sa binaelan i Nemula, enù ka Anak di dé sa egsugkow sa kagi di diyà kenita. Danà sa Anak di si Hésus Kelistu, pineduen i Nemula siini langun eghauwen. Owoy hinemilì i Nemula kagdi anì kagdi sa datù egsabà langun. ³ Owoy danà sa Anak di ma, netiigan ta doo sa kedakel i Nemula enù ka nesetepeng da. Sa adat i Nemula, iya ma adat sa Anak di. Tigtu mekegaga kagi sa Anak di, enù ka danà sa tunung kagi di daa, egsabaan di sa langun pineduen i Nemula. Egoh di migtigtu salà sa langun etaw, nebatun dutu langit dò owoy migpenuu denu kuwanan i Nemula, sa Tigtu Datù diyà langit.

Miglowon Hésus I Diyà Sa Medoo Egsugùsuguen I Nemula

⁴ Na, danà i Hésus migpenuu dé denu kuwanan i Nemula, igpetiig i Nemula si Hésus sa miglowon diyà sa medoo egsugùsuguen di. Hediya ma, uman pa mapulù sa gelal igbegay i Nemula diyà sa Anak di diyà sa gelal sa medoo egsugùsuguen di. ⁵ Enù ka endà duen sa egsugùsuguen di inikagiyan di iling siini kagi di diyà sa Anak di, guwaen di,

“Kuna sa Anak ku,

owoy igpetiig ku dé ini egoh di aken sa Emà ko.”

Hediya ma, beken denu sa egsugùsuguen di siini kagi i Nemula igpesulat, guwaen di,

“Aken sa Emà di, owoy kagdi sa Anak ku.”

⁶ Egoh i Nemula buyu egpeangay sa lebì Anak di diyà siini tanà, guwaen di,

“Kagdi doo sa oloen sa langun egsugùsuguen i Nemula.”

⁷ Dodoo ini polo sa kagi i Nemula denu sa medoo egsugùsuguen di, guwaen di,

“Kagda daa sa egsugùsuguen ku,

owoy amuk duen sa ipebael ku diyà kenagda,

mebaluy lagà da kelamag ataw ka apuy.”

⁸ Dodoo tigesa sa kagi i Nemula denu sa Anak di, enù ka guwaen di diyà kenagdi,

“Kuna si Nemula;

endà duen ketamanan sa kedatù ko taman melugay.

Tigtu metudà sa kedatù ko.

⁹ Meiyap ka daa sa metiengaw adat.

Egkelepuhan ko sa medaet.

Huenan di, aken sa Nemula ko

egpedakel keniko diyà sa medoo duma ko,

owoy igbegay ku diyà keniko sa tigtu dakel kekeanggan.”

¹⁰ Na, duen ma sa kagi i Nemula diyà sa Anak di, guwaen di,

“O Datù, kuna sa migpeduen sa tanà egoh anay.

Owoy danà sa belad ko

pineduen ko sa langun eghauwen diyà langit.

¹¹ Apiya di pa mekedan kani sa tanà owoy langit,

tapay ka doo endà mekedan taman melugay.

Mekedan da lagà sa tapay ginis memoot.

¹² Sambian ko sa langit owoy sa tanà lagà sa tapay kawal dinilin.

Dodoo kuna, tapay ka doo endà mesambian

owoy endà ma meelut sa lalù ko.”

¹³ Hediya ma, endà ma duen egsugùsuguen i Nemula inikagiyan di iling siini kagi di diyà sa Anak di. Guwaen di diyà si Kelistu,

“Penuu ka dahini denu kuwanan ku

taman atuwan ku sa medoo kuntelà ko

owoy ipeutuh ku keniko.”

¹⁴ Na, netiigan ta dé ini i. Sa medoo egsugùsuguen i Nemula, kagda daa sa egsuguen di. Apiya di pa endà mehaa ta duu, egsuguen i Nemula doo kagda anì tabangan da kita i medoo etaw mebegayan lalù endà meelut di.