Lukas 1

Ini Sa Igsulat I

LUKAS

Sa Mepion Tegudon Denu Si Hésus

Ini Sa Pesuwan I Lukas Migsulat Diyà Si Tiyopilu

¹ O Datù Tiyopilu, migsulat dé sa medoo etaw sa ukit-ukit sa kineugpà i Hésus dahini diyà kenita. ² Inudesan da egsulat sa tinulon sa salu di enù ka sa salu di sa tapay mighaa sa langun binaelan di egoh di anay mig-edung, owoy takà da ma egtegudon iya wé diyà kenita. ³ Na Akay, iya ma sa uyot ku isulat ku diyà keniko sa denu si Hésus enù ka tapay doo eg-udesan ku sa egoh di mig-edung taman ini egoh di. Ungayà ku setiponen ku owoy sedenuwen ku diyà siini isulat ku sa medoo balangan dinineg ku, ⁴ anì metiigan ko tuu sa langun dinineg ko denu si Hésus.

Ini Sa Egoh Sa Egsugùsuguen I Nemula Migtulon Sa Kelesut I Huwan

⁵ Na, egoh anay egoh i Hélod sa Datù eg-ipat sa tanà Hudiya, duen sa tegesimbà diyà sa medoo Hudiyu, si Sakaliyas. Kagdi sa sebaen tegesimbà diyà sa medoo duma di tegesimbà tugod i Abiya miggalebek diyà sa Dalesan i Nemula diyà menuwa Hélusalém. Iya sa sawa di, si Ilisabét, sa sebaen ma tugod i Alon sa tegesimbà egoh anay. ⁶ Na, duwa da telesawa metiengaw etaw owoy endà duen salà da diyà sa kehaa i Nemula. Endà duen kenà da eg-amu egpangunut diyà sa langun uledin i Nemula. ⁷ Dodoo endà duen anak da, enù ka tapay dé endà eg-anak si Ilisabét edung egoh da egsesawaay taman egoh da dé migkelukes.

⁸ Agulé, neuma sa pasad da i Sakaliyas owoy sa medoo duma di tugod i Abiya eggalebek diyà sa Dalesan i Nemula, enù ka takà da egkesesambìsambì sa medoo tegesimbà. ⁹ Na iya sa adat sa medoo tegesimbà egsekusingay da anì metiigan da sa etaw mangay dalem sa Dalesan i Nemula anì ulowen di sa mepion ngadeg. Na egoh iya, nehemilì Sakaliyas i. ¹⁰ Agulé egoh di neuma sa pasad di eg-ulow sa mepion ngadeg, mig-angay Sakaliyas i dalem sa Dalesan i Nemula, owoy egsimbà ma sa medoo etaw nesetipon diyà sa duwangen di. ¹¹ Hê, duen sa egsugùsuguen i Nemula migpehaa diyà kenagdi egtigdeg denu kuwanan sa kenà di eg-ulow mepion ngadeg. ¹² Egoh i Sakaliyas mighaa kenagdi, nepetow owoy nelimedangan ma.

¹³ Dodoo guwaen sa egsugùsuguen i Nemula, “Yaka egkelimedangan na, o Sakaliyas, enù ka dinineg i Nemula sa kesimbà ko. Umanak maama sa sawa ko si Ilisabét, owoy iya sa pengadani ko, si Huwan. ¹⁴ Amuk lumesut sa anak ko, meanggan ka temù owoy meanggan ma sa pedu sa medoo etaw, ¹⁵ enù ka kagdi sa etaw pedakelen i Nemula. Endà dé uminem di wain mekehilu ataw ka sa langun balangan mekehilu. Dodoo egoh di endà pa eglesut, linuhub dé sa Metiengaw Suguy i Nemula. ¹⁶ Tuingen di sa pedu sa medoo tugod i Islaél diyà si Nemula sa Datù da. ¹⁷ Egoh anay tigtu mebagel sa galebek i Iliyas egtuing sa pedu sa medoo etaw danà sa Metiengaw Suguy i Nemula. Diya ma Huwan i kani, enù ka tuingen di sa pedu sa medoo lukes maama anì mesesebaen sa pedu da sa anak da, owoy tuingen di ma sa pedu sa tegetipay si Nemula anì umunut da sa penemdem sa medoo egpangunut. Iya maen di ya anì abungan di sa medoo etaw anì mekepangunut da diyà si Datù amuk tumebow.”

¹⁸ Agulé, guwaen i Sakaliyas diyà sa egsugùsuguen i Nemula, “Ngadan sa tandà di anì mekepigtuu a sa inikagi ko denu sa keanak ké, enù ka lukes a dé aken i owoy sa sawa ku ma?”

¹⁹ Migsagbì sa egsugùsuguen i Nemula, guwaen di, “Aken si Gabiyél sa eg-ugpà diyà si Nemula. Pineangay di aken diyà keniko anì tulonen ku diyà keniko siini mepion baelan di. ²⁰ Na, danà ko endà egpigtuu siini tinulon ku, mebuneg ka ini egoh di taman endà tumebow sa agdaw di metuu. Metuu doo sa inikagi ku amuk meuma sa pasad di.”

²¹ Agulé, eg-angat-angatan pelà sa medoo etaw sa kelesut i Sakaliyas. Negaip da enù ka minelugay dalem sa Dalesan i Nemula. ²² Egoh di miglesut, endà dé egpekeikagi di diyà kenagda, huenan di netiigan da duen sa hinaa di igpehaa i Nemula. Egbunegan di kagda takà, enù ka nebuneg dé. ²³ Na, egoh di neubus sa pasad di eggalebek diyà sa Dalesan i Nemula, miglikù Sakaliyas i diyà sa dalesan di.

²⁴ Agulé, melugaylugay pa kedu iya, egkelalingen sa sawa di si Ilisabét, owoy takà eg-ugpà diatas taman lima gebulan. Iya sa kagi di, guwaen di, ²⁵ “Siini egtebow diyà kenak binaelan i Datù enù ka eghiduwan di aken, owoy kinedanan di dé sa kekemala ku diyà sa medoo duma ku.”

Migtulon Sa Egsugùsuguen I Nemula Sa Kelesut I Hésus

²⁶ Agulé, neuma dé enem gebulan egoh i Ilisabét eg-obol, sinugù i Nemula Gabiyél i eg-angay dutu menuwa Nasalét dò diyà uwang Galiliya. ²⁷ Duen sa sebaen kenogon eg-ugpà dahiya, si Maliya. Minesebayal da si Hosé, sa tugod i Datù Dabid. ²⁸ Na, egoh i Gabiyél migtebow diyà si Maliya, guwaen di, “O Okon, meanggan ka dé enù ka hinemilì i Nemula kuna owoy medapag sa pedu i Nemula diyà keniko.”

²⁹ Dodoo egkebukul temù Maliya i danà iya wé inikagi i Gabiyél owoy egtakaan di egpenemdem sa selepangan di. ³⁰ Agulé guwaen sa egsugùsuguen i Nemula, “Yaka egkelimedangan na, Maliya, enù ka tinunungan ka danà i Nemula. ³¹ Taa ko, kumelalingen ka dé owoy umanak ka maama. Iya sa pengadani ko, si Hésus. ³² Kagdi sa dakel etaw lumalag owoy kagdi sa Anak i Nemula, sa tigtu Nemula eglowon diyà langun. Ibegay i Datù Nemula diyà kenagdi sa kedatù i Dabid sa tupù di. ³³ Kumedatù diyà sa langun Hudiyu tugod i Hakob taman endà meelut di. Endà duen ketamanan sa hagdi kedatù.”

³⁴ Agulé, guwaen i Maliya diyà sa egsugùsuguen i Nemula, “Enù kebaluy ini i eg-ikagiyen ko? Enù ka endà pa duen maama nekeuma sa lawa di diyà kenak.”

³⁵ Guwaen sa egsugùsuguen i Nemula, “Tumenà sa Metiengaw Suguy i Nemula diyà keniko, owoy melunog ka sa tunung i Nemula, sa tigtu Nemula eglowon diyà langun. Iya maen di ya metiengaw sa anak ko lumesut owoy kagdi sa Tigtu Anak i Nemula. ³⁶ Na, taa ko sa duma telahadi ko si Ilisabét. Apiya di pa lukes dé owoy tapay dé endà egpekeanak, egkelalingen doo eg-obol maama enem gebulan dé ini egoh di. ³⁷ Enù ka amuk si Nemula, anan meketuu sa langun egbaelan di.”

³⁸ Agulé guwaen i Maliya, “Taa ko, aken sa etaw egpangunut diyà si Datù. Mepion amuk meketuu diyà kenak iya wé tinulon ko.” Agulé, sinalidan sa egsugùsuguen i Nemula.

Ini Sa Egoh I Maliya Miglengen Diyà Si Ilisabét

³⁹ Agulé, endà melugay di kedu iya, miglegkang Maliya i owoy migpetééltéél eg-angay diyà sa sebaen menuwa diyà sa getan-getan diyà uwang Hudiya. ⁴⁰ Egoh di migtebow dahiya, miggemow diyà sa dalesan i Sakaliyas owoy saluan di Ilisabét i. ⁴¹ Hê, egoh i Ilisabét egdineg sa kesalù i Maliya, egtabed sa batà diyà sa getek di. Linuhub Ilisabét i sa Metiengaw Suguy i Nemula, ⁴² owoy pinetaled di sa kagi di, guwaen di, “O Maliya, diyà langun bayi diyà tanà, kuna daa sa tigtu tinunungan i Nemula owoy tinunungan ma sa batà lumesut diyà keniko. ⁴³ Egkegaip a, enù ka endà egketiigan ku duu sa pesuwan di eg-angay diyà kenak sa inay i Datù ku enù ka tukééy a etaw aken i. ⁴⁴ Taa ko, egoh ku migdineg sa kesalù ko, egtabed sa eg-obolen ku danà di egkeanggan. ⁴⁵ Tinunungan ka, enù ka pinigtuu ko metuu sa inikagi i Datù diyà keniko.”

Ini Sa Duyuy I Maliya Eg-olò Si Nemula

⁴⁶ Agulé guwaen i Maliya,

“Egpedakelen sa pedu ku si Datù,

⁴⁷ owoy megaen sa pusung ku danà i Nemula sa eg-aluk kenak.

⁴⁸ Apiya tukééy a etaw, netulengan di aken.

Taa ko, edung ini egoh metulengan sa langun etaw aken

owoy guwaen da, ‘Tinunungan Maliya i.’

⁴⁹ Iya maen di ya enù ka dakel sa binaelan i Nemula diyà kenak.

Mekegaga temù kagdi i owoy tigtu metiengaw.

⁵⁰ Eghiduwan di sa langun etaw eg-adat kenagdi

edung egoh anay taman melugay.

⁵¹ Igpehaa di sa dakel egkegaga di danà sa binaelan di,

owoy pinepelaguy di sa medoo egpedakelen da kagda diyà sa pedu da.

⁵² Pinetukééy di sa medoo dakel datù,

owoy pinedakel di sa medoo tukééy etaw.

⁵³ Binegayan di mepion sa medoo etaw egpeketues anì mebesug da,

dodoo hinemagawan di sa medoo etaw kawasà

owoy endà duen igbegay di inuwit da.

^54,55 Tinabangan di sa medoo tugod i Islaél

enù ka netulengan di sa igpasad di diyà sa medoo tupù ta.

Tinulon di sa kehidu di diyà si Ablaham

owoy diyà sa langun tugod di taman melugay.”

⁵⁶ Agulé, miglengen Maliya i diyà sa kenà i Ilisabét taman telu gebulan. Agulé miglikù diyà sa dalesan di.

Ini Sa Egoh I Huwan Miglesut

⁵⁷ Na, egoh di neuma sa agdaw i Ilisabét eglesutan, maama sa inanak di. ⁵⁸ Egoh di eg-anak, dinineg sa medoo duma di sa dakel kehidu i Datù Nemula kenagdi. Agulé, neseunut da egkeanggan si Ilisabét.

⁵⁹ Agulé egoh di walu dé agdaw miglesut, nesetipon diatas sa medoo duma da anì pekelaingen da sa ipat sa batà owoy begayan da ngadan di, enù ka inunutan da sa tapay adat Hudiyu. Ungayà da peingadanan da si Sakaliyas, enù ka iya ngadan sa emà di. ⁶⁰ Dodoo guwaen i Ilisabét, “Beken iya wé. Ingadanan ta polo si Huwan.”

⁶¹ “Maen di ya?” guwaen sa medoo duma di, “Endà duen duma yu épê iya wé ngadan.” ⁶² Agulé, binunegan da sa emà di eg-igsà sa kepengadan di sa batà. ⁶³ Egbunegan di ma kagda egpebegay egsulatan di, owoy iya sa igsulat di, “Si Huwan sa ngadan di.”

Hê, negaip da langun. ⁶⁴ Agulé, nekedan dé sa kekebuneg di, owoy mig-ikagi ma eg-olò si Nemula. ⁶⁵ Agulé, nelenawan sa langun duma da. Nekeseluh dé iya wé lalag diyà sa langun etaw diyà siedò getan-getan diyà uwang Hudiya, enù ka takà da egseolomoy sa ukit-ukit sa kelesut i Huwan. ⁶⁶ Langun sa migdineg, inipat da diyà sa pedu da sa ukit-ukit di, owoy guwaen da, “Dakel temù kéen sa ketamanan ini batà.” Iya sa kagi da enù ka tinunungan i Nemula Huwan i.

Ini Sa Egoh I Sakaliyas Migsugkow Sa Galebek I Huwan

⁶⁷ Agulé, linuhub Sakaliyas i sa Metiengaw Suguy i Nemula. Hê, migsugkow, guwaen di,

⁶⁸ “Egpekeolò ki si Nemula sa Datù ta,

kita i medoo tugod i Islaél,

enù ka migpedapag diyà kenita

owoy inalukan di kita.

⁶⁹ Pineangay di diyà kenita sa tegealuk tigtu mekegaga.

Kagdi sa sebaen tugod i Dabid

migpangunut diyà si Nemula egoh anay.

⁷⁰ Igpasad i Nemula sa tegealuk egoh anay

danà sa medoo tegesugkow di metiengaw,

enù ka guwaen i Nemula

⁷¹ alukan di kita kedu diyà sa egkegaga sa medoo egkuntelà kenita.

⁷² Eghiduwan di doo kita,

enù ka iya sa igpasad di diyà sa medoo tupù ta,

owoy endà melipengan di duu sa tigtu tuu igpasad di diyà kenita.

⁷³ Pinengibetngibetan di sa pasad di diyà si Ablaham tupù ta egoh anay.

⁷⁴ Iya sa igpasad di alukan di kita kedu sa medoo kuntelà ta

anì endà melimedangan ki mangunut diyà kagdi.

⁷⁵ Iya maen di ya anì metiengaw sa pedu ta

owoy metudà sa adat ta diyà sa kehaa di taman sa lugay ta nehagtay.

⁷⁶ O anak ku, melugaylugay pa kuna sa tegesugkow i Nemula,

sa Nemula tigtu eglowon diyà langun.

Mekehuna ka si Datù

anì abung-abungan ko sa ukitan di tumebow.

⁷⁷ Enù ka ipetiig ko diyà sa medoo etaw di sa kealuk di kenagda

danà sa kepeuloy di sa medoo salà da.

⁷⁸ Mekegaga ka iya wé

enù ka tigtu eghiduwan i Nemula kita.

Lagà teleséng agdaw sa ketebow di eg-aluk kenita,

⁷⁹ enù ka pelegdawan di kita

apiya di pa lagà ki sa etaw eg-ugpà diyà deleman

owoy lagà ki ma nematay danà sa kepigtamay i Nemula kenita.

Iya maen di ya anì ipehaa di diyà kenita sa ukit pedu ta tumanà.”

⁸⁰ Na, miglenuk Huwan i owoy migketudà sa pedu di diyà si Nemula. Agulé, mig-ugpà dutu siedò melabel tanà mediyù dalesan taman endà tumebow sa agdaw di lumalag diyà sa medoo tugod i Islaél.