Malakiyas 4

Ini Sa Agdaw Keligela I Nemula

¹ Na, mig-ikagi Datù Nemula i épê dakel egkegaga, guwaen di, “Taa yu, hih, meuma doo sa agdaw egoh sa medoo etaw hambug owoy sa medoo tegebael medaet meulow lagà sa legami ulowen. Amuk meuma iya wé agdaw, meulow da langun owoy endà duen mesamà diyà kenagda, apiya sebaen. ² Dodoo kiyu i medoo etaw épê kekelimedang diyà kenak, mealukan yu polo danà sa tunung ku lagà sa teleséng agdaw enù ka kedanan di sa medoo linadu yu. Sumautsaut yu danà yu meanggan lagà sa nati sapì pinelaun diyà sa lugenan di. ³ Amuk meuma sa agdaw ku kumukum, ipeuyayà ku keniyu sa medoo tegebael medaet, owoy mekeiling da daa sa kepung tanà sadsadan yu. Aken si Datù Nemula épê dakel egkegaga sa eg-ikagi ini i.

⁴ “Na, petulengtuleng yu sa igtulù i Mosis sa egsuguen ku egoh di migsugkow sa medoo uledin owoy sa medoo sugù igbegay ku diyà kenagdi dutu siedò getan Holéb egoh anay anì pangunutan sa medoo tegeIslaél.

⁵ “Taa yu, hih, peangayen ku diyà keniyu Iliyas i sa tegesugkow kagi ku egoh di endà pa tumebow sa agdaw i Datù Nemula, sa agdaw mekelimedang owoy mekegaip. ⁶ Danà sa ketegudon di, meseunut sa pedu sa lukes owoy sa batà. Amuk endà meketuu iya wé, angayen ku pedaet sa uwang tanà yu.”