2
Sa Medoo Kasuk Lagà Tandà Sa Sabuhanan Agdaw
1 Na, hiyup yu sa tegbuli diyà sa getan Siyon, owoy ipetiig yu ma sa tandà diyà sa mapulù getan i Nemula. Lukub yu, kiyu i medoo etaw eg-ugpà diyà sa tanà Huda, enù ka medapag dé meuma sa agdaw i Datù Nemula. 2 Dumeleman iya wé agdaw enù ka lagkuban sa mekepal gaeb sa agdaw, huenan di tigtu dumeleman sa uwang tanà. Medoo temù sa kasuk lumesut owoy sumeluh da lagà sa keseluh sa teleséng agdaw diyà sa medoo tuduk. Endà pa nehaa éhê iya wé edung egoh anay taman ini egoh di, owoy endà ma dé duen sa hauwen ta iling iya wé taman melugay.
3 Lagà kekaen apuy eg-us-us sa kekaen da sa hinemulaan. Amuk endà pelà egtenà da diyà tanà, éhê palas sa tanà Idena pelà sa tanà. Dodoo amuk lumegkà da dé, lagà sa melabel tanà mediyù dalesan dé sa palas tanà, enù ka endà duen sa samaen da. 4 Éhê palas kudà sa palas da. Owoy amuk egletu da, lagà sa dagì kudà egletu eg-angay eggila sa dagì da. 5 Amuk egpeketotketot da diyà sa pulu tuduk, éhê dagì kalitun eggodoyen sa dagì da, owoy éhê ma lésêlésê keluwen egkeulow sa dagì da. Neseketed da lagà sa medoo sundalu eg-ipanaw eg-angay eggila.
6 Amuk hauwen sa medoo etaw kagda egpedapag, melimedangan da owoy kumelusék da ma. 7 Dumagseg da lagà sa medoo nelayam eg-imatay, owoy kumagbul da diyà sa medoo kutà lagà sa medoo sundalu. Endà ma sumekêsekê da amuk egdagseg da, 8 owoy endà ma egsepekawen da duu sa eg-ukitan da. Eg-ilud da egdagseg owoy endà duen sa kinemkem mebaluy iatu diyà kenagda. 9 Pengayawen da sa dakel menuwa owoy kumagbul da diyà sa medoo kutà. Gumemow da diyà sa medoo dalesan, owoy umukit da diyà sa tatawan lagà sa etaw nakawen.
10 Mekayung sa tanà egoh da egdagseg, owoy lumanuhen ma sa langit. Dumeleman sa agdaw owoy sa bulan, owoy endà ma dé lumegdaw sa medoo bituen. 11 Uwiten i Datù Nemula sa temù medoo sundalu di. Anan da épê egkegaga owoy egpangunut da ma diyà sa igsugù di. Tigtu mekelimedang sa agdaw i Datù Nemula. Endà duen etaw mekegaga tumigkel diyà iya wé gai.
Ini Sa Sasà Anì Mesenulê Sa Etaw
12 Na, eg-ikagi Datù Nemula i, guwaen di, “Apiya ini egoh di, pelikù yu dé diyà kenak owoy pelegkang yu diyà sa pedu yu sa kesenulê yu danà yu egpeulan pelà sa kekaen yu anì sumimbà yu daa owoy danà yu suminegaw owoy mebukul. 13 Yoko egkisì duu sa ginis yu tandà sa egoh yu egkebukul, dodoo pelegkang yu polo diyà sa pedu yu sa kesenulê yu.”
Na, mig-ikagi Howil i, guwaen di, “Pelikù yu diyà si Datù Nemula sa Nemula yu, enù ka tigtu mepion sa adat di. Kagdi sa épê kepeuloy owoy ketaes tali owoy tigtu mehidu ma. Beken iya sa ungayà di amuk pigtamayan di kiyu. 14 Petow ki daa mesenulê Nemula i owoy hiduwan di kita owoy tabangan di ma sa medoo hinemulaan ta. Amuk hediya, dumuen dema sa teligo owoy wain sa ibegay ta diyà kenagdi.
15 Hiyup yu sa tegbuli diyà sa getan Siyon. Ikagiyi yu sa medoo etaw anì peulanen da pelà sa kekaen da owoy setipon yu kagda anì sumimbà da. 16 Setiponoy yu langun anì baelan yu sa mapulù kesetiponoy. Lapegi yu sa medoo lukes owoy sa medoo batàbatà owoy sa medoo batà egsusu pelà. Apiya sa medoo magtu kinawing, mepion amuk lumenged da ma diyà iya wé kesetiponoy. 17 Na, sa medoo tegesimbà eggalebek diyà si Datù Nemula, tumigdeg da diyà sa teliwadaan sa bengawan owoy sa atung kenà da eg-ulow sa igbegay diyà si Nemula. Suminegaw da owoy sumimbà da, guwaen da, “O Datù Nemula, aluki ko sa medoo etaw ko. Yaka egpandayà duu sa medoo liyu etaw diyà sa liyu tanà egpelonon kenami. Yaka ma egpandayà duu sa egoh da egpeumàumà kenami, guwaen da, ‘Kenà di dé sa Nemula yu?’”
Ini Sa Egoh I Nemula Migpelikù Sa Mepion Tanà
18 Na, egoh i Datù Nemula mighaa sa nebaelan diyà sa tanà di, nedaetan pedu di owoy eghiduwan di ma sa medoo etaw di. 19 Sagbian di sa medoo etaw di, guwaen di, “Taa yu. Begayan ku kiyu teligo owoy wain owoy lana anì mebesug yu dema. Owoy endà ma dé mepeumàumaan yu sa medoo etaw diyà sa liyu balangan tanà. 20 Pediyuen ku diyà keniyu sa medoo kasuk lagà sa medoo sundalu kedu diyà sa belabagan, owoy peangayen ku ma kagda diyà sa melabel tanà mediyù dalesan. Sa medoo nekehuna diyà kenagda, peangayen ku diyà sa dagat denu tebowon agdaw amuk diyà ki sa tanà Huda.b Owoy sa medoo mekehudihudi, peangayen ku diyà sa dagat denu salepan amuk diyà ki sa tanà Huda.c Mematay da owoy mekeseluh ma sa kemahù da diyà sa uwang tanà. Iya sa baelan ku danà sa medoo binaelan da diyà keniyu.”
21 O medoo etaw diyà tanà, yoko egkelimedangan na. Keanggan yu polo owoy keiyap yu ma danà sa medoo egkegaipan binaelan i Datù Nemula diyà keniyu. 22 O medoo hinagtay, yoko ma egkelimedangan na. Kumeluenaw dema sa keluwen diyà sa kenà atung egpetabtab. Munga dema sa medoo kayu owoy sa pigus owoy sa palas. 23 O medoo etaw diyà menuwa Siyon, keiyap yu dé. Keanggani yu sa baelan i Datù Nemula, sa Nemula yu, enù ka ibegay di diyà keniyu sa tigtu nesugat gai’t udan amuk sasang kepetunas owoy amuk sasang kepelegà éhê mendaa sa egoh anay. 24 Mepenù dema teligo sa medoo atung kenà eg-elik, owoy sumuwék sa wain owoy sa lana diyà sa medoo kawà diyà sa atung kenà eghemeg.”
25 Mig-ikagi Datù Nemula i, guwaen di, “Ipelikù ku dema diyà keniyu sa medoo nekedan egoh sa medoo kasuk migtenà diyà sa hinemulaan yu. Aken doo sa migpeangay sa medoo kasuk diyà keniyu. 26 Dodoo kumedoo dema sa kaenen yu owoy mebusug yu dema. Huenan di, meolò yu Datù Nemula i sa Nemula yu migbael sa medoo egkegaipan etaw diyà keniyu. Agulé endà dé mepeumàumaan di uman sa medoo etaw ku. 27 Amuk hediya, metiigan yu eg-unut-unut a diyà keniyu i medoo tegeIslaél, owoy metiigan yu ma aken daa si Datù Nemula sa Nemula yu, endà duen sa liyu nemula. Endà dé mepeumàumaan di uman sa medoo etaw ku.”
Ini Sa Pasad I Nemula Sa Kebegay Di Sa Metiengaw Suguy Di
28 Na, mig-ikagi Nemula i, guwaen di, “Meuma doo sa agdaw iluhub ku sa Metiengaw Suguy ku diyà sa langun etaw. Hê, tumulon sa medoo anak yu maama ataw ka bayi sa medoo kagi ku egtebowtebow, owoy tumegeinep sa medoo lukes maama diyà keniyu, owoy duen ma sa mehauwan sa medoo maama batàbatà pelà. 29 Apiya sa medoo egsugùsuguen, maama ataw ka bayi, iluhub ku sa Metiengaw Suguy ku diyà kenagda amuk meuma iya wé agdaw.
30 “Ipehaa ku sa medoo panduan diyà langit owoy diyà tanà. Mehaa sa depanug danà sa kesepatayay etaw, owoy dumuen ma sa apuy owoy sa mekepal ebel. 31 Dumeleman sa agdaw owoy kumelalegà sa bulan éhê depanug amuk buyu dé meuma sa agdaw i Datù Nemula, sa agdaw tigtu mekepesu. 32 Dodoo mealukan doo sa langun etaw umumow diyà si Datù Nemula. Enù ka iya sa inikagi i Datù Nemula dumuen sa etaw mekelesò diyà sa getan Siyon owoy diyà sa menuwa Hélusalém. Kagda sa medoo etaw endà mematay sa hemilien i Nemula.”