Daniyél 11

Ini Denu Sa Medoo Datù Diyà Igiptu Owoy Siliya

² Agulé mig-uman eg-ikagi sa egsugùsuguen i Nemula diyà kenak, guwaen di, “Tuu ini i tulonen ku diyà keniko. Dumuen sa telu mesesetugdug pedatù diyà sa tanà Pélsiya. Agulé sumetugdug diyà kenagda sa keepat di datù, owoy uman pa dakel sa kekawasaan di diyà sa liyu datù. Hê, egoh di tigtu kumedakel sa egkegaga di danà sa kekawasaan di, enggaten di segilaway sa datù diyà tanà Gelisiya. ³ Agulé dumuen ma sa sebaen ma datù épê dakel egkegaga pedatù. Melabel sa mesakupan sa kedatuan di, owoy baelan di ma sumalà dé sa ungayà di. ⁴ Dodoo amuk tigtu dé dakel sa egkegaga di, mepalak epat baed sa kedatuan di. Beken dé medoo tugod di sa meketuhì pedatù, dodoo endà meketepeng sa egkegaga da diyà sa hagdi egkegaga.

⁵ “Na, kumedakel ma sa egkegaga sa datù diyà tanà Igiptu. Dodoo dumuen sa sebaen kaunutan sundalu di meumanan pa sa hagdi egkegaga pedatù, owoy mebagel ma sa kesabà di sa hagdi kedatuan. ⁶ Amuk tumalà dé sa pila gepalay, setampilay sa datù diyà Igiptu owoy sa datù diyà Siliya. Ipesawa sa datù tegeIgiptu sa anak di bayi diyà sa datù tegeSiliya. Dodoo endà kumelugay sa keseunutay da sa bayi lapeg sa datù tegeSiliya, enù ka meuma doo sa agdaw egoh da anan meimatayan sa bayi lapeg sa sawa di owoy sa anak di owoy sa medoo egsugùsuguen di kedu Igiptu dò.

⁷ “Dodoo petuhì pedatù sa duma telahadi sa bayi tegeIgiptu. Hê, pengayawen di sa medoo sundalu sa datù tegeSiliya owoy umawuh diyà sa kutà menuwa da anì tabanan di kagda. ⁸ Agulé uwiten di pelikù mangay Igiptu dò sa medoo inetaw egpenemulawen da, lapeg sa medoo mapulù sangkap da binaelan bulawan owoy pilak. Dodoo melugay pa sa egoh di endà dé mengayaw diyà sa datù tegeSiliya. ⁹ Agulé amuk tumalà sa pila gepalay, mengayaw polo sa datù tegeSiliya diyà sa tanà Igiptu, dodoo mekepelikù diyà sa hagdi tanà enù ka endà mekeatu di.

¹⁰ “Dodoo sa medoo anak sa datù tegeSiliya, setiponen da sa tigtu medoo sundalu anì mengayaw da. Lagà sa kedelug sa memahà sa egoh da mangay gumila taman mekeuma da diyà sa kutà sa datù tegeIgiptu. ¹¹ Dodoo egbulit sa datù tegeIgiptu, huenan di umatu ma gumila diyà sa tigtu medoo sundalu sa datù tegeSiliya. Hê, metabanan di kagda. ¹² Na, danà di migtaban, huenan di peolòolò dé sa datù tegeIgiptu owoy ngibu-ngibuwan sa kuntelà di meimatayan di. Dodoo endà dé melugay sa egoh di tumaban, ¹³ enù ka setiponen dema sa datù tegeSiliya sa tigtu medoo sundalu. Uman pa sa kedoo da diyà sa kedoo da egoh muna. Hê, egoh di tumalà dé sa pila gepalay, pengayawen di dema owoy uwiten di sa medoo sundalu anan épê megamel kinemkem.

¹⁴ “Amuk meuma iya wé gai, medoo sa etaw kumuntelà diyà sa datù tegeIgiptu, lapeg sa medoo duma ko mebalaw tegeIslaél. Iya sa baelan da enù ka ungayà da meketuu selepangan sa nehauwan ko, dodoo endà mekeatu da. ¹⁵ Agulé pengayawen ma sa datù tegeSiliya sa sebaen dakel menuwa neulingutan kutà diyà sa nesakupan sa tanà Igiptu, owoy seulingutan da anì metepel da sa menuwa. Agulé meuyayaan sa medoo sundalu tegeIgiptu. Apiya sa medoo sundalu nelayam eggila, endà doo mekegaga da.

¹⁶ “Huenan di, baelan sa datù tegeSiliya sumalà dé sa ungayà di, owoy endà ma duen sa mekegaga humawid kenagdi. Apiya sa tanà nekepasad i Nemula, sakupen di doo owoy megaga di ma pedaetan. ¹⁷ Penemdemen di ma sumakup sa tanà Igiptu danà sa kebagel sa medoo etaw nesakupan sa kedatuan di. Agulé setampilay da sa datù tegeIgiptu. Pesawaen di ma sa anak di bayi diyà sa datù tegeIgiptu anì medaetan sa kedatuan diyà sa tanà Igiptu. Dodoo endà meketuu sa penemdem di. ¹⁸ Agulé penemdemen di ma mengayaw sa medoo dakel menuwa medapag diyà sa mantadan, owoy atuwan di ma kagda. Dodoo dumuen polo sa sebaen ma kaunutan umatu diyà kenagdi anì mekedan sa kebalaw di owoy anì mekepelikù ma sa mala diyà kenagdi egoh di metabanan. ¹⁹ Agulé pelikù diyà sa menuwa di neulingutan kutà diyà sa hagdi munoy tanà. Dodoo mekesugsug dutu owoy endà dé hauwen di etaw.

²⁰ “Na, sa datù mekesambì kenagdi, duen sa etaw suguen di atung peetuken sa buwis diyà sa medoo etaw anì meumanan sa egkegaga sa kedatuan di. Dodoo endà melugay di, mekesugsug doo, dodoo beken danà kesegilaway ataw ka beken danà kesebulitay.”

Ini Denu Sa Datù TegeSiliya Tegebael Medaet

²¹ Na, mig-uman eg-ikagi sa egsugùsuguen i Nemula, guwaen di, “Dumuen sa etaw dupangdupang mekesambì diyà sa datù tegeSiliya, apiya di pa beken duu tugod datù. Petow dé lumesut enù ka endà peagtem di, dodoo sakupen di sa kedatuan danà daa sa kelugi di. ²² Sa langun kumuntelà kenagdi lapeg sa Tigtu Ulu-ulu sa medoo tegesimbà, anan imatayan di kagda. ²³ Medoo sa datù diyà sa medoo liyu tanà duma di sepasaday, dodoo akalan di polo kagda. Apiya di pa tukééy daa sa kedatuan di, kumedakel doo sa egkegaga di. ²⁴ Tigkemeden di mengayaw sa kenà sa medoo kawasà etaw diyà sa dakel menuwa, owoy baelan di sa endà nebaelan sa medoo tupù di egoh anay. Agulé taladan di sa medoo etaw di sa nekuwa di danà di eggila. Penemdemen di ma mengayaw sa medoo liyu menuwa neulingutan kutà, dodoo mesagdà sa penemdem di.

²⁵ “Pebagelbagel siini datù owoy setiponen di sa medoo mebalaw sundalu anì pengayawen da sa tanà Igiptu. Agulé umatu ma sa datù tegeIgiptu lapeg sa tigtu medoo sundalu di épê megamel kinemkem. Dodoo meakalan sa datù tegeIgiptu danà sa pandapat egbaelan da, huenan di meuyayaan da. ²⁶ Iya mendaa sa pedaet diyà kenagdi sa medoo tigtu duma di. Hê, metabanan sa medoo sundalu di owoy medoo ma sa meimatayan diyà kenagda. ²⁷ Agulé siini duwa datù, setugengay da kumaen, dodoo anan da penemdem mael medaet owoy egsebutbutay da. Dodoo endà meketuu sa penemdemen da enù ka endà pa meuma sa agdaw da hinemilì i Nemula. ²⁸ Agulé lumikù sa datù tegeSiliya diyà sa hagdi munoy tanà, owoy uwiten di sa medoo langun taman nekuwa di danà di eggila. Dodoo egoh di pelawà eg-ipanaw, ungayà di kedanan di sa adat kesimbà sa medoo etaw i Nemula, owoy baelan di ma sumalà dé sa ungayà di. Agulé iya pelawà lumagbas lumikù.

²⁹ “Agulé amuk meuma sa agdaw tinapay i Nemula, pengayawen dulì sa datù tegeSiliya sa tanà Igiptu. Dodoo tigesa sa mebaelan diyà iya wé gai diyà sa nebaelan egoh muna. ³⁰ Tumebow sa medoo baleku etaw tegeLoma anì mengayaw da diyà kenagdi, huenan di tigtu melimedangan. Agulé peesud sa datù tegeSiliya. Dodoo danà di egkelangget, tegpuwan di polo sa medoo etaw egpigtuu diyà si Nemula owoy loyuken di sa medoo etaw uminiyug diyà sa uledin i Nemula. ³¹ Agulé suguen di sa medoo sundalu di anì pedaetan da sa Dalesan i Nemula, owoy hawidan di ma sa uman agdaw kebegay etaw diyà si Nemula. Hê, itenà di ma dahiya sa inetaw tigtu medaet anì medaetan sa kepigtuu sa etaw. ³² Agulé akalan di ma sa medoo tegeIslaél eg-iniyug dé diyà sa uledin i Nemula anì tumampil da diyà kenagdi. Dodoo kumuntelà diyà kenagdi sa medoo etaw egpangunut diyà si Nemula.

³³ “Na, tumulù sa medoo etaw épê keketiig diyà sa medoo liyu etaw, dodoo duen diyà kenagda sa imatayan tigbasen sundang ataw ka ulowen owoy bilangguwen ataw ka lampasan sa medoo langun taman da. ³⁴ Apiya di pa hediya sa ketamanan da, dumuen doo sa tukééy tabang mekuwa da. Dodoo medoo sa liyu etaw ubòubò duma da. ³⁵ Meimatayan sa medoo duma kaunutan épê keketiig. Dodoo danà iya wé, kumetiengaw sa medoo etaw lagà sa bulawan tinapis taman sa egoh di endà meuma sa sabuhanan agdaw, sa agdaw tinapay i Nemula.

³⁶ “Na, baelan sa datù tegeSiliya sumalà dé sa ungayà di. Pedakelen di ma kagdi enù ka lowonen di gaa sa langun egpenemulawen, owoy apiya sa tigtu Nemula sumbungen di doo. Meketuu sa langun ungayà di taman sa egoh i Nemula migtamay kenagdi, enù ka ipetuu i Nemula sa tapay penemdem di. ³⁷ Endà dé adatan siini datù duu sa nemula-mula egpenemulawen sa medoo tupù di owoy sa nemula egkeiyapan sa medoo bayi. Sumalà dé sa nemula, endà adatan di duu enù ka iya sa penemdem di kagdi daa sa miglowon diyà sa langun. ³⁸ Dodoo iya polo sa penemulawen di sa nemula tegebantay sa medoo kutà menuwa, owoy begayan di ma uloy bulawan owoy pilak owoy sa batu mapulù owoy sa medoo liyu langun taman ma. Dodoo endà netiigan sa medoo tupù di iya wé nemula. ³⁹ Na, danà gaa sa ketabang siini egpenemulawen di, huenan di pengayawen di sa medoo menuwa épê kutà tigtu megamel. Pedakelen di sa medoo etaw egpangunut diyà kenagdi owoy gelalen di ma kagda kaunutan owoy taladan di ma kagda tanà lagà sa untung da.

⁴⁰ “Dodoo amuk buyu dé meuma sa hudihudi agdaw, gilawen sa datù tegeIgiptu dema sa datù tegeSiliya. Hê, umatu ma sa datù tegeSiliya, lapeg sa medoo kalitun di atung gamiten di eggila owoy sa medoo atung tegekudà owoy sa medoo baleku ma. Pengayawen di sa medoo liyu balangan tanà enù ka lagà sa aglas memahà sa ukitan di mengayaw. ⁴¹ Ilapeg di ma mengayaw sa tanà nekepasad i Nemula, owoy ngibu-ngibuwan sa etaw imatayan di. Dodoo endà mekuwa di duu sa tanà Idom owoy sa tanà Moab owoy sa baed sa tanà Amoniya. ⁴² Sakupen di sa medoo balangan tanà lapeg ma sa tanà Igiptu. ⁴³ Kuwaen di ma sa medoo langun taman kekawasaan, upama bulawan owoy pilak owoy sa medoo mapulù langun taman diyà tanà Igiptu. Owoy lugpien di ma sa medoo etaw diyà tanà Libiya owoy diyà tanà Itiyopiya.

⁴⁴ “Dodoo petow dé dumuen sa tulon medineg di kedu diyà tebowon agdaw owoy kedu kimataan sa pesuwan di mebukul. Hê, danà di migdineg iya wé, neapuyan sa pedu di, huenan di mengayaw dema owoy imatayan di sa medoo etaw. ⁴⁵ Agulé petigdegen di sa metolol kemalig datù diyà sa neseteliwadaan sa dagat owoy sa getan kenà sa Dalesan i Nemula. Dodoo egoh di dutu, petow dé mematay owoy endà duen sa meketabang kenagdi.”