Isikiyél 33

Si Ikikiyél Sa Lagà Tegebantay Diyà Sa Medoo TegeIslaél

¹ Na, mig-ikagi Datù Nemula i diyà kenak, guwaen di, ² “O Isikiyél, anak etaw daa diyà tanà, ikagiyi ko sa medoo duma ko tegeIslaél. Amuk meuma sa egoh ku sumugù sa medoo sundalu anì mengayaw da diyà sa sebaen menuwa, hemilien sa medoo etaw diyà sa menuwa sa sebaen duma da anì kagdi sa pebantayen da. ³ Amuk hauwen di egdagseg dé sa medoo kuntelà da, hiyupen di sa tegbuli anì ipetiig di diyà sa medoo etaw. ^4-5 Amuk duen etaw mekedineg sa tegbuli owoy endà sagipaen di duu, meimatayan doo amuk tumebow sa medoo kuntelà da. Dodoo danà di doo sa pesuwan di mematay, enù ka mekelesò hedem amuk sinagipà di sa dagì tegbuli. ⁶ Dodoo amuk eghauwen sa tegebantay sa egoh di egdagseg sa medoo egpengayaw owoy amuk endà hiyupen di duu sa tegbuli anì ipetiig di diyà sa medoo etaw, tumebow sa medoo kuntelà da owoy imatayan da sa medoo etaw tegebael salà. Dodoo iya polo sa peépéén ku salà sa tegebantay danà sa medoo duma di nematay.

⁷ “Na, o Isikiyél, hinemilì ku kuna lagà sa tegebantay diyà sa medoo tegeIslaél. Huenan di, dinegdineg ko sa eg-ikagiyen ku owoy sugkowi ko sa igsasà ku diyà kenagda. ⁸ Amuk tulonen ku sa egoh di mematay sa tegebael medaet, dodoo amuk endà ikagiyan ko duu anì ekedan di sa medaet egbaelan di, hê mematay doo danà sa salà di. Dodoo kuna polo sa peépéén ku sa kinepatay di. ⁹ Dodoo amuk inikagiyan ko sa tegebael salà anì ekedan di sa medaet egbaelan di, owoy amuk endà sagipaen di duu, mematay doo danà sa salà di. Amuk hediya, endà dé ipeépê ku duu diyà keniko.”

Ini Sa Kagi Igsugkow I Isikiyél Sa Lagà Tegebantay

¹⁰ Na, mig-ikagi Datù Nemula i diyà kenak, guwaen di, “O Isikiyél, anak etaw daa diyà tanà, egselsel sa medoo tegeIslaél sa egoh da tigtu egkelikutan danà sa ketipay da owoy danà ma sa medoo salà da. Iya sa penemdem da buyu da dé egkematay owoy endà duen sa enuenen da pekihagtay. ¹¹ Ikagi ko diyà kenagda sa egoh di aken si Datù Nemula sa Nemula épê lalù taman melugay, tigtu a endà meanggan eghaa sa kepatay sa medoo etaw tegebael medaet. Iya polo sa ungayà ku umeked da mael medaet anì kumelalù da. Huenan di, o medoo tegeIslaél, sabuhi yu dé sa kebael yu salà. Maen di ya tibabaan yu sa egoh yu mematay?

¹² “O Isikiyél, ikagiyi ko sa medoo duma ko tegeIslaél. Amuk mael salà sa etaw épê metudà adat, endà doo mealukan di danà sa medoo mepion binaelan di egoh anay. Hediya ma, amuk mesenulê sa etaw tegebael medaet owoy amuk sumabuh mael salà, endà doo mepigtamayan di danà sa medoo medaet binaelan di egoh anay. ¹³ Amuk ipasad ku sa egoh di kumelalù sa etaw épê metudà adat, dodoo amuk sumalig daa diyà sa tapay adat di metudà owoy mael polo salà, mematay doo danà sa salà di. Melipengan sa medoo tapay mepion binaelan di. ¹⁴ Upama mikagi a diyà sa etaw tegebael medaet sa egoh di mematay danà sa salà di, dodoo amuk mesenulê owoy baelan di polo sa metudà adat, endà doo mepigtamayan di. ¹⁵ Upama ipelikù di sa medoo pinenakaw di owoy sa igsandà sa etaw nekeutang diyà kenagdi. Amuk sumabuh mael salà owoy mangunut ma diyà sa uledin ku mekepelalù etaw, endà doo mematay di, dodoo kumelalù polo. ¹⁶ Ipeuloy ku sa medoo salà binaelan di, owoy kumelalù doo enù ka egbaelan di sa metudà adat owoy sa mepion.

¹⁷ “O Isikiyél, umikagi sa medoo duma ko tegeIslaél, endà metudà gaa sa kepeukit ku, aken i Datù Nemula. Dodoo sa hagda kepeukit polo sa endà metudà. ¹⁸ Eg-ikagiyen ku dema ini i. Amuk sumabuh mael mepion sa etaw épê metudà adat owoy mael polo salà, mematay doo danà sa medaet binaelan di. ¹⁹ Dodoo sa etaw tegebael medaet, amuk mesenuléén di sa salà di owoy baelan di polo sa mepion owoy sa metudà adat, mealukan doo owoy kumelalù ma. ²⁰ Dodoo tapay doo iya sa penemdem sa medoo tegeIslaél endà metudà gaa sa kepeukit ku, aken i Datù Nemula. Huenan di, ikagi ko diyà kenagda sa egoh ku lumigela sa uman sebaen etaw diyà kenagda danà sa binaelan di.”

Ini Sa Selepangan Sa Egoh Sa Menuwa Hélusalém Nedaetan

²¹ Na, egoh sa kelima di agdaw diyà sa kesepulù di gebulan diyà sa kesepulù di owoy duwa gepalay sa lugay ké nesigkem nekeangay Babiloniya dò, duen sa etaw nekelesò kedu diyà Hélusalém. Mig-angay diyà kenak owoy mig-ikagi, guwaen di, “Neapel dé sa menuwa Hélusalém.” ²² Na, egoh sa sigep egoh di endà pelà mig-angay diyà kenak, tinugedam ku sa tunung i Datù Nemula. Agulé egoh di sumimag egoh sa etaw migtebow diyà kenak, nekeikagi a dé.

²³ Agulé mig-ikagi Datù Nemula i diyà kenak, guwaen di, ²⁴ “O anak etaw daa diyà tanà, ini keikagi sa medoo etaw eg-ugpà diyà sa medoo menuwa nedaetan diyà sa tanà Islaél. Guwaen da, ‘Apiya sebaen i Ablaham daa, binegayan i Nemula kagdi siini tanà Islaél. Labi pa medoo ki dé nesamà ini egoh di, huenan di nita dé siini tanà.’

²⁵ “Na, o Isikiyél, tulon ko diyà kenagda sa kagi ku, aken i Datù Nemula épê dakel egkegaga, guwaen ku, ‘Iya kéen sa penemdem yu niyu dé siini tanà, apiya di pa egkaen yu sa kaleni épê dò pelà depanug, owoy egpenemula yu ma sa medoo inetaw. Eg-imatay yu ma sa duma yu etaw, ²⁶ owoy iya daa sa egsaligan yu sa sundang yu. Egbaelan yu sa medoo balangan medaet diyà sa kehaa i Nemula, owoy egbigaen yu ma sa sawa duma yu. Amuk hediya sa adat yu, maen di ya egpenemdemen yu niyu dé siini tanà?’

²⁷ “Tulon ko diyà kenagda sa kagi ku, aken i Datù Nemula, guwaen ku, ‘Aken sa Nemula melalù endà duen taman, huenan di ipasad ku mematay danà gila sa medoo etaw eg-ugpà diyà sa medoo menuwa nedaetan. Owoy kaenen uled tanà sa medoo etaw eg-ugpà diyà sa liyu sa menuwa, owoy mematay danà linadu sa medoo etaw eglidung diyà ilib ataw ka diyà takub. ²⁸ Baluyen ku melabel tanà mediyù dalesan sa uwang tanà, owoy mekedan sa egkegaga da sa igpeolòolò da. Apiya sa medoo tuduk diyà sa tanà Islaél, tigtu pedaetan ku anì endà dé mebaluy di ukitan etaw. ²⁹ Amuk pigtamayan ku sa medoo etaw danà sa salà binaelan da owoy amuk baluyen ku melabel tanà mediyù dalesan sa tanà da, metiigan da doo aken si Datù Nemula.’”

Ini Ketebowon Sa Inikagi Sa Tegesugkow Kagi I Nemula

³⁰ Na, mig-ikagi Datù Nemula i diyà kenak, guwaen di, “O Isikiyél, anak etaw daa diyà tanà, egseolomoy sa medoo etaw ko denu keniko amuk egkesesiegung da diyà sa medoo kutà ataw ka diyà sa bengawan sa dalesan da. Egseikagiyay da, guwaen da, ‘Mangay ki umigsà diyà si Isikiyél amuk ngadan sa kagi i Datù Nemula egtulonen di ini egoh.’ ³¹ Huenan di, egkesetipon sa medoo etaw ku diyà keniko anì dinegdinegen da sa eg-ikagiyen ko, dodoo endà pangunutan da duu sa tinulon ko diyà kenagda. Diyà sa kagi da daa, dakel sa kehidu da kenak, dodoo iya polo sa egpedakelan pedu da sa hagda doo ungayà kumuwa pilak. ³² Diyà sa kehaa da, lagà ka daa sa etaw egduyuy sa duyuy egpehiduhidu ataw ka lagà ka daa sa metiig egkebit sa dalemetan. Imeles da daa egdinegdineg diyà keniko, dodoo endà pangunutan da duu sa inikagi ko. ³³ Dodoo amuk meketuu sa langun inikagi ko, owoy meketuu doo, iya da pelawà meketiig tuu doo mabes duen sa tegesugkow kagi i Nemula mig-ikagi diyà kenagda.”