Hilimiyas 36

Ini Sa Egoh I Baluk Migbasa Sa Sulat Diyà Sa Dalesan I Nemula

¹ Na, egoh sa keepat di gepalay sa lugay i Hoakim anak i Hosiya migkedatù diyà sa tanà Huda, mig-ikagi Datù Nemula i diyà kenak. ² Guwaen di, “O Hilimiyas, kuwa ka sa kalatas dinilin, owoy sulati ko sa langun inikagi ku diyà keniko denu sa tanà Islaél owoy sa tanà Huda owoy sa langun liyu balangan tanà. Sulati ko sa langun inikagi ku diyà keniko edung sa egoh ku anay mig-ikagi diyà keniko egoh i Hosiya pelà sa datù taman ini egoh di. ³ Amuk dinegen sa medoo etaw tegeHuda denu sa penemdem ku migtamay kenagda, petow ki daa meekedan da sa medaet egbaelan da. Amuk hediya, ipeuloy ku doo sa medaet binaelan da owoy sa medoo salà da.”

⁴ Huenan di, aken si Hilimiyas sa migsasà si Baluk anak i Niliyas, owoy tinulon ku diyà kenagdi sa langun inikagi i Datù Nemula diyà kenak. Hê, igsulat i Baluk diyà sa kalatas dinilin sa langun inikagi ku. ⁵ Agulé tinulon ku diyà si Baluk, guwaen ku, “Nehawidan a lumudep diyà sa Dalesan i Nemula. ⁶ Huenan di, kuna polo sa mangay dutu amuk meuma dema sa agdaw egoh da egpeulan sa kekaen da anì sumimbà da daa, owoy petaled ko basa diyà sa medoo etaw sa langun kagi i Nemula igpesulat ku diyà keniko. Basa ko anì medineg sa langun etaw tegeHuda eglenged kedu diyà sa medoo menuwa da. ⁷ Tigtu egbulitan i Datù Nemula kagda owoy egkelangget ma. Dodoo amuk dinegen sa medoo etaw denu sa penemdem di migtamay kenagda, petow ki daa sumimbà da diyà kenagdi owoy mesenuléén da ma sa medoo medaet binaelan da.”

^8-10 Na, egoh sa kesiyow di gebulan diyà sa kelima di gepalay sa lugay i Hoakim anak i Hosiya migkedatù diyà sa tanà Huda, igsugù sa medoo ulu-ulu sa agdaw egoh da egpeulan sa kekaen da anì sumimbà da daa sa medoo tegeHélusalém, lapeg sa medoo eglenged kedu diyà sa medoo menuwa diyà sa tanà Huda. Hê, igpetuu i Baluk sa langun igsugù ku diyà kenagdi, owoy inuwit di sa kalatas dinilin diyà sa nekepagtaw bilik medapag diyà sa bengawan pinengadanan da Magtu Bengawan diyà sa Dalesan i Nemula. Dutu sa kenà di migpetaled egbasa sa medoo kagi i Datù Nemula igpesulat ku diyà kenagdi diyà sa kalatas dinilin. Na, iya sa épê siini bilik kenà di egbasa si Gimaliyas anak i Sapat sa atung tegesulat sa datù.

Ini Sa Egoh I Baluk Migbasa Sa Sulat Diyà Sa Medoo Ulu-ulu

¹¹ Na, dahiya ma Mikaya i anak i Gimaliyas bébê i Sapat, owoy dinineg di sa kebasa i Baluk sa langun kagi i Datù Nemula nekesulat diyà sa kalatas dinilin. ¹² Huenan di, mig-angay Mikaya i diyà sa metolol dalesan sa datù, owoy mig-awuh diyà sa bilik sa atung tegesulat kenà sa medoo ulu-ulu nesetipon. Dahiya si Ilisama sa atung tegesulat sa datù, owoy si Dilayas anak i Simiyas, owoy si Ilnatan anak i Akbol, owoy si Gimaliyas anak i Sapat, owoy si Sédékiyas anak i Ananiyas, owoy sa medoo liyu pa ulu-ulu. ¹³ Hê, tinulon i Mikaya diyà kenagda sa langun dinineg di kagi i Nemula binasa i Baluk diyà sa medoo etaw. ¹⁴ Agulé sinugù sa medoo ulu-ulu Hihudi i anì angayen di Baluk i anì uwiten di diyà kenagda sa kalatas dinilin binasa di diyà sa medoo etaw. Na, si Hihudi sa anak i Nitaniyas bébê i Silimiyas owoy bébê lulud i Kusi. Hê, inuwit i Baluk sa kalatas dinilin diyà sa medoo ulu-ulu. ¹⁵ Agulé mig-ikagi da diyà kenagdi, guwaen da, “Penuu ka owoy basa ko diyà kenami iya wé sulat diyà sa kalatas dinilin.”

Huenan di, binasa i Baluk diyà kenagda. ¹⁶ Na, egoh di neubus dé egbasa, egseinengtengay da danà da nelimedangan, owoy mig-ikagi da diyà si Baluk, guwaen da, “Mepion amuk tulonen ké ini i diyà si Datù Hoakim.” ¹⁷ Agulé mig-ikagi da diyà si Baluk, guwaen da, “Tulon ko diyà kenami maen di ya negaga ko egsulat langun ini i. Enù di ya, tinulon i Hilimiyas iya wé diyà keniko?”

¹⁸ Migsagbì Baluk i, guwaen di, “Hoò, si Hilimiyas sa migtulon diyà kenak langun ini i, owoy aken daa sa migsulat diyà sa kalatas dinilin.”

¹⁹ Agulé inikagiyan sa medoo ulu-ulu Baluk i, guwaen da, “Mepion amuk lumidung yu si Hilimiyas. Yoko egpetiig duu diyà sa sumalà dé etaw sa kenà yu lumidung.”

Ini Sa Egoh Sa Datù Mig-ulow Sa Kalatas Dinilin

²⁰ Na, igtagù sa medoo ulu-ulu sa kalatas dinilin sinulatan sa kagi i Nemula diyà sa bilik i Ilisama sa atung tegesulat sa datù. Agulé mig-angay da diyà sa datù diyà sa bilik atung kenà di eg-antang diyà sa metolol dalesan di, enù ka eg-angayen da egtulon diyà kenagdi. ²¹ Agulé igsugù sa datù igpekuwa si Hihudi sa kalatas dinilin sinulatan sa kagi i Nemula. Hê, inangay i Hihudi diyà sa bilik i Ilisama, owoy binasa di diyà sa datù owoy diyà sa medoo ulu-ulu egtigdeg diyà sa dapag di. ²² Na, sasang megenaw egoh iya, owoy egpenuu sa datù diyà sa medapag kenà apuy diyà sa bilik sa metolol dalesan di atung kenà di eg-ugpà amuk sasang megenaw. ²³ Hê, egoh i Hihudi neubus dé egbasa sa telu ataw ka epat gebatang, pinisang sa datù sa tukééy gelat di sa kalatas owoy igsungù di diyà apuy. Anan éhê iya sa kinebael di taman sa egoh di neimet neulow sa kalatas dinilin sinulatan sa kagi i Nemula. ^24-25 Dodoo egpegeni da hedem Ilnatan i owoy si Dalayas owoy si Gimaliyas diyà sa datù anì endà ulowen di duu sa kalatas dinilin sinulatan sa kagi i Nemula. Gasama iya, endà doo egtalimaen di duu. Apiya di pa dinineg sa datù owoy sa medoo salu di sa kagi i Nemula igsulat diyà sa kalatas dinilin, endà doo nelimedangan da owoy endà ma nesenulê da.

²⁶ Agulé sinugù sa datù sa anak di si Hilamiyél owoy si Silayas anak i Asliyél owoy si Silimiyas anak i Abdil anì sigkemen da aken owoy si Baluk sa atung tegesulat ku. Dodoo linidung i Datù Nemula kami.

Ini Sa Egoh I Hilimiyas Migdulì Egsulat

²⁷ Na, egoh di neimet dé sa datù mig-ulow sa kalatas dinilin sa igpesulat ku diyà si Baluk, mig-ikagi Datù Nemula i diyà kenak. ²⁸ Guwaen di, “O Hilimiyas, kuwa ka dema sa kalatas dinilin, owoy sulati ko dahiya sa langun kagi nekesulat diyà sa anay kalatas inulow i Datù Hoakim. ²⁹ Owoy ikagi ko ma diyà si Datù Hoakim tegeHuda, guwaen ko, ‘Ini sa kagi i Datù Nemula diyà keniko, guwaen di, Inulow ko iya wé kalatas dinilin, owoy inigsà ko sa pesuwan di igsulat i Hilimiyas sa egoh sa datù tegeBabiloniya mangay dahini anì pedaetan di siini menuwa owoy imatayan di ma sa medoo etaw lapeg sa medoo hinagtay. ³⁰ Huenan di, aken si Datù Nemula sa umikagi diyà keniko. O Datù Hoakim, endà dumuen sa tugod ko kumedatù diyà sa nesakupan sa kedatuan i Dabid egoh anay. Amuk mematay ka, mekeenag sa lawa ko diyà sa kenà di mebekol meelut agdaw owoy megenawan amuk sigep. ³¹ Pigtamayan ku kuna lapeg sa medoo tugod ko owoy sa medoo salu ko ma danà sa medoo salà yu. Ipetuu ku sa langun igpasad ku migtamay diyà keniyu owoy diyà sa langun etaw tegeHélusalém owoy tegeHuda, enù ka endà sinagipà yu duu sa medoo inikagi ku.’”

³² Agulé migkuwa a dema sa kalatas dinilin owoy igbegay ku diyà si Baluk sa atung tegesulat ku, owoy igsulat di dema sa langun inikagi ku diyà kenagdi. Igsulat di sa langun nekesulat diyà sa anay kalatas dinilin inulow i Datù Hoakim, owoy duen ma sa igdugang ku igpesulat diyà kenagdi.