Hilimiyas 26

Ini Sa Egoh Da Egkelukuy Mimatay Si Hilimiyas

¹ Na, endà iseg di nelugay sa egoh i Hoakim anak i Hosiya migkedatù diyà Huda, mig-ikagi Datù Nemula i diyà kenak. ² Guwaen di, “O Hilimiyas, tigdeg ka diyà sa duwangen sa Dalesan i Nemula, owoy ikagiyi ko sa langun etaw tegeHuda eg-angay egsimbà dahiya. Tulon ko diyà kenagda sa langun ipeikagi ku diyà keniko. Yaka egsiat duu, apiya sebaen daa. ³ Petow ki daa migtuu da owoy ekedan da ma sa medaet egbaelan da. Amuk hediya, endà ipetuu ku duu sa penemdem ku migtamay kenagda danà sa medaet binaelan da.”

⁴ Igpeikagi i Datù Nemula diyà kenak diyà sa medoo etaw, guwaen di, “Aken si Datù Nemula sa migsugù sa kepigtuu yu diyà kenak danà yu egpangunut diyà sa uledin igbegay ku diyà keniyu, ⁵ owoy danà yu ma egsagipà sa kagi sa medoo tegesugkow kagi ku egsesambìsambiay egpeangayen ku diyà keniyu. Dodoo tapay yu doo endà egpangunt diyà sa inikagi da. ⁶ Amuk tapay yu doo endà migtuu, pedaetan ku siini Dalesan i Nemula, lagà sa egoh ku migpedaet sa menuwa Silo egoh anay. Agulé sa medoo etaw diyà sa medoo liyu balangan tanà, gamiten da sa ngadan siini menuwa Hélusalém amuk tubaden da sa etaw.”

⁷ Na, aken si Hilimiyas sa egtulon ini i. Dinineg sa medoo tegesimbà owoy sa medoo tegesugkow kagi owoy sa langun etaw dalem sa Dalesan i Nemula iya wé kagi i Nemula tinulon ku. ⁸ Dodoo egoh ku neubus eg-ikagi sa langun igpeikagi i Nemula diyà kenak, sinigkem da aken. Mig-ikagi da, guwaen da, “Mepion amuk meimatayan ka danà iya wé inikagi ko! ⁹ Maen di ya eggamiten ko sa ngadan i Datù Nemula egoh ko egtulon sa egoh di mekeiling menuwa Silo sa Dalesan i Nemula? Maen di ya egtulonen ko medaetan siini menuwa owoy endà duen sa etaw mesamà, apiya sebaen daa?” Hê, sineulingutan da aken diyà sa Dalesan i Nemula.

¹⁰ Na, egoh sa medoo ulu-ulu tegeHuda nekedineg denu iya wé nebaelan, miglaun da kedu diyà sa metolol dalesan sa datù, owoy mig-angay da egpenuu diyà sa atung kenà da eg-antang diyà sa pinengadanan da Magtu Bengawan diyà sa Dalesan i Nemula. ¹¹ Agulé sa medoo tegesimbà owoy sa medoo tegesugkow kagi, mig-ikagi da diyà sa medoo ulu-ulu owoy diyà sa langun etaw, guwaen da, “Mepion amuk meimatayan siini etaw, enù ka inikagi di sa egoh di medaetan gaa siini menuwa ta. Apiya kiyu, nedineg yu ma sa inikagi di.”

¹² Agulé mig-ikagi a diyà sa medoo ulu-ulu owoy diyà sa medoo etaw nesetipon, guwaen ku, “Sinugù i Datù Nemula aken egpetulon sa langun kagi ku dinineg yu denu sa mebaelan diyà sa Dalesan i Nemula owoy diyà siini menuwa ma. ¹³ Dodoo amuk sambian yu sa adat yu owoy sa egbaelan yu ma, owoy amuk mangunut yu ma diyà sa kagi i Datù Nemula, sa Nemula yu, endà ipetuu di duu sa kepigtamay di keniyu. ¹⁴ Na aken, kaini a leketanà diyà sa egkegaga yu. Huenan di, baeli yu diyà kenak sumalà dé sa mepion diyà sa penemdem yu mael. ¹⁵ Dodoo tandai yu ini i. Amuk imatayan yu aken, kiyu i langun eg-ugpà diyà siini menuwa polo sa mesalà danà yu mimatay sa etaw endà duen salà, enù ka tuu si Datù Nemula sa migsugù kenak egpeikagi diyà keniyu sa langun kagi ku dinineg yu.”

¹⁶ Agulé mig-ikagi sa medoo ulu-ulu owoy sa langun etaw diyà sa medoo tegesimbà owoy diyà sa medoo tegesugkow kagi, guwaen da, “Endà mepion di amuk imatayan ta siini etaw, enù ka tinulon di diyà kenita sa igpeikagi i Datù Nemula, sa Nemula ta.”

¹⁷ Hê, migtigdeg sa medoo duma kaunutan, owoy mig-ikagi da diyà sa langun etaw nesetipon. ¹⁸ Guwaen da, “Egoh anay egoh i Isikiyas sa datù diyà sa tanà Huda, migsugkow Mikiyas i tegeMilosét sa kagi i Nemula diyà sa langun etaw. Guwaen di, ‘Ini sa kagi i Datù Nemula épê dakel egkegaga. Mebaluy daduwen sa Getan Siyon lagà sa sebaen kenà atung eghemula, owoy mekeiling dinugkow batu sa menuwa Hélusalém, owoy mebaluy ma ketalunan siini getan kenà sa Dalesan i Nemula.’ ¹⁹ Na, egoh iya, endà inimatayan i Datù Isikiyas owoy sa medoo duma di duu Mikiyas i danà iya wé inikagi di. Dodoo nelimedangan polo Datù Isikiyas i diyà si Datù Nemula, owoy tigtu egpehiduhidu diyà kenagdi. Huenan di, endà igpetuu i Datù Nemula duu sa kepigtamay di kenagda. Na, amuk imatayan ta Hilimiyas i ini egoh di, medapag dé mekeuma diyà kenita sa kepigtamay tigtu mekepesu.”

²⁰ Na, duen ma sa sebaen tegesugkow kagi i Nemula si Uliyas anak i Semiyas kedu diyà sa menuwa Kilat-Hiyalim. Tinulon di sa denu kepigtamay i Nemula mekeuma diyà sa menuwa Hélusalém owoy diyà sa tanà Huda nekeiling sa tinulon i Hilimiyas. ²¹ Hê, egoh i Datù Hoakim owoy sa medoo ulu-ulu sundalu di owoy sa medoo salu di migdineg sa inikagi i Uliyas, iya sa ungayà sa datù ipeimatay di Uliyas i. Dodoo egoh i Uliyas nekedineg denu iya wé, migpelaguy eg-angay Igiptu dò danà di nelimedangan. ²² Dodoo igsugù i Datù Hoakim diyà si Ilnatan anak i Akbol owoy diyà sa medoo liyu etaw di anì sigkemen da Uliyas i dutu Igiptu dò. ²³ Agulé sinigkem da kagdi diyà Igiptu, owoy inuwit da diyà si Datù Hoakim. Hê, igpeimatay di owoy igpebuung di sa lawa di diyà sa atung kenà da eglebeng sa medoo etaw pubeli.

²⁴ Dodoo binuligan i Ahikam anak i Sapat aken, huenan di endà mekebegay a diyà sa medoo etaw anì ipeimatay da aken.