22
1 Uman pa mepion sa lalag sa etaw danà sa mepion egbaelan di diyà sa lalag di danà di kawasà.
2 Nesetepeng doo sa kawasà etaw owoy sa pubeli, enù ka sebaen i Nemula daa sa migbael kenagda.
3 Sa etaw épê medalem penemdem, metiigan di sa medaet tumebow owoy umiwod dahiya. Dodoo sa etaw endà mepion penemdem, endà mesagipà di duu, huenan di mepigtamayan.
4 Sa etaw épê kekelimedang diyà si Datù Nemula owoy egpetukééy ma, iya sa untung mekuwa di sa medoo langun taman di owoy sa keadat etaw kenagdi owoy sa lalù di ma.
5 Duen sa medoo lagà litag egpekegapen sa medoo tegebael medaet, dodoo amuk ungayà sa etaw sa egoh di kumelalù, pediyù dahiya.
6 Tului ko diyà sa anak ko sa mepion baelan di, agulé amuk kumedakel dé, endà sumabuh di mael mepion.