10
Ini Sa Medoo Milantek Kagi I Datù Salomon
1 Mebegayan kekeanggan sa emà danà sa anak di épê keketiig. Dodoo mebegayan bukul sa inay di amuk ngahàngahà sa anak di.
2 Endà mekepepion di keniko sa nekuwa ko eglipul, dodoo kumelalù ka polo danà sa metiengaw adat ko.
3 Endà pandayaen i Nemula duu sa etaw metiengaw adat amuk egbitilen, dodoo alangen di polo sa ungayà sa tegebael medaet.
4 Mepubeli ka danà ko pauken, dodoo kumawasà ka danà ko megelol.
5 Sa etaw épê keketiig, egketuwen di bunga sa igtudak di amuk sasang keketu. Dodoo mekemala sa etaw takà egtudug amuk sasang keketu.
6 Metabangan sa etaw metiengaw adat, dodoo sa tegebael medaet, eglidungen di sa kadupangan di danà sa keikagi di ubòubò mepion.
7 Apiya di pa nematay dé, tapay doo metulengan ta sa etaw egbael mepion. Dodoo melemu daa melipengan ta sa etaw tegebael medaet.
8 Sa etaw egpekesabut, mangunut diyà sa mepion igsasà, dodoo medaetan sa etaw ngahàngahà tegepeampay eg-ikagi.
9 Amuk metudà adat sa etaw, endà duen sa medaet tumebow diyà kenagdi. Dodoo sa etaw endà metudà adat, mehaa doo sa medoo egbaelan di.
10 Mekebogo sa etaw tegeakal amuk endà eg-ikagi di sa tigtu tuu, dodoo mekebogo sa etaw ngahàngahà sumalà dé sa ikagiyen di.a
11 Mekebegay lalù sa eg-ikagiyen sa etaw metiengaw adat. Dodoo sa tegebael medaet, eglidungen di sa kadupangan di danà sa keikagi di ubòubò mepion.
12 Iya pesu sa samuk sa kekelepuh, dodoo mekepeuloy sa etaw sa langun salà sa duma di danà sa kehidu di.
13 Miulan sa keikagi sa etaw épê keketiig, dodoo balbal sa mehaa sa etaw ngahàngahà.
14 Sa etaw épê keketiig, umanan di sa netiigan di. Dodoo amuk umikagi sa etaw ngahàngahà, medapag dé sa medaet.
15 Mealukan sa kawasà etaw danà sa pilak di, dodoo medaetan sa etaw pubeli danà sa kepubeliyan di.
16 Iya sa untung mekuwa sa etaw egbael mepion sa kelalù di. Dodoo sa tegebael medaet, meumanan pa sa kebael di salà.
17 Kumelalù sa etaw egdinegdineg amuk eg-indawen. Dodoo sa etaw endà egsangkup diyà sa egoh di nesalà, umenggat pa uman diyà sa medoo duma di mael salà.
18 Tegebutbut sa etaw amuk eglidungen di sa kekelepuh di, owoy ngahàngahà sa etaw tegesumbung.
19 Melemu ka mekesalà amuk sumubela sa keikagi ko. Dodoo sa etaw épê keketiig, endà iseg di umebes-ebes.
20 Lagà sa tigtu pilak sa keikagi sa metiengaw etaw, dodoo endà duen ulan sa penemdem sa etaw tegebael medaet.
21 Metabangan sa medoo etaw danà sa keikagi sa metiengaw etaw, dodoo mekesugsug sa medoo etaw ngahàngahà danà sa endà kipedu da.
22 Kumawasà sa etaw danà sa ketabang i Datù Nemula, owoy endà ma begayan di duu kekebukul.
23 Egkeiyapan sa etaw ngahàngahà sa kebael di medaet, dodoo egkeanggan sa etaw épê keketiig danà sa medoo milantek egbaelan di.
24 Mekeuma doo diyà sa etaw tegebael medaet sa egkelimedangan di. Hediya ma, mekuwa ma sa etaw metiengaw adat sa hagdi ungayà.
25 Amuk mekeuma sa lagà meleges kelamag, melayap lagà opoh sa medoo tegebael medaet. Dodoo endà metigkul sa medoo etaw metiengaw adat taman melugay.
26 Amuk suguen ko sa pauken, lagà ka eg-inem sukà mekelengilu owoy lagà ka egkeepuk lugbuk, enù ka endà tumuu di.
27 Mesumpatan lalù sa etaw épê kekelimedang diyà si Nemula, dodoo kumepokò polo lalù sa etaw tegebael medaet.
28 Iya sa eg-angat-angatan sa etaw metiengaw adat sa kekeanggan da, dodoo endà duen sa mepion eg-angat-angatan sa etaw tegebael medaet.
29 Tungguan i Datù Nemula sa medoo etaw metudà adat, dodoo pigtamayan di sa medoo tegebael medaet.
30 Endà mekehalì umugpà sa medoo etaw metiengaw adat, dodoo endà kumelalù sa medoo tegebael medaet diyà sa tanà da.
31 Anan milantek sa eg-ikagiyen sa etaw metiengaw adat, dodoo metepelan sa medoo butbuten.
32 Metiigan sa etaw metiengaw adat sa nesugat eg-ikagiyen di, dodoo anan daa kelekab sa eg-ikagiyen sa medoo tegebael medaet.