7
Ini Dema Sa Sasà Anì Iwoden Sa Bayi Tegebigà
1 O Adug, penemdem ko sa inikagi ku, owoy yaka egkelipeng duu sa igsugù ku diyà keniko. 2 Baeli ko sa igsugù ku anì kumelalù ka, owoy pepion ko sa kepangunut ko diyà sa igtulù ku éhê sa keipat ko sa mata ko. 3 Seuwit-uwit pedu ko sa igtulù ku, owoy udesi ko tagui diyà sa penemdem ko.
4 Mepion amuk pedakelan pedu ko sa milantek penemdem lagà sa kehidu ko sa tebay ko, owoy pedakel ko diyà sa pedu ko sa keketiig lagà sa loyuk ko tigtu duma ko egkesehidu. 5 Enù ka danà iya wé, mekepediyù ka diyà sa bayi dupang owoy diyà sa metolol keikagi sa bayi sawa sa liyu etaw.
6 Na, sebaen agdaw egtataw a diyà sa tatawan sa dalesan ku. 7 Hinaa ku sa medoo melaud, dodoo duen sa sebaen hinaa ku endà pelawà negulub sa mepion netiigan di. 8 Iya sa egbaelan di, eg-ipanawpanaw diyà sa dalan medapag diyà sa selaban dalan egtodò diyà sa dalesan sa bayi dupang. Hê, mig-ukit diyà sa medapag dalesan sa bayi 9 egoh di tumagkup dé.
10 Agulé tinelabuk sa bayi. Migkegal daa sa menipis kegal, owoy tapay dé pinenemdem di sa baelan di. 11 Na, sogbol iya wé bayi owoy metegas sa linoyen di, owoy endà egtanà di eg-ugpà diyà sa dalesan di. 12 Takà eg-angat-angat diyà sa kenà sa medoo etaw, muni dé sa kenà di iling ka diyà dalan ataw ka padian ataw ka selaban, enù ka iya sa hagdi adat.
13 Hê, egoh di mighaa siedò melaud, linagap di owoy pinengadekan di ma, owoy endà egkemalaan di duu eg-inengteng. Agulé inikagiyan di, guwaen di, 14 “Medoo sa kaenen ini egoh di diyà sa kenà ku, enù ka ini sa agdaw ku egpista danà sa igpasad ku diyà si Nemula. 15 Huenan di, egpengauwen ku kuna, enù ka mebugà a dé keniko. Mepion enù ka nesehaa ki ini egoh di. 16 Binekah ku diyà sa kenà ku egtudug sa ginis lino épê metolol balek kedu diyà Igiptu. 17 Dinabusan ku sa medoo mepion ngadeg, mila owoy aloy owoy kanéla. 18 Téél ka dé, gumemow ki owoy sumelapan ki elut sigep. Meanggan ki amuk meselagap ki. 19 Endà dahini sa sawa ku, enù ka mig-ipanaw eg-angay mediyù dò. 20 Medoo sa pilak inuwit di, owoy endà lumikù di kéen taman umedung sa bulan.”
21 Huenan di, neenggat sa maama danà sa metolol inikagi di. 22 Hê, petow dé mig-unut sa maama diyà kenagdi, lagà sa tudu sapì inagak di eg-angay diyà sa kenà di sumbalien, owoy lagà ma sa seladeng ginapen litag 23 owoy pinanà da seleb nekesugat diyà sa pusung di. Nekeiling ma sa manuk tanà ginapen litag, enù ka endà netiigan di duu sa sugsug di.
24 Na, o medoo anak ku, dinegdineg yu diyà kenak owoy penemdem yu sa eg-ikagiyen ku. 25 Tuliki yu sa pedu yu anì endà meakalan yu diyà sa bayi éhê iya wé. Yoko eg-angay ya diyà sa kenà di 26 enù ka medoo sa maama nepigtamayan, owoy endà dé meesà sa kedoo maama nedaetan danà sa bayi iling iya wé. 27 Lagà sa kalasada egtodò diyà bayà sa dalesan sa tegepediyangdang, owoy amuk mangay ka dutu iya dé sa kenà ko mekesugsug.