Milantek Kagi 4

Ini Sa Kiulan Sa Milantek Kagi

¹ Na, o medoo anak ku, dinegdineg yu sa itulù sa emà yu. Petumàmà yu anì dumuen sa netiigan yu. ² Enù ka tigtu mepion sa itulù ku, huenan di yoko eglipeng duu. ³ Egoh ku batàbatà pelà owoy egoh ku eg-ugpà pelawà diyà si emà, aken sa bugtung anak i inay. ⁴ Owoy tinulù a sa emà ku, guwaen di, “Tagui ko diyà sa pedu ko sa inikagi ku, owoy pangunuti ko sa igsasà ku anì kumelalù ka. ⁵ Sakem ko sa keketiig owoy sa kekesabut. Yaka egkelipeng duu sa medoo inikagi ku diyà keniko owoy yaka ma egsekê ya. ⁶ Yaka eg-iniyug duu sa keketiig enù ka ipaten di kuna. Pedakel ko polo diyà sa pedu ko anì tulikan di kuna. ⁷ Kuwa ko sa keketiig enù ka tigtu miulan. Sumalà dé sa liyu egbaelan ko, kuwa ko ma sa kekesabut. ⁸ Pedakel ko diyà sa pedu ko sa keketiig anì baluyen di kuna datù. Peeles ko enù ka meolò ka danà sa keketiig. ⁹ Tigtu ka meolò amuk épê ka keketiig.”

Ini Sa Sasà Di Denu Sa Mepion Adat

¹⁰ O Adug, dinegdineg ka diyà kenak, owoy penemdem ko sa ikagiyen ku diyà keniko anì kumelalù ka. ¹¹ Itulù ku diyà keniko sa adat sa etaw épê keketiig owoy sa nesugat egbaelan denu sa hagtay ko. ¹² Amuk hediya sa egbaelan ko, endà duen sa mekealang keniko, owoy endà ma mekedagsà ka amuk lumetu ka. ¹³ Temù ko peeles diyà sa pedu ko sa medoo igtulù ku diyà keniko. Yaka egpeulan duu. Tuliki ko temù enù ka iya sa mekebegay lalù diyà keniko.

¹⁴ Yaka egpeunut ta diyà sa medoo etaw tegebael medaet, owoy yaka ma eg-iling duu sa adat da. ¹⁵ Iwod ko iya wé, owoy ekedi ko sa medaet. Selab ka owoy pelagbas ka bael mepion. ¹⁶ Endà meketudug sa medoo tegebael medaet amuk endà duen sa medaet binaelan da. Owoy endà ma lumanek da amuk endà duen sa etaw neenggat da diyà salà. ¹⁷ Sa kebael da medaet owoy sa kedupang da, iya lagà sa kaenen da owoy sa inemen da.

¹⁸ Na, lagà sa tiwaswas magtu kesimag sa adat sa metiengaw etaw, owoy egpeanag-anag egkeilag lagà sa agdaw amuk megelanay kelasag diisek. ¹⁹ Dodoo lagà tigtu deleman sa adat sa medoo tegebael medaet. Huenan di, endà metiigan da duu sa pesuwan da nekebigkil.

²⁰ O Adug, petumàmà ko sa eg-ikagiyen ku owoy dinegdineg ko. ²¹ Yaka egkelipeng duu. Dodoo tagui ko polo diyà sa pedu ko, ²² enù ka iya sa mekebegay lalù owoy sa mekepepion keugpà diyà sa langun etaw meketiig sa itulù ku.

²³ Tigtu tuliki ko sa pedu ko, enù ka iya keduwan sa langun egbaelan ko.

²⁴ Yaka egbutbut ta, owoy yaka ma eglekab ba eg-ikagi.

²⁵ Petudà ko sa adat ko lagà sa etaw endà eglangalanga di eg-angay diyà sa eg-angayan di, owoy yaka ma egsekê ya. ²⁶ Tigtu penemdem ko sa langun baelan ko, agulé mebaluy sa langun ungayà ko. ²⁷ Iwod ko sa medaet. Yaka egsekê ya diyà sa metudà adat.