Hob 14

Mepokò Daa Sa Lalù Etaw

¹ Mig-ikagi Hob i, guwaen di, “Na, tigtu mepokò daa sa hagtay sa etaw, owoy nepenù kelikutan. ² Lagà sa bulok melemu melaeb, owoy melemu mekedan lagà sa alung daa egtalà. ³ O Nemula, maen di ya eg-inengtengen ko aken, owoy egpetaengen ko aken diyà keniko anì kukumen ko? ⁴ Endà duen sa metiengaw lumesut kedu diyà sa etaw endà metiengaw. ⁵ Tapay dé netiigan ko sa lugay lalù sa etaw diyà tanà. Binaelan ko sa ketamanan di, owoy endà dé mekelowon di dahiya. ⁶ Yaka dé egsagipà duu, dodoo pelebù ko dé taman meelut sa kelikutan egkeukitan di.

⁷ “Adi-adi pa sa kayu, enù ka amuk kinasing tapay doo sumulow owoy manga dema. ⁸ Apiya di pa lukes dé sa medoo dalid di owoy éhê egoh palas mengangu dé sa tued di, ⁹ tumunas doo amuk mewayegan owoy manga dema lagà sa batà pelà kayu. ¹⁰ Dodoo sa etaw amuk mematay, iya daa sa ketamanan di. Amuk mebugtus dé sa ginawa di, ngadan kéen sa angayan di? ¹¹ Lagà sa lawa't wayeg meeti amuk pengagdaw, owoy lagà ma sa dagat egtugdus anì endà kumedakel di, ¹² hediya ma mekedan sa etaw amuk mematay enù ka endà dé umenaw di. Taman sa egoh di duen pelà sa langit, endà dé umenaw di.

¹³ “O Nemula, lidungi ko aken diyà bayà taman sa egoh di meelut dé sa kebulit ko kenak, dodoo tapay ko dé sa agdaw sa egoh ko meketuleng kenak. ¹⁴ Amuk nematay dé sa etaw, enù di ya mehagtay pa dema? Dodoo angat-angatan ku sa tigtu mepion agdaw sa egoh ku mekelaun kedu diyà sa kelikutan ku. ¹⁵ Amuk umowen ko aken, sumagbì a doo enù ka meiyapan ko dé aken i etaw binaelan ko. ¹⁶ Agulé tulikan ko sa langun egbaelan ku, dodoo endà dé egsagipaen ko duu sa medoo salà ku. ¹⁷ Ipeuloy ko sa medoo salà ku, owoy tampulan ko ma sa medoo kenà ku nekeamu.

¹⁸ “Dodoo lagà sa medoo tuduk mebugék, owoy lagà ma sa medoo dakel batu mehalì, ¹⁹ owoy lagà ma sa medoo batu meliblib danà sa leges wayeg, owoy lagà ma sa tanà menanal danà sa meleges udan, hediya ma pedaetan ko sa egpeginawaen sa etaw. ²⁰ Kedanan ko sa egkegaga sa etaw owoy hemagawan ko ma taman melugay, owoy mehalì ma sa palas di amuk mematay. ²¹ Amuk hediya, endà dé metiigan di duu amuk mebaluy datù sa medoo anak di, owoy endà ma duen sa tumulon diyà kenagdi amuk pemalaen sa medoo anak di. ²² Iya daa sa tugedamen di sa kesakit diyà sa hagdi munoy lawa owoy sa kekebukul di danà sa hagtay di.”